ސަރުކާރު ވައްޓާލަން އުޅޭ ކަމަށް ބުނެ ތުހުމަތުކޮށް ހައްޔަރު ކުރި އެސްޓީއޯގެ ކުރީގެ މެނެޖިން ޑިރެކްޓަރު އާދަމް އާޒިމް ބަންދުން ދޫކޮށްލައިފި އެވެ.
އެނގިފައިވާ ގޮތުގައި އާޒިމް މިއަދު ދޫކޮށްލީ ބަންދާ މެދު ގޮތެއް ނިންމަން ކޯޓަށް ވެސް ހާޒިރު ނުކޮށެވެ.
ފުލުހުން އާޒިމް ހައްޔަރުކޮށް އޭނާއާ ސުވާލުކޮށްފައި ވަނީ ސަންގު ޓީވީން މިދިޔަ ބުދަ ދުވަހު ދެއްކި "ހަބަރަށް ފަހު" ޕްރޮގްރާމުގައި އޭނާ ދެއްކެވި ވާހަކަތަކަކާ ގުޅިގެންނެވެ.
މި މަހުގެ 8 ވަނަ ދުވަހުގެ ހެނދުނު އާޒިމް ހައްޔަރު ކުރުމަށް ފަހު ޖެހިގެން އައި ދުވަހު ބަންދާ މެދު ގޮތެއް ނިންމަން ކްރިމިނަލް ކޯޓަށް ހާޒިރުކުރުމުން ކޯޓުން ހަ ދުވަހުގެ މުއްދަތެއް ދީފައިވެ އެވެ.
އޭނާ ހައްޔަރު ކުރަން ނެރުނު ކޯޓު އަމުރުގައި ބުނެފައި ވަނީ ގާނޫނީ ގޮތުން ރާއްޖޭގައި އުފެދިފައިވާ ސަރުކާރު ގާނޫނާ ޚިލާފަށް ބަދަލު ކުރަން ހިތްވަރު ލިބޭ ފަދަ ގޮތަށް އާޒިމް ވާހަކަ ދައްކާފައިވާ ކަމަށާއި ޝަރުއީ ނިޒާމާ މެދު ރައްޔިތުންގެ ހިތްތަކުގައި ނަފްރަތު އުފައްދައި އިތުބާރު ގެއްލުވާލަން މަސައްކަތްކޮށް، ދޮގު މައުލޫމާތު ފަތުރައި ތަފާތު އެކި ގޮތްގޮތަށް ވާހަކަ ދައްކާފައިވާ ކަމަށެވެ.
އާޒިމަކީ 11 އަހަރުގެ ޖަލު ހުކުމެއް އިއްވާފައިވާ ކުރީގެ ޑިފެންސް މިނިސްޓަރު ކާނަލް ރިޓަޔާޑް މުހައްމަދު ނާޒިމްގެ ކޮއްކޮ އެވެ.