ހިތަދޫ ހިރާ ސްކޫލަކީ އައްޑޫގައި ކުޑަ ދުވަސްކޮޅެއްގެ ތެރޭގައި ބެލެނިވެރިންގެ ތެރޭގައި ވަރަށް މަގުބޫލްވެގެން ގޮސްފައިވާ ސްކޫލެކެވެ. ޖާގައިގެ ދަތިކަމާ ހުރެ މިހާރު ވެސް އެތައް ކުދިންނަށް އެ ސްކޫލަށް ވަންނަން ކިއޫގައި އެބަ ތިއްބެވެ.
ހިރާ ސްކޫލްގެ އެންމެ ހާއްސަ ކަމަކީ އިސްލާމީ ބިންގަލެއްގެ މަތީގައި ޒަމާނީ ތަޢުލީމު ފޯރުކޮށްދީ އެ ރޮނގުން ކާމިޔާބީތަކެއް ހާސިލް ކުރުމެވެ. އެ ނަތީޖާ މިހާރު ވެސް އަންނަނީ ފެންނަމުންނެވެ.
ޖާގައިގެ ދަތިކަން ހައްލު ކުރުމުގެ ގޮތުން ހިރާ ސްކޫލުން މިހާރު ވަނީ އެ ސްކޫލްގެ ޢިމާރާތް އެޅުމަށްޓަކައި، ފައިސާ ހޯދުމުގެ ކެމްޕޭނެއް ވެސް ފަށައިފަ އެވެ.
އެ ސްކޫލްގެ ޕްރިންސިޕަލް މައިރިޔަމް ސިތާރާ "އައްޑޫ ލައިވް" އަށް ވިދާޅުވީ އެ ކެމްޕޭނަކީ ހިރާ ސްކޫލްގެ ދަރިވަރުން ވަގުތީ ބޯހިޔަލުން ދާއިމީ ބޯހިޔަލަކަށް ދިއުމަށް ރާއްޖެ އާއި ރާއްޖޭން ބޭރަށް ހުޅުވާލައިގެން ފައިސާ ހޯދުމަށް ފަށާފައިވާ ކެމްޕޭނެއް ކަމަށެވެ.
ސިތާރާ ވިދާޅުވި ގޮތުގައި މި ކެމްޕޭނު ދެ ބަޔަކަށް ކުރިއަށް ގެންދާ އިރު އެއް ބަޔަކީ ރާއްޖޭން ބޭރުގައި ތިބި ސްކޫލަށް ހެޔޮ އެދޭ ފަރާތްތަކަށް، ފަސޭހަކަމާ އެކު، މިކަމަށް އެހީތެރިވެ ވަޑައިގެންނެވުމަށް މަގުފަހިކޮށް ދިނުމަށްޓަކައި، ބޭރުގެ ޕްލެޓްފޯމެއް ކަމަށްވާ ލޯންޗްގުޑް www.launchgood.com/hiraschool ގައި ޤާއިމު ކުރެވިފައިވާ ކެމްޕޭކެނެވެ.
ދެވަނަ ބަޔަކީ ސްކޫލްގެ ނަމުގައި ބީއެމްއެލް އަދި އިސްލާމިކް ބޭންކްގައި ހުޅުވިފައިވާ އެކައުންޓްތަކަށް ފައިސާ ޓްރާންސްފާކޮށްގެން ފައިސާ ހަދިޔާ ކުރެވޭ ގޮތަށް ކުރިޔަށް ގެންދާ ބަ އެވެ.
ސިތާރާ ވިދާޅުވީ ކޮންމެ ބޭފުޅަކު ވެސް މިކަމުގައި ބައިވެރިވެވަޑައިގެން އެ ބޭފުޅެއްގެ ޤާބިލިއްޔަތު ތަންދިން މިންވަރަކުން އެހީތެރިވެ ދެއްވުމަށް އެދިވަޑައިގަންނަވާ ކަމަށެވެ.
"އަޅުގަނޑުމެން ވަރަށް މާތް މަޤްޞަދެއްގައި ހުޅުވައިގެން ބުރަ މަސައްކަތްތަކާއި އުއްމީދާއެކު ކުރަމުން އަންނަ މަސައްކަތެއް މިއީ. އެހެންކަމުން މުޖުތަމަޢަށް ހެޔޮ ބަދަލު ގެންނާނެ ފަދަ މުސްލިމް ދިވެހި ޝަޚްޞެއް އުފެއްދުމަށް އަޅުގަނޑުމެން ކުރާ މި މަސައްކަތުގެ ހިއްސާ އަށް ކޮންމެ ދިވެއްސަކުވެސް ވުމަކީ އަޅުގަނޑުމެންނަށް ދެއްވޭނެ ވަރަށް ބޮޑު އެއްބާރުލުމެއް." އޭނާ ވިދާޅުވި އެވެ.
ހިރާ ސްކޫލަށް ފައިސާ ހޯދުމަށް ކުރާ މި ކެމްޕޭންގައި ބައިވެރިވެވަޑައިގެން ފައިސާ ދެއްވުމަށް ބޭނުންފުޅުވާ ބޭފުޅުންނަށް އެކައުންޓްތަކުގެ މައުލޫމާތާއި، ތަފްސީލުތައް ޙިރާ ސްކޫލްގެ ފޭސްބުކް ސަފުހާ www.facebook.com/hiraschool އިން ލިބިވަޑައިގަންނަވާނެ އެވެ.
ހިރާ ސްކޫލުން ބުނި ގޮތުގައި އެސްކޫލް ފެށުނީއްސުރެ މިއަދާ ހަމައަށް ހިންގަމުން އައީ ދީލަތި ފަރާތެއްގެ ގޯތީގައި އަމިއްލަ ވިޔަފާރިވެރިއެއްގެ ދާއިމީ ދީލަތި އެހީގައި ބިނާކޮށްފައިވާ އިމާރާތެއްގަ އެވެ.
"ދެހާސް ދިހައެއްހައި ގައި ނާސަރީ ލެވެލްއިން ފެށި ސްކޫލް ތަރައްގީވަމުން އައިސް ކޮންމެ އަހަރަކު އާ ގްރޭޑެއް އުފައްދައި ގްރޭޑް ހަޔެކާ ހަމަޔަށް މިހާރު ދަރިވަރުން ކިޔަވަމުންދޭ. ކޮންމެ އަހަރަކު އާގްރޭޑެއް އުފައްދަން ޖެހިފައިވުމާ އެކު އެކި ހިސާބުތަކުން އަލަށް ސްކޫލަށް ކުދިން ވައްދަން އެދޭ އެތަކެއް ފަރާތްތަކަށް ޖާގައިގެ ދަތިކަމާހުރެ އެފުރުސަތު ވަނީ ނުދެވ،" ސިތާރާ ވިދާޅުވި އެވެ. "ޕްރައިމަރީގެ ދަރިވަރުން ދެ ސެޝަނަށް ގެނައުމާ އެކު ޕްރީ ސްކޫލް ދަރިވަރުން ދުވަހުގެ އެކި ގަޑިތަކުގައި ވަރަށް ދަތި ގޮތަކަށް ގެނެސްގެން މިހާރު ކުރިޔަށް ގެންދާ ގޮތަށް ވެސް އަންނަ އަހަރު ގެންދެވެން ނެތުމަކީ ސްކޫލްގެ ވަރަށް ބޮޑު ކަންބޮޑުވުމެއް."
ޖާގައިގެ ދަތިކަމާ އެކު ސްކޫލުގެ އެންމެ ބޮޑު ކަންބޮޑުވުމަކީ އެތަނުން އެދޭ ފެންވަރަށް ތައުލީމާއި ހުނަރުތައް ދަރިވަރުންނަށް ހޯދައިދިނުމަށްޓަކައި ސްކޫލުން ރާވާ ކަންކަމަށް ބޭނުންވާނެ "ސެޓަޕް" އެއް ގާއިމްނުކުރެވުމެވެ.
"އިތުރު ހަރަކާތްތަކުގެ ތެރެއިން ތަފާތު ހުނަރުތަކާއި ގާބިލިއްޔަތު ތަރައްގީ ކުރުމަކީ ސްކޫލުން ބޮޑު އަހައްމިއްޔަތެއް ދޭކަމަކަށްވާ އިރު މިކަމަށް އެންމެ ފުރިހަމަ މާހައުލެއް ގާއިމު ކުރެވޭނީ ސްކޫލްގެ ޢިމާރާތް އެޅިގެން. މިސާލަކަށް ދަންނަވާ ނަމަ ޕީއީގެ ދަށުން ތަފާތު ހުނަރުތައް ތަރައްގީކުރުމަށާއި ސައިންސް އެކްސްޕްލޯ ކުރުމަށާއި ސޯޝަލް ޙަރަކާތްތަކާއި ކޮންފަރެންސް ބޭއްވުން ފަދަ ކަންކަން އަޅުގަނޑުމެން އެދޭ ފެންވަރަށް ގެންދިއުމުގައި ވަރަށް ގިނަ ގޮންޖެހުންތައް އެބަހުރި،" ޕްރިންސިޕަލް ވިދާޅުވި އެވެ. "އެހެންކަމުން މިއީ ސްކޫލްގެ ޢިމާރާތް ނުހެދި ދިޔަ އަހަރުތަކަށް ނިމުމެއް ގެނެސް ސްކޫލްގެ ޢިމާރާތް އަޅަން މަސައްކަތް ކުރަންވީ ވަގުތުކަމަށް އަޅުގަނޑުމެން ދެކެން."
ޙިރާ ސްކޫލަކީ ސްކޫލްތަކުގެ ފެންވަރުގައި ބާއްވާ ހަރަކާތްތަކުން ރަނގަޅު ކާމިޔާބީތަކެއް މިހާރު ވެސް ހޯދަމުން އަންނަ ސްކޫލެކެވެ.
ނަމަވެސް މި ހަރަކާތްތަކުގެ ފަރިތަ ކުރުންތައް ކުރިޔަށް ގެންދަނީ ވަރަށް ދަތި ގޮތަކަށް ސްކޫލްގެ ކުލާސްރޫމުން ބޭރުގައި އޮންނަ ކުޑަ ތަންކޮޅުގަ އެވެ.
އެ ސްކޫލުން މަޢުލޫމާތު ދިން ގޮތުގައި މި އަންނަ އަހަރު ސްކޫލްގައި ސާނަވީ ތައުލީމު ދޭން ފަށަން ޖެހިފައިވުމާ އެކު މިކަން ކުރުމަށްޓަކައި ސްކޫލަށް އަލަށް ކުދިން ނުނަގައި މަޑުކުރަން ޖެހުމަކީވެސް ސްކޫލްގެ އިމާރާތް މިއަހަރު ކޮންމެހެން އަޅަން މަޖުބޫރުވާ އެއްސަބަބެވެ.
އެހެންކަމުން ޙިރާސްކޫލްގެ ޢިމާރާތް އެޅުމަށް ކުރާ މިމަސައްކަތާއި ދުޢާގައި ކޮންމެމީހަކުވެސް ބައިވެރިވާން އެސްކޫލުން އެދެ އެވެ.
"ﷲ އިރާދަކުރެއްވިއްޔާ ގައުމަށް ތެދުވެރި ގައުމުގެ ކަންކަން ހެޔޮ މަގަށް އަޅުވާނެ ދަރިންތަކެއް މި މަސައްކަތުން މާދަމާ އުފެއްދިއްޖެ ނަމަ މިކަމަށް އެހީތެރިވެ ދެއްވައި ޞަދަޤާތް ކުރެއްވި ކޮންމެ ބޭފުޅަކަށް އެ ކުދިން ކުރާ ކޮންމެ ހެޔޮ ޢަމަލަކުން ޘަވާބާ ދަރުމަ ލިބިގެން ދާނެ،" ސިތާރާ ވިދާޅުވި އެވެ.
ޕްރޮޖެކްޓާ ބެހޭ އިތުރު މަޢުލޫމާތު ތިރީގައި މިވާ ޔޫޓިޔުބް ލިންކުން ލިބިވަޑައިގަންނަވާނެ އެވެ.
* ޙިރާ ސްކޫލަކީ ނަމޫނާ ސްކޫލެއް
އެކާވީސް ވަނަ ޤަރުނުގެ ގޮންޖެހުންތަކާ ކުރިމަތިލުމުގެ ޤާބިލްކަން ލިބިފައިވާ މުސްލިމް ދިވެހި ދަރިންތަކެއް ބިނާ ކުރުމުގެ މަޤްޞަދުގައި ފެށި ހިރާސްކޫލަކީ 21 ވަނަ ޤަރުނަށް ބޭނުންވާ ހުނަރުތަކާއެކު ޒަމާނީ ތައުލީމު ފޯރުކޮށްދޭ ތަނެކެވެ.
ދިވެހިރާއްޖޭގެ ގައުމީ ކަރިކިއުލަމްގައި ބުނާފަދަ ޤާބިލް ފަރުދެއް ތައްޔާރު ކުރުމަށް ޢަމަލީ ގޮތުން މަސައްކަތް ކުރާ މިސްކޫލްގެ މަސައްކަތްތަކަށް ރާއްޖެއާއި ރާއްޖެއިން ބޭރުގެ ފަރާތްތަކުން ތައުރީފްކޮށްފައިވެ އެވެ.
ކުރު މުއްދަތެއްގެ ތެރޭގައި ރާއްޖޭގެ އުތުރުން ދެކުނަށް ޙިރާސްކޫލް މަޝްހޫރުވެ ސްކޫލްގެ "ބެސްޓް ޕްރެކްޓިސް" ތަޖުރިބާ ކުރުމަށް ރާއްޖޭގެ އެކި ހިސާބުތަކުން ސްކޫލު ތަކުގެ އިސްވެރިންނާއި ޓީޗަރުން ދަނީ ޙިރާ ސްކޫލަށް ޒިޔާރަތް ކުރަމުންނެވެ.
* ޤައުމީ މުޤައްރަރުގެ ހުރިހާ ކަމެއް ތަންފީޒު ކުރޭ!
ޙިރާ ސްކޫލަކީ ދިވެހި ރާއްޖޭގެ ގައުމީ މުގައްރަރަށް އިނގިރޭސި ބަހުން ތައުލީމު ފޯރުކޮށް ދޭތަނެކެވެ. އެގޮތުން ގައުމީ މުގައްރަރުގައި ހިމެނޭ ހުރިހާ ކަންކަން ތަންފީޒުކޮށް ގައުމީ މަންހަޖުގައި ފާހަގަކޮށްފައިވާ ފަދަ ގާބިލު ދިވެހި ދަރިއަކަށްވުމަށް ބޭނުން ވާނެ ހުނަރުތައް އެ ސްކޫލުން ފޯރުކޮށްދެ އެވެ.
ހަމަމިއާ އެކު އިނގިރޭސިވިލާތް ފަދަ ތައުލީމު ދިނުމުގެ ރޮނގުން ކުރިއަރާފައިވާ ގައުމުތަކުގެ ކާމިޔާބު ޕްރޮގްރާމްތައް އެ ސްކޫލްގެ ގިނަ މާއްދާތަކަށް ބޭނުން ކުރެއެވެ. މީގެ ތެރޭގައި އޮކްސްފޯޑާއި ކެމްބްރިޖްގެ ޕްރޮގްރާމްތައް ހިމެނެ އެވެ.
* ޑިޖިޓަލް ސޮސައިޓީގެ ގޮންޖެހުންތަކާ ކުރިމަތިލެވޭ ފަދަ ޤާބިލް މުސްލިމު ދިވެހި ދަރިން ބިނާ ކުރޭ
ޙިރާ ސްކޫލުން ގައުމީ މުގައްރަރުގައި ހިމެނޭ ހުރިހާ މާއްދާތައް ކިޔަވައިދެ އެވެ. އެ މާއްދާތައް ކިޔަވައި ދިނުމުގައި ސްކޫލްގެ އަމާޒަކީ ދުނިޔަވީ ތަޢުލީމު ފޯރުކޮށް ދިނުމާ އެކު އާޚިރަތުގެ ބާއްޖަވެރިކަން ހޯދުމަށް ބޭނުން ވާނެ ފަދަ ބިންގަލެއްގެ މަތީގައި ދަރިން އުފެއްދުމެވެ.
އެގޮތުން ކުރިއަރާފައިވާ "ޑިޖިޓަލް ސޮސައިޓީ" ގެ ގޮންޖެހުންތަކާއި ކުރިމަތިލެވޭ ފަދަ ޤާބިލް ކުއްޖަކު އުފެއްދުމަށް ބޭނުންވާ އެންމެހާ މައުލޫމާތާއި ހުނަރު އެންމެ ތުއްތު އިރުއްސުރެ ފޯރުކޮށް ދިނުމާއެކު ދީނީ އާދަތަކާއި އިސްލާމީ ރިވެތި އުސޫލްތައް އެންމެ ތުއްތު އިރުއްސުރެ އަށަގަންނުވަން މަސައްކަތް ކުރުމަކީ ސްކޫލްގެ އަމާޒެވެ.
އެހެންކަމުން އެ ސްކޫލުގެ އުއްމީދަކީ އެ ސްކޫލުން ތައްޔާރު ކުރާ ޖީލުގެ ސައިންސްވެރިންނާއި ޑޮކްޓަރުންނާއި އިންޖިނިއަރުންނާއި ޕައިލެޓުންނާއި ވިޔަފާރިވެރިންނާއި މުދައްރިސުންނަކީ މުޖުތަމަޢަށް ހެޔޮ ބަދަލުތަކެއް ގެންނާނެ ފަދަ އަދި އާޚިރަތުގެ ކާމިޔާބު ހޯދާނެ ފަދަ ދަރިންތަކަކަށް ހެދުމެވެ.
* ދަރިންނަށް ރައްކާތެރި މާޙައުލެއް!
ޙިރާ ސްކޫލުގެ މާހައުލަކީ ރައްކާތެރި މާހައުލަކަށް ހެދުމަށްޓަކައި އެ ސްކޫލުން ޚާއްޞަ ސަމާލު ކަމެއް ދެ އެވެ. އެގޮތުން ދަރިވަރުންނާއި ރަށްޓެހި ބިހޭވިއަ މޮޑިފިކޭޝަން ސިސްޓަމެއް ސްކޫލްގައި ޤާއިމްކޮށްފައިވެ އެވެ.
މި ސިސްޓަމަކީ ދަރިވަރުންގެ އުޅުމަށް އަމިއްލަ އަށް ޛިއްމާވެ ރަނގަޅު އުޅުން ދަމަހައްޓައި ރަނގަޅު ކުރަން ޖެހޭ ކަންކަން ރަނގަޅު ކުރުމުގެ ޛިއްމާ އުފުލަން ދަސްވާފަދަ ސިސްޓަމެކެވެ. ވަކިވަކި ދަރިވަރުންގެ ކިބައިގައި ހުންނަ ތަފާތު މައްސަލަތައް ދެނެގަނެ އެ މައްސަލަތައް ހައްލު ކުރުމަށް ދަރިވަރުންނަށް ޚާއްޞަ އެހީތެރިކަން ސްކޫލުން ފޯރުކޮށް ދެ އެވެ.
މުޖުތަމަޢުގެ ޙާލަތަށް ރިއާޔަތްކޮށް ދަރިވަރުންގެ ނަފްސާނީ ދުޅަހެޔޮ ކަމަށް އަބަދުވެސް ޙިރާސްކޫލުން މަސައްކަތް ކުރެ އެވެ. ދަރިވަރުންގެ ސިކުނޑިތަކަށް ހަމަޖެހުން ހޯދައިދީ ހަމަހިމޭން ކުރުވުމަށްޓަކައި ކޮންމެ ދުވަހަކު ވެސް ވަކި ވަގުތުތައް އެކަމަށް ޚާއްޞަ ކުރެ އެވެ.
އަދި ސްކޫލްގެ މާހައުލަކީ އިސްލާމީ ރިވެތި އުސޫލުތަކަށް ފަރިތަކުރާ މާހައުލަކަށް ހެދުމަށްޓަކައި ސްކޫލް ފެންވަރުގައި "ވެލިއުސް ޕްރޮގްރާމް" ހިންގަ އެވެ.