މޫނަކީ އިންސާނާ ފެންނައިރު އެންމެ ފުރަތަމަ އަޅައިގަންނަ ގުނަވަނެވެ. މި ދުވަސްވަރަކީ ހޫނުގަދަ ދުވަސްވަރަކަށް ވާއިރު މޫނުގެ ހަންގަނޑު ރައްކާތެރި ކުރުމަށް ހާއްސަ ސަމާލު ކަމެއް ދޭންޖެހެއެވެ. ހޫނު ގަދަވުމުގެ ސަބަބުން ހަންގަނޑަށް ބޮޑެތި ގެއްލުންތައް ކުރިމަތިވެއެވެ. މިފަދަ ގެއްލުންތަކުން ރައްކާތެރިވުމަށް ކުރެވިދާނެ ކަންކަން އެބަހުއްޓެވެ.
* ގިނަގިނައިން ފެން ބުއިން
ހޫނު މޫސުމަކީ ދާހިއްލުމުގެ ސަބަބުން ހަށިގަނޑުން ފެނުގެ ބައި ވަރަށް ބޮޑަށް މަދުވެގެންދާ ދުވަސްވަރެކެވެ. އެހެންކަމުން ގިނަގިނައިން ފެން ބުއިމަށް ހާއްސަ ސަމާލުކަމެއް ދޭންޖެހެއެވެ. ފެންބުއިމުގެ ސަބަބުން ހަންގަނޑު މަޑުކޮށްދީ ހަންގަނޑު ހިކުމުން ރައްކާތެރިކޮށް ދެއެވެ.ހަށިގަނޑުގެ ޓިޝޫތައް، ތެތްކަން މަތީގައި ބަހައްޓައި ދިނުމުގައިވެސް ފެން އެހީތެރިވެދެއެވެ. މާބަނޑު އަންހެނެއްނަމަ، ނުވަތަ ގާތުން ކިރުދޭނަމަވެސް، ފެން ބުއިން އިތުރުކުރަން ޖެހެއެވެ. ސަބަބަކީ މިފަދަ އަންހެނުންގެ ހަށިގަނޑުން ފެން ބޭރުވާ މިންވަރު، އާއްމު މީހުނަށްވުރެ އިތުރުވާނެތީއެވެ.
* ސަންސްކްރީން އެއް ބޭނުންކުރުން
"ސަންސްކްރީން" އެއް ބޭނުންކުރުމަކީ އަވިން ހަންގަނޑު ރައްކާތެރިކުރުމަށް އެޅިދާނެ ވަރަށް ރަނގަޅު ފިޔަވަޅެކެވެ. ސަން ސްކްރީންގެ ބޭނުމަކީ ހަންގަނޑު އެނދުމާއި ރޫޖެހުމާއި ކެންސަރަށް މަގު ފަހިކުރުވާ ޔޫވީ ލައިޓުން ހަންގަނޑު ހިމާޔަތްކުރުމެވެ. "މޮއިސްޓަރައިޒަރ" އެއް އެކުލެވިފައިވާ "ސަންސްކްރީން" އެއް ބޭނުންކުރުމަކީ ވަރަށް މުހިއްމު ކަމެކެވެ. އޭގެ ސަބަބުން ހަންގަނޑުގެ ތެތްކަން އެއްވަރެއްގައި ހިފަހައްޓައިދެއެވެ. ތެޔޮ ހަންގަނޑެއްނަމަ ޑްރައި މޮއިސްޗަރައިޒް ކްރީމެއް ބޭނުންކުރެވިދާނެއެވެ. ހިކި ކުރަކި ހަންގަނޑެއްނަމަ ތެޔޮ އޮލަ މޮސްޗަރައިޒް ކްރީމެއް ބޭނުންކުރުން ރަނގަޅުވާނެއެވެ. ހަންގަނޑަށް ވަރަށް ފައިދާހުރި މާއްދާއެއް ކަމަށްވާ އަލްފާހައިޑްރޮކްސީ އެސިޑް މޮއިސްޗަރައިޒް ކްރީމުގައި އެކުލެވެއެވެ. އަތްވަށް ނިކުތުމުގެ 15 މިނިޓު ކުރިން ލޯޝަން ބޭނުންކުރަން ޖެހެއެވެ. ހަމައެހެންމެ، އަވީގައި ހުންނަނަމަ ކޮންމެ 15 މިނިޓަކުން ލޯޝަން އުނގުޅުމަށް ހާއްސަ ސަމާލުކަމެއް ދޭންޖެހެއެވެ. އޭގެ ފައިދާ އެންމެ ބޮޑަށް ކުރާނީ އޭރުންނެވެ.
* މޫނުދޮވުން
މޫނު ރަގަޅަށް ބަލަހައްޓައިގެން ގެންގުޅުމަށް އެންމެ ރަގަޅު ގޮތަކީ މޫނު ބަރާބަރަށް ދޮވެ ސާފުތާހިރުކޮށް ގެންގުޅުމެވެ. ދުވާލަކު 4 ފަހަރު ނުވަތަ އެޔަށް ވުރެވެސް ގިނައިން މޫނު ދޮވުމަކީ ހަމަށް ފައިދާ ކޮށްދޭ ކަމެކެވެ. ހަމައެހެންމެ، ހަމުގައި އުފެދޭ ނަޖިސް ނައްތާލަދޭ ކަމެކެވެ. މޫނު ދޮންނަން ފަޅޯ ބޭނުންކޮށްގެން އުފައްދާފައިވާ ފޭސް ވޮޝްްއެއް ބޭނުންކުރުން ރަނގަޅެވެ. އެއީ މޫނުގައި ހުންނަ މަރުވެފައިވާ ހަންތައް ނައްތާލާ އާހަންފަށަލައެއް އުފެއްދުމަށް ބޭނުންވާ ޕަޕައިން އެންޒައިމް އޭގައި އެކުލެވޭތީއެވެ.
* އެންމެ ހޫނު ގަދަވާ ވަގުތު އަތްވަށް ނުނިކުތުން
ދުވާލުގެ ވަގުތުގައި އެންމެ ހޫނު ގަދަވާނީ ހެނދުނު 10 އިން މެންދުރުފަހު 3 އަށެވެ. ޔޫވީ ލައިޓުން ހަންގަނޑު ހިމާޔަތްކުރުމަށް އެގަޑިތަކުގައި ބޭރަށްދާނަމަ ކުޑައެއް އަޅައިގެން ދިޔުން ރައްކާތެރިއެވެ. ހަމައެހެންމެ، ތޮތްޕެއް އެޅުމުން މޫނަށް އަވީގެ ސަބަބުން ކުރާ އަސަރު ކުޑަވެގެންދާނެއެވެ. މީގެ އިތުރުން، އަވި އައިނު އަޅައިގެން ދިޔުން ބުއްދިވެރިއެވެ. ސަބަބަކީ ލޯކައިރީގައި ހުންނަ ހަމަކީ ވަރަށް ނާޒުކު ހަމަށްވެފައި އަވަހަށް ރޫޖެހިގެންދާނެ ހަންތަކަށް ވާތީއެވެ.
* މޭކަޕް މަދުކޮށްލުން
ހޫނުގަދަ ދުވަސްވަރު ގަދަޔަށް މޭކަޕްކުރުމަކީ ހަންގަނޑަށް ބޮޑެތި ގެއްލުންތައް ލިބިދާނެ ކަމެކެވެ. އެހެންކަމުން ހޫނުދުވަސްވަރު ވޯޓަރ ޕްރޫފް ލުއި މޭކަޕެއް ކުރުން ރަނގަޅެވެ. ހަމައެއާއެކު ތުންފަތް ތެތްކޮށް ބެހެއްޓުމަށް މޮއިސްޓަރައިޒިން ލިޕް ބާމެއް ބޭނުންކުރެވިދާނެއެވެ.
* ފިޒީ ޑްރިންކްސް ބޭނުންނުކުރުން
ކަރު ހިއްކުން ފިލުވައިލަން އޮތް އެންމެ ރަނގަޅު ހައްލަކީ ކޯކްފުޅިއެއް ބޮއެލުމެއް ނޫނެވެ. ފިޒީ ޑްރިންކްސްއަކީ އޭގައި ގިނަ އަދަދަކަށް ހަކުރު އެކުލެވޭ އެއްޗަކަށް ވުމުން އެއިން ހަންގަނޑަށް ވަރަށް ގެއްލުންވެއެވެ. މިފަދަ ގެއްލުންހުރި ބުއިންތަކުގެ ބަދަލުގައި ލުނބޯފަނި ނުވަތަ ކަރާފަނި ބޭނުންކުރެވިދާނެއެވެ. ކޮފީއަކީވެސް ހަށިގަނޑަށް ފެން މަދުކޮށްލާ ބުއިމަކަށް ވާއިރު ހޫނުގަދަ ދުވަސްވަރު ކޮފީވެސް މަދުކޮށްލުމަކީ ކުރެވިދާނެ ކަމެކެވެ.
އެހެންކަމުން މިފަދަ ހޫނު ދުވަސްވަރެއްގައި ހަންގަނޑު ސާފުކޮށް ރައްކާތެރިކުރުމަށް މަސައްކަތްކުރުން ވަރަށްވެސް މުހިއްމެވެ.