ރާއްޖެ ޓީވީގެ ކުރީގެ ނޫސްވެރިޔާ އާލާ އިބްރާހިމް ރަޝީދު، ރޭޕްގެ މައްސަލައެއް ގެނެސްދިނުމުގައި މީހެއްގެ އަބުރަށް އަރާފައިވާ ކަމަށް ބުނެ މޯލްޑިވްސް ބްރޯޑްކާސްޓިން ކޮމިޝަނުން 50،000 ރުފިޔާ އިން ކުރި ޖޫރިމަނާގެ ފައިސާ ދެއްކުމަށް އަނެއްކާވެސް އަންގައިފިއެވެ.
ހޯމަ ދުވަހު ބްރޯޑްކޮމް އިން އާލާއަށް ފޮނުވި ސިޓީއެއްގައި ބުނެފައިވަނީ އެ ކޮމިޝަނުން އާލާގެ މައްސަލަ މުރާޖައާ ކުރުމަށްފަހުގައިވެސް ކުރިން ނިންމި ނިންމުމަށް ބަދަލެއް ގެންނަން ޖެހޭ ކަމަށް ނުފެނޭ ކަމަށެވެ.
ބްރޯޑްކޮމް އިން މައްސަލަ މުރާޖައާ ކުރުމަށް ނިންމާފައިވަނީ އާލާގެ ފަރާތުން މައްސަލައަށް ޖަވާބުދާރީވުމަށް ފުރުސަތު ދީފައިނުވާ ކަމަށްބުނެ މައްސަލަ ހުށައެޅުމުންނެވެ. އާލާ ބުނެފައިވަނީ ބްރޯޑްކޮމްއިން ދައްކަން އެންގި ފައިސާއަކީ އޭނާ ދައްކަން ޖެހޭ ފައިސާއެއް ކަމަށް ގަބޫލުނުކުރެވޭ ކަމަށެވެ. އެހެން ނަމަވެސް ފައިސާ ދެއްކުމަށް އަންގާފައިވާ މުއްދަތުގެ ތެރޭގައި ނުދައްކައިފިނަމަ ޖަލު ހުކުމެއް އަންނާނެތީ އެފައިސާ ދެއްކުމަށް މަސައްކަތް ކުރާނެ ކަމަށެވެ.
އާލާ ޖޫރިމަނާކުރުމަށް ނިންމާފައިވަނީ އަބުރު ރައްކާތެރިކޮށްދިނުމާއި، ޚިޔާލު ފާޅުކުރުމުގެ މިނިވަންކަމުގެ ޤާނޫނުގެ 10 ވަނަ މާއްދާއާ ޚިލާފުވެ، ރޭޕްގެ މައްސަލައަކާއި ގުޅޭގޮތުން ލިޔުނު ޚަބަރެއްގެ ސަބަބުންނެވެ. 18 ޖޫން އިން ފެށިގެން 30 ދުވަހުގެ ތެރޭގައި ޖޫރިމަނާގެ ފައިސާދެއްކުމަށް އާލާގެ މައްޗަށްވަނީ އަމުރުކޮށްފައެވެ. އާލާ ލިޔުނު ހަބަރުގައި މީހެއްގެ ނަން އާއްމުކޮށްފައިވުމުން، އެނަން އާއްމުކުރެވުނު މީހާގެ އަބުރަށް ގެއްލުން ލިބިފައިވާކަމަށް މޯލްޑިވްސް ބްރޯޑްކާސްޓިން ކޮމިޝަނުން މި މައްސަލަ ނިންމި ގޮތުގެ ރިޕޯޓްގައިވެއެވެ.
ހަމައެހެންމެ، ރާއްޖެޓީވީއިން ވެސް 3 ގަޑިއެއްގައި މިހަބަރު ބްރޯޑްކާސްޓް ކުރުމުގެ ސަބަބުން މީގެ ކުރިން ރާއްޖެ ޓީވީވެސް ވަނީ 200،000ރ. އިން ޖޫރިމަނާކޮށްފައެވެ.
މިދިޔަ އޭޕްރީލް މަހުވެސް ރައީސް އަބްދުﷲ ޔާމީންގެ އަބުރަށް ގެއްލުންވާފަދަ ކޮންޓެންޓެއް ބްރޯޑްކާސްޓް ކުރުމުގެ ސަބަބުން، ރާއްޖެޓީވީ ވަނީ އެއްމިލިއަން ރުފިޔާއިން ޖޫރިމަނާކޮށްފައެވެ. މީގެ އިތުރުން، އަބުރު ރައްކާތެރިކޮށްދިނުމާއި، ޚިޔާލު ފާޅުކުރުމުގެ މިނިވަންކަމުގެ ޤާނޫނާ ޚިލާފުވުމުގެ ސަބުބުން ރާއްޖެ ޓީވީއާއި ގުޅޭ ގިނަ މައްސަލަތަކެއް ބްރޯޑްކާސްޓިން ކޮމިޝަނަށް ވަނީ ހުށައެޅިފައެވެ.