އައްޑޫގައި ތިން މީހަކު ދަތުރުކުރި ޑިންގީއެއް ބަންޑުން ޖަހާލައިފިއެވެ.
ފުލުހުންގެ އައްޑޫ ކޮމާންޑަރ ޗީފް އިންސްޕެކްޓަރ އޮފް ޕޮލިސް ޖަމްޝީދު އަލީ ވިދާޅުވީ ޑިންގީއެއް ބަންޑުން ޖަހާލި ކަމުގެ ރިޕޯޓް ލިބިފައިވާ ކަމަށާއި އެވަގުތު ޑިންގީގައި ތިބީ 3 މީހުން ކަމަށާއި އެންމެން ވެސް ސަލާމަތްވެފައިވާ ކަމަށެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި މިރޭ 22:45 އެހާކަށް ހާއިރު ބަންޑުން ޖަހާލި ޑިންގީން ދަތުރުކުރި ތިން މީހުން ވެސް ވަނީ ފަތާފައި ޝަންގްރިއްލާ ރިސޯޓަށް އަރާފައެވެ.
މަސްވެރިކަމަށް ނިކުމެ އުޅެނިކޮށް ސ.ގަމާއި ދިމާލަށް ބަންޑުން ޖަހާލި ޑިންގީ ވަނީ އަޑިއަށް ގޮސްފައެވެ. މި ޑިންގީ އިން ދަތުރު ކުރި 3 މީހުންގެ ތެރޭގައި ހިމެނެނީ ހިތަދޫ 2 މީހަކާއި މަރަދޫ މީހެކެވެ.
މި ޑިންގީ ބަންޑުން ޖަހާލީ ހިސާބަކީ، މިދިޔަ އާދީއްތަ ދުވަހު ޑިންގީ އެއް ބަންޑުން ޖަހާލައި މީހަކު ގެއްލުނު ހިސާބެވެ.