އައްޑޫ ސިޓީ ކައުންސިލާއި ހިތަދޫ ސްކޫލާ ދެމެދު މެމޮރަންޑަމް އޮފް އަންޑަސްޓޭންޑިން (އެމްއޯޔޫ) އެއްގައި މިއަދު ސޮއިކޮށްފި އެވެ.
އެޑިއުކޭޝަން މިނިސްޓްރީން ސްކޫލްތަކުގެ ދަރިވަރުންނަށް ހިންގާ "ދަސްވާރު" ޕްރޮގްރާމާއި ކައުންސިލްގެ އިންޓަންޝިޕްގެ ޕްރޮގްރާމްގެ ދަށުން އެމްޔޫގައި ކައުންސިލްގެ ފަރާތުން ސޮއި ކުރެއްވީ އައްޑޫ މޭޔަރު އަބްދުﷲ ސޯދިގް (ސޯބެ) އެވެ.
ހިތަދޫ ސްކޫލްގެ ފަރާތުން ސޮއި ކުރެއްވީ އެ ސްކޫލްގެ ޑެޕިއުޓީ ޕްރިންސިޕަލް އައިމިނަތު އަދާލާ އެވެ.
އައްޑޫ ސިޓީ ކައުންސިލުން ބުނީ ހިތަދޫ ސްކޫލާ އެކު ވެވުނު އެއްބަސްވުމުގެ ދަށުން، އެ ސްކޫލްގައި "ދަސްވާރު" ޕްރޮގްރާމް ފުރިހަމަ ކުރާ ދަރިވަރުން ކައުންސިލް އޮފީސްތަކުގައި އިދާރީ ހިންގުމުގެ ތަޖުރިބާ ވަކި މުއްދަތަަކަށް ހޯދައި ދިނުމުގެ މަސައްކަތް ކައުންސިލުން ކުރާނެ ކަމަށެވެ.
ޕްރޮގްރާމް ކުރިއަށްދާ އިރު، ތަޖުރިބާ ހޯދަން އޮފީސްތަކުގައި މަސައްކަތް ކުރާ ދަރިވަރުންނަށް އެހީތެރިކަން ފޯރުކޮށް ދީ، އެ މީހުން މޮނިޓަ ކުރަން ހާއްސަ މީހަކު އޮފީސްތަކުން ކަނޑައަޅާފައި ހުންނާނެ އެވެ.
ކައުންސިލުން މީގެ ކުރިން ވަނީ ފޭދޫ ސްކޫލާއި މަރަދޫ އިރުޝާދިއްޔާ ސްކޫލާ އެކު "ދަސްވާރު" ޕްރޮގްރާމް ހިންގަން އެހީތެރުވުމުގައި އެމްއޯޔޫ ހަދައިފަ އެވެ.