ވިލާ އެއާގެ ފްލައި މީގެ ދަތުރުތައް އައްޑު އާއި ފުވައްމުލަކަށް ކުރިއަށް މިއޮތް ބަންދާ ދިމާކޮށް މި މަހުގެ 15 ވަނަ ދުވަހު ފަށާ އިރު، ކޮޅަކަށް 888ރ. އަށް ދަތުރު ކުރެވޭނެ ކަމަށް ވިލާ އެއާ އިން ބުނެފި އެވެ.
އެ ކުންފުނީގެ މެނެޖިން ޑިރެކްޓަރު އަބްދުﷲ ނާޝިދު ވިދާޅުވީ ފްލައިމީން އަލުން ދެކުނަށް ދަތުރުތައް ފަށާ އިރު، ޕްރޮމޯޝަނަލް ފެއާއެއްގެ ގޮތުން ކޮޅަކަށް 888ރ. އަށް އައްޑު އާއި ފުވައްމުލަކަށް ދަތުރު ކުރެވޭނެ ކަމަށެވެ.
އަދި އެހެން ފެއާއެއްގެ ދަށުން ކޮޅަކަށް 999ރ. އަށް ދަތުރު ކުރެވޭނެ ކަމަށް ވެސް ވިދާޅުވި އެވެ.
ނާޝިދު ވިދާޅުވީ ފެއާ އަގުތަކާއި އެހެނިހެން އަގުތައް އަންނަ ހަފުތާގެ ތެރޭގައި ރަސްމީކޮށް އިއުލާން ކުރާނެ ކަމަށެވެ.
އޭނާ ވިދާޅުވީ އަމާޒަކީ މި މަހުގެ 15 ގައި ދަތުރުތައް ފެށުމަށް ފަހު، ކުރިއެކޭ އެއްގޮތަށް އައްޑު އާއި ފުވައްމުލަކަށް ޝެޑިއުލް ދަތުރުތައް ބޭއްވުން ކަމަށެވެ.
މިހާރު ހަމައެކަނި މޯލްޑިވިއަނުން ގަމާއި ފުވައްމުލަކަށް ދަތުރު ކުރާ އިރު، ފްލައިމީން ދަތުރުތައް ކުރުމުން އަގުތަކަށް ހެޔޮ ބަދަލުތަކެއް އައިސްފައިވާކަން ގިނަ ބަޔަކު ފާހަގަކޮށްފައިވެ އެވެ.