މި ފަހަރު ވެސް ފިތުރު އީދު ނަމާދުގެ ބޮޑު ޖަމާއަތް އައްޑޫގައި ބާއްވަން ހިތަދޫ ނޫރުލް އިސްލާމް ޖަމިއްޔާ އިން ނިންމައިފި އެވެ.
އެ ޖަމިއްޔާގެ ފޭދޫ ގޮފިން މިހާރު ވަނީ ފޭދޫގައި ބޮޑު ޖަމާއަތް އޮތް އޮންނާނެ ތަން އަންގައި ދިނުމުގެ ގޮތުން އެކިއެކި ދިމަދިލާލިގައި ބެނާތައް ޖަހައިފަ އެވެ.
ބެނާތަކުގައި ބުނެފައި ވަނީ ފޭދޫގައި ބޮޑު ޖަމާއަތް އޮންނާނީ ފޭދޫ ސްކޫލާ ދިމާލުން ރަށްދެބައި މަގުން ހުޅަނދގު ދެކުނު ފަރާތު ހިއްކި ބިމުގައި ކަމަށެވެ. ފިތުރު އީދު ނަމާދަށް ހާޒިރު ވާން ޖެހޭ ގަޑިއަކީ ހެނދުނު 7:00 އެވެ.
ފޭދޫގައި ބޮޑު ޖަމާއަތް ބާއްވަނީ ފޭދު އާއި މަރަދޫފޭދޫ އަދި މަރަދޫ ރައްޔިތުންނަށް ވެސް ހާއްސަކޮށްގެންނެވެ.
މީގެ އިތުރުން ހިތަދޫގައި ބޮޑު ޖަމާއަތް މި ފަހަރު ވެސް އޮންނާނީ އައްޑޫ ފުޓްބޯޅަ ސްޓޭޑިއަމްގަ އެވެ.
ނޫރުލް އިސްލާމް ޖަމިއްޔާ އިން އައްޑޫގައި ފިތުރު އީދާއި އަޟްހާ އީދުގެ ބޮޑު ޖަމާއަތް ބާއްވަމުން އަންނަނީ 2012 ވަނަ އަހަރުން ފެށިގެންނެވެ.
މި އަހަރުގެ ފިތުރު އީދު ދުވަހަކީ މި މަހުގެ 25 ވަނަ ދުވަހެވެ.