ހއ. އިހަވަންދޫގައި ހުންނަ މިފްކޯގެ އައިސް ޕްލާންޓްގެ މެކޭނިކް އިސްމާއިލް އުމަރު މިދިޔަ ހުކުރު ދުވަހު މަރާލިކަމުގެ ތުހުމަތުގައި ހައްޔަރު ކުރި ބަންގްލަދޭޝް މީހާ، އިސްމާއިލް މެރި ކަމަށް އިޢުތިރާފުވެއްޖެ އެވެ.
މިއަދު ފުލުހުން ނެރުނު ބަޔާނެއްގައި ބުނީ އިސްމާއިލްއާއެކު އެ އައިސް ޕްލާންޓްގައި މަސައްކަތް ކުރަމުންދިޔަ 27 އަހަރުގެ ޝުމޮން މިއާ ވަނީ ހައްޔަރުކޮށްފައިވާ ކަމަށާއި އިސްމާއިލް މަރާލި ގޮތް އޭނާ ކިޔައިދީފައިވާ ކަމަށެވެ.
އިސްމާއިލްގެ ހަށިގަނޑުގެ އެކިތަންތަން ތޫނު އެއްޗަކުން ހަމަލާދީ ޒަހަމްކޮށްލާފައިވާއިރު، އެކަމަށް ބޭނުންކުރި ވަޅިއާއި އޭނާ ލައިގެން ހުރި އަންނައުނުވެސް ފުލުހުން ވަނީ ހޯދާފައެވެ. ޝުމޮން މިއާގެ އިތުރުން އިސްމާއިލް މަރާލުމުގައި ބައިވެރިވި ބަންގްލަދޭޝްގެ އިތުރު ހަތަރު މީހަކު ވެސް މިހާރު ވަނީ ހައްޔަރުކޮށްފައެވެ.
މިމައްސަލައިގައި ކުށްވެރިވާ އެންމެންވެސް އިންސާފުގެ ކުރިމައްޗަށް ގެންނާނެ ކަމުގެ ޔަޤީންކަން ފުލުހުންވަނީ ދީފައެވެ.
ޅ.ހިންނަވަރަށް ނިސްބަތްވާ އިސްމާއިލް އުމަރު މަރުވެފައި އޮއްވާ ފެނުނީ ދެމީހުނަށް ވަދެވޭވަރު ޖާގައެއް ހުންނަ އައިސް ޕްލާންޓްގައި ހުރި ކާނެއްގެ ތެރެއިންނެވެ.