އައްޑޫގައި ފުލުހުން ހިންގި ތަފާތު ތިން އޮޕަރޭޝަނެއްގައި ގިނަ ޢަދަދެއްގެ މަސްތުވާތަކެއްޗާއެކު ތިން މީހަކު ފުލުހުންގެ ބެލުމުގެ ދަށަށް ގެެނެސްފި އެވެ.
މި އޮޕަރޭޝަންތަކުގައި ފުލުހުންގެ ބެލުމުގެ ދަށަށް ގެެންދިޔައީ 26 އަހަރުގެ ފިރިހެނަކާއި 33 އަހަރުގެ ފިރިހެނަކާއި 38 އަހަރުގެ ފިރިހެނެކެވެ.
އެ މީހުންގެ ތެރެއިން 26 އަހަރުގެ މީހާ ފުލުހުންގެ ބެލުމުގެ ދަށަށް ގެންދިޔައީ ވައިގެ މަގުން އައްޑު އަށް މަސްތުވާތަކެތި އެތެރެ ކުރަން އުޅޭކަމަށް ފުލުހުންގެ އިންޓެލިޖެންސަށް ލިބުނު މަޢުލޫމާތަކާ ގުޅިގެން އައްޑޫގައި މަސައްކަތް ކުރާ ފުލުހުންނާއި ފުލުހުންގެ އިންޓެލިޖެންސް ގުޅިގެން މި މަހުގެ 16 ވަނަ ދުވަހު ހިންގި އޮޕަރޭޝަނުގައި ގަން އިންޓަރނޭޝަނަލް އެއާޕޯޓުންނެވެ.
އޭނާ ފުލުހުންގެ ބެލުމުގެ ދަށަށް ގެންގޮސް ބަލައި ފާސް ކުރި އިރު އޭނާ ގެންގުޅުނު ދަބަސް ތެރެއިން މަސްތުވާތަކެތި ކަމަށް ޝައްކު ކުރެވޭ އެއްޗެއް ހުރި ފުޅިއަކާއި މަނާ ބޭސްތަކެއް ހުރި ރަބަރު ޕެކެޓެއް ފެނިފައިވެ އެވެ.
އޭނާގެ ބަންދާއި މެދު ގޮތެއް ނިންމުމަށް ހިތަދޫ މެޖިސްޓްރޭޓް ކޯޓަށް ހާޒިރު ކުރުމުން ވަނީ ފަސް ދުވަހުގެ މުއްދަތެއް ދީފައެވެ.
މި އޮޕަރޭޝަނުގައި ހައްޔަރު ކުރި 33 އަހަރުގެ މީހާ ފުލުހުންގެ ބެލުމުގެ ދަށަށް ގެންދިޔައީ "ސައިމާ" ބޯޓުން މަސްތުވާތަކެތި ގެންނަކަމަށް ފުލުހުންގެ އިންޓެލިޖެންސަށް މަޢްލޫމާތަކާ ގުޅިގެން ހަމަ މި މަހުގެ 16 ވަނަ ދުވަހު އެވެ.
މި އޮޕަރޭޝަނުގައި ކޯޓު އަމުރެއްގެ ދަށުން އެބޯޓު ބަލައި ފާސްކޮށްފައިވާ އިރު އެ ބޯޓްގެ ވީލް ހައުސް ތެރެއިން މަސްތުވާތަކެތި ކަމަށް ޝައްކު ކުރެވޭ އެއްޗެއްހުރި ފިލްމު ހުސްކުރި 16 ދަޅާއި ބޮޑު ރަބަރު ޕެކެޓެއް ފެނިފައިވެ އެވެ.
މި މައްސަލާގައި ފުލުހުންގެ ބެލުމުގެ ދަށަށް ގެންދިޔަ މީހާގެ ބަންދާމެދު ގޮތެއް ނިންމުމަށް ހިތަދޫ މެޖިސްޓްރޭޓް ކޯޓަށް ހާޟިރުކުރުމުން ވަނީ ދޫކޮށްލައިފަ އެވެ.
މި މަހުގެ 17 ވަނަ ދުވަހު ހިންގި އޮޕަރޭޝަނުގައި 38 އަހަރުގެ މީހާކު ފުލުހުންގެ ބެލުމުގެ ދަށަށް ގެެންގޮސްފައިވާ އިރު މި އޮޕަރޭޝަނަކީ އައްޑޫގައި ދުއްވާ "ރަންދޫ" ބޯޓުން މަސްތުވާތަކެތި ގެންނަކަމަށް ފުލުހުންގެ އިންޓެލިޖެންސަށް ލިބުނު މަޢުލޫމާތަކާ ގުޅިގެން ހިންގި އޮޕަރޭޝަނެކެވެ.
މި އޮޕަރޭޝަނުގައި ކޯޓް އަމުރެއްގެ ދަށުން އެބޯޓް ބަލައިފާސްކޮށްފައިވާއިރު އެ ބޯޓް ތެރެއިން މަސްތުވާތަކެތި ކަމަށް ޝައްކު ކުރެވޭ އެއްޗެއްހުރި ދެ ޖޫސްޕެޓީ ކޮތަޅު ފެނިފައިވެ އެވެ. އަދި މި މައްސަލާގައި ފުލުހުންގެ ބެލުމުގެ ދަށަށް ގެންދިޔަ މީހާގެ ބަންދާ މެދު ކޯޓަށް ހާޒިރު ކުރުމުން ވަނީ 7 ދުވަހުގެ މުއްދަތެއް ދީފަ އެވެ.