ސްކޫބާ ޑައިވިން ދާއިރާ އިން ކުރިއަށް ދާން ބޭނުންވާ ދެ ޒުވާނަކަށް މަރަދޫ އެކްއަވެންޗަ ޑައިވިން ސެންޓަރު ޑައިވިން މާސްޓް ޕްރޮގްރާމެއްގައި ބައިވެރިވުމުގެ ފުރުސަތު ހުޅުވާލައިފި އެވެ.
އެތަނުގެ ވެރިޔާ އަދި މަރަދޫގެ ކުރީގެ ކައުންސިލަރު އަބްދުﷲ ތައްޔިބް (ޓޮމް) ވިދާޅުވީ އެއް އަހަރު ދުވަހުގެ މުއްދަތަށް ހިންގާ ކޯހުގައި ބައިވެރިވުމުގެ ފުރުސަތު މިހާރު ހުޅުވާލައިފައިވާ ކަމަށެވެ.
އިތުރު މައުލޫމާތު 7774310 އަށް ގުޅައިގެން ލިބޭނެ އެވެ.
ޓޮމް ވިދާޅުވީ ޑައިވިން މާސްޓަ ކޯހުން ފުރުސަތު ދޭނީ އުމުރުން 17-35 އަހަރާ ދެމެދުގެ ޒުވާނަކަށް ކަމަށާއި ކޯސް ކުރިއަށްދާ މުއްދަތުގެ ތެރޭގައި ކޮންމެ މަހަކު ޕޮކެޓް މަނީގެ ގޮތުގައު 2،000ރ. ދޭނެ ކަމަށެވެ.
އެކްއަވެންޗައަކީ އައްޑޫގައި މިހާރު އެންމެ ފުޅާކޮށް ޑައިވިންގެ ހިދުމަތް ފޯރުކޮށް ދޭ ސެންޓަރެވެ. އެގޮތުން އެތަނާ ގުޅިގެން ގިނަ އަދަދެއްގެ ޓޫރިސްޓުން އައްޑު އަށް ޑައިވް ކުރަން އާދެ އެވެ.