ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ނައިބް ރައީސް އަހްމަދު އަދީބްއާ ހިއުމަން ރައިޓްސް ކޮމިޝަން (އެޗްއާރްސީއެމް) އިން ބައްދަލުކޮށްފި އެވެ.
އަދީބާ އެޗްއާރްސީއެމުން މި ބައްދަލު ކުރީ އޭނާގެ ސިއްހީ ބޮޑެތި މައްސަލަތަކެއް ހުރި ކަމަށް ބުނެ އާއިލާއިން ކަންބޮޑުވުން ފާޅުކޮށްފައި ވަނިކޮށެވެ.
އަދީބުގެ އާއިލާއިން ބުނީ އޭނާގެ އެތެރެހަށީގައި ސިސްޓެއް އުފެދި ކިޑްނީގައި ހިލަހެދި ކެންސަރުގެ ނުރައްކާވެސް އެބައޮތްކަމަށެވެ.
މިވާހަކަތަކާއި ގުޅިގެން އެތައް ބަޔަކު ދަނީ އަދީބްއަށް ބޭސް ފަރުވާގެ ފުރުސަތު ފަހިކޮށްދޭން ޖެހޭނެކަމަށް ގޮވާލަމުންނެވެ. އޭގެ ތެރޭގައި ކުރީގެ ދެ ރައީސުންނާއި ސިޔާސީ އިސް ފަރާތްތައް ހިމެނެއެވެ.
އަދީބް ޖަލަށް ހުކުމް ކޮށްފައިވަނީ ރާއްޖޭގައި މިހާތަނަށް ފެންމަތިވި އެންމެ ބޮޑު ކަރަޕްޝަން މައްސަލަ ކަމަށްވާ އެމްއެމްޕީއާރުސީގެ ހިޔާނާތުގެ މައްސަލަ އާއި ރައީސް އަބްދުﷲ ޔާމީން ދަތުރުކުރެއްވި ލޯންޗު ކޮޅުގައި އެއްޗެއް ގޮއްވާލި ހާދިސާ އާއި ގުޅިގެން އުފުލި ޓެރަރިޒަމް ދައުވާ އާއި ފިސްތޯލައެއް ގެންގުޅުނުކަމުގެ ދައުވާ ސާބިތުވެގެންނެވެ. އަދީބް އަށް ވަނީ 33 އަހަރުގެ ޖަލު ހުކުމެއް އިއްވާފައެވެ.