މި އައްޑޫގައި ފުލުހުން ކުރިއަށް ގެންދާ "ދިވިލި މަތަ" ޓްރެފިކް ތިން ވަނަ އޮޕަރޭޝަނުގައި 312 އުޅަނދެއް ޗެކްކޮށްފައިވާ ކަމަށް ފުލުހުން ބުނެފި އެވެ.
ފުލުހުން ބުނީ ފޭދޫ، މަރަދޫފޭދޫ، މަރަދޫ، ހިތަދޫ، މީދޫ އަދި ހުޅުދޫގައި ޓްރެފިކް އޮޕަރޭޝަން ހިންގާފައިވާ އިރު މި އޮޕަރޭޝަނުގައި އެއްގަމު ދަތުރުފަތުރުގެ ޤާނޫނާއި ޤަވާއިދާ އެއްގޮތަށް ދުއްވާ އުޅަނދުތަކެއްތޯ ބަލާފައިވާ ކަމަށެވެ.
އެގޮތުން އޮޕަރޭޝަނުގައި ވެހިކަލް ޗެކްޕޮއިންޓްތައް ޤާއިމްކޮށް އުޅަނދުތަކުގެ އަހަރީ ފީ އާއި އިންސްއަރެންސާއި ރޯޑްވާދިނަސް ގެ މުއްދަތު ހަމަވެފައިވޭތޯ އާއި ސްޓިކާ ހަރުކޮށްފައި ހުރިތޯ ބެލުމުގެ އިތުރުން ޓްރެފިކާ ގުޅުންހުރި އެހެން ވައިލޭޝަންތައް ބަލާފައިވެ އެވެ.
އޮޕަރޭޝަނުގައި 312 އުޅަނދެއް ބަލައިފާސް ކުރި އިރު ޤަވާއިދާ ޚިލާފު ހަ ފަރާތަކާ މެދު ފިޔަވަޅު އަޅާފައިވެ އެވެ.
އައްޑޫގައި ކުރިއަށް ގެންދިޔަ "ދިވިލި މަތަ" އޮޕަރޭޝަނަކީ އައްޑޫ ސިޓީ ޕޮލިހުން ސިލްސިލާކޮށް އައްޑޫގެ ހުރިހާ ރަށެއްގައި ހިންގާ އޮޕަރޭޝަނެކެވެ.
އެގޮތުން މިދިޔަ މެއި މަހު 31 ވަނަ ދުވަހު ހިންގި މި އޮޕަރޭޝަނުގައި 492 އުޅަނދެއް ބަލައިފާސްކޮށް ޤަވާއިދާ ޚިލާފު 11 ފަރާތަކާ މެދު ފިޔަވަޅު އަޅާފައިވެ އެވެ.