އިންޖީނުތަކަށް މައްސަލަ ޖެހިގެން އައްޑޫގެ ގުޅިފައިވާ އަވަށްތަކުން ކަރަންޓް ކަނޑަން ޖެހޭ މައްސަލަ އަށް ދާއިމީ ހައްލެއް ހޯދުމަށް ފެނަކަ ކޯޕަރޭޝަނުން އައްޑޫގެ މަރުކަޒީ އިންޖީނުގެ އަށް ގެނެސްފައިވާ ދެ މެގަ ވޯޓުގެ ދެ ޖަނަރޭޓަރުގެ ހިދުމަތް އަންނަ މަހު ލިބޭނެ ކަމަށް ފެނަކަ ކޯޕަރޭޝަނުން ބުނެފި އެވެ.
ފެނަކަ ކޯޕަރޭޝަނުން ބުނީ އައްޑު އަށް ގެނެސްފައިވާ ދެ ޖަނަރޭޓަރު އިންސްޓޯލް ކުރުމުގެ މަސައްކަތް ބާރު ސްޕީޑެއްގައި ކުރިއަށްދާ ކަމަށާއި ލަސް ވަނީ އިންޖީނުގެ ކޫލިން ސިސްޓަމް ހެދުމަށް ވަގުތު ނަގާތީ ކަމަށެވެ.
ނަމަވެސް އެ މަސައްކަތް ވެސް މިހާރު ކުރިއަށްދާ ކަމަށް ފެނަކަ އިން ބުންޏެވެ.
ޗައިނާ އިން ރާއްޖެ ގެނައި ދެ އިންޖީނު ބެހެއްޓުމަށްޓަކައި އިންޖީނު ސަޕްލައި ކުރި ކުންފުނީގެ ބަޔަކު އަންނަ ޖުލައި މަހު އައްޑު އަށް އައުމަށް ހަމަޖެހިފައިވާ ކަމަށް ވެސް އެ ކުންފުނިން ބުންޏެވެ.
"އައްޑޫލައިވް" އަށް މައުލޫމާތު ލިބިފައިވާ ގޮތުގައި އިންޖީނު ބެހެއްޓުން ލަސްވީ ކޫލިން ސިސްޓަމް ގާއިމް ކުރުމަށް ހަވާލުވި ކުންފުނިން މަސައްކަތް ކަނޑައެޅި މުއްދަތަށް ނުނިންމުމުންނެވެ.
އައްޑޫގެ ކަރަންޓަށް މެދުވެރިވާ މައްސަލަތައް ހައްލު ކުރުމަށް 2015 ވަނަ އަހަރު ގެނައި 2 މެގަ ވޮޓްގެ އިންޖީނުތައް ވަނީ މިނިވަން 50 އަށް މާލެ ގެންގޮސް ފައެވެ.
އޭގެ ފަހުން އަނެއްކާ ވެސް ދެ މެގަ ވޯޓުގެ ދެ ޖަނަރޭޓަރު އައްޑު އަށް ގެނައި ފަހުން ވެސް އަހަރު ދުވަސްވީ އެވެ. ކަރަންޓްގެ މައްސަލަ އަށް ހައްލެއް ނުލިބި މިހާރު ވެސް ދޭތެރެ ދޭތެރެއިން ކަރަންޓް ކަނޑާލަން ޖެހެއެވެ.