ޕަބްލިކް ސާވިސް މީޑިއާ (ޕީއެސްއެމް) ގެ ކޭބަލް ޓީވީގެ ޚިދުމަތް އުރީދޫގެ ކަސްޓަމަރުންނަށް ދޭން އެއްބަސްވުމެއްގައި ސޮއިކޮށްފި އެވެ.
އެ އެއްބަސްވުމުގައި ޕީއެމުން ސޮއިެކުރެއްވީ މެނޭޖިން ޑިރެކްޓަރު އިބްރާހިމް ޚަލީލްއެވެ. އުރީދޫ މޯލްޑިވްސްގެ ފަރާތުން ސޮއި ކުރެއްވީ އެކުންފުނީގެ ޗީފް އެގްޒެކެޓިވް އޮފިސަރު ނަޖީބް ޚާނެވެ.
ޚަލީލް ވިދާޅުވީ، ޕީއެސްއެމުން ކޭބަލް ޓީވީގެ ޚިދުމަތް ދޭން ފަށާނީ އެންމެ ޒަމާނީ ޓެކްނޮލޮޖީއާ އެކުގައި ކަމަށެވެ. އޭނާ ވިދާޅުވީ ޕީއެސްއެމުން ދޭން ތައްޔާރުވަމުންދާ ކޭބަލް ޓީވީގެ ޚިދުމަތަށް އުރީދޫއަކީ މުހިންމު ޕާޓްނަރެއް ކަމަށެވެ.
ނަޖީބް ވިދާޅުވީ ޒަމާނީ ޓެކްނޮލޮޖީއާ އެކު ޕީއެސްއެމުން ތައާރަފް ކުރާ ކޭބަލް ޓީވީގެ ޚިދުމަތުގެ ބައިވެރިއަކަށް އުރީދޫ ހަމަޖެހިގެން ދިއުމަކީ އެ ކުންފުންޏަށް ލިބޭ ވަރަށް ބޮޑު ކުރިއެރުމެ އްކަމަށެވެ.
ޕީއެސްއެމުން ކޭބަލް ޓީވީގެ ޚިދުމަތް ދިނުމަށްޓަކައި ބައިނަލްއަޤްވާމީ ގިނަ ފަރާތްތަކަކާ އެކު މިހާރު ވަނީ އެއްބަސްވުންތަކުގައި ސޮއިކޮށްފަ އެވެ.
އެގޮތުން ޕީއެސްއެމްގެ ކޭބަލް ޓީވީގައި މިހާރު ރާއްޖޭގައި ބަލަމުންދާ ހުރިހާ ޗެނަލްތަކެއް ހިމެނޭނެ އެވެ. މީގެ އިތުރުން ދިވެހި ފިލްމް، ޑްރާމާ، ލަވަ، ހިންދީ އަދި އިނގުރޭސި މަޝްހޫރު ފިލްމްތައް ވެސް ބެލޭނެ އެވެ. މީގެއިތުރުން ކުޑަކުދިންނަށް ޚާއްޞަކޮށްގެން އިންޓަރެކްޓިވް ކޮންޓެންޓްތައްވެސް ހިމެނެ އެވެ.
ޕީއެސްއެމްގެ ކޭބަލް ޓީވީ ޚިދުމަތުގެ ފުރަތަމަ ފިޔަވަހީގެ ދަށުން ދޭން ހަމަޖެހިފައިވަނީ ސްމާޓް ފޯން ޑިވައިސްތަކަށެވެ.