ހިތަދޫގައި އިމާރާތްކޮށްފައިވާ ފްލެޓްތައް ހަވާލު ކުރާނެ ކަމަށް އެކި ފަހަރު މަތިން ބުނެފައި ވިޔަސް، އެކަން ވަރަށް ބޮޑަށް ދިގުލައިގެން ގޮސްފައި ވަނިކޮށް ކުރިއަށް އޮތް ފިތުރު އީދި ބަންދަށް ފަހު، ފްލެޓްތައް ހަވާލު ކުރާނެ ކަމަށް ހައުސިން މިނިސްޓްރީން ބުނެފި އެވެ.
އެ މިނިސްޓްރީގެ އޮފިޝަލަކު މިއަދު ވިދާޅުވީ ފްލެޓްތައް ހަވާލު ކުރުމަށް ވާން ޖެހޭ ހުރިހާ ތައްޔާރީތަކެއް މިހާރުވެފައިވާ ކަމަށެވެ.
"އެހެންވީމާ ދެން ލަސްތަކެއް ނުކޮށް ކުރިއަށް މި އޮތް އީދު ބަންދު ނިންމާފައި އޮފީސްތައް ހުޅުވުމާ އެކު، އަޅުގަނޑުމެން ހިތަދޫގެ ފްލެޓްތައްް ލިބޭ ފަރާތްތަކާ އެ ތަންތަން ހަވާލު ކުރާނަން،" އޭނާ ވިދާޅުވި އެވެ.
ހިތަދޫގައި ހަދާފައިވާ 264 ފްލެޓަށް ކުރިމަތިލާން މިދިޔަ އަހަރުގެ މެއި މަހުގެ ތެރޭގައި ހުޅުވާލުން 585 ފަރާތަކުން ކުރިމަތިލާފައިވެ އެވެ.
އައްޑޫގެ ގުޅިފައިވާ އަވަށްތަކުގެ ރައްޔިތުންނަށް ހާއްސަކޮށްގެން ހިތަދޫގައި ހެދި ފްލެޓްތަކަށް ހުށަހެޅި ފޯމްތަކުގެ އިވެލުއޭޝަން ވެސް މިހާރު އެއްކޮށް ނިމިފައިވާ ކަމަށް މިނިސްޓްރީން ބުންޏެވެ.
މި ފްލެޓްތަކަށް ޑައުންޕޭމަންޓްގެ ގޮތުގައި 25،000ރ. އަދި މަހު ކުލީގެ ގޮތުގައި 3،000ރ. ދައްކަން ޖެހެ އެވެ.