ފޭދޫ ސްކޫލް ޓީމެއް ތަޖުރިބާ ދަތުރެއްގައި ބ. އަތޮޅަށް އިއްޔެ ހިނގައްޖެ އެވެ.
މި ދަތުރުގައި ބައިވެރި ވަނީ އެ ސްކޫލްގެ 15 ދަރިވަރަކާއި ހަތަރު ޓީޗަރަކެވެ.
ފޭދޫ ސްކޫލުން ބުނީ ތަޖުރިބާ ދަތުރުގައި ދިޔައީ ބީ ޓެކް އާޓް އެންޑް ޑޒައިންގެ ހަތް ދަރިވަރަކާއި ސްކޫލު މީޑިއާ ގުރޫޕްގެ ހަ ދަރިވަރުންގެ އިތުރުން ދެ ބެލެނިވެރިންނެވެ.
ބ. އަތޮޅަޑް ކުރާ ދަތުރުގެ ބޭނުމަކީ ބީޓެކް އާޓް އެންޑް ޑިޒައިން ހަދާ ދަރިވަރުންގެ އެސައިންމެންޓް ހެދުމަށް ބޭނުންވާ މައުލޫމާތުގެ އަމަލީ ތަޖުރިބާ ހޯދުމެވެ.
ފޭދޫ ސްކޫލުން ބުނީ ބ. އަތޮޅަށް ދާން ނިންމީ އެ އަތޮޅަކީ ދަރިވަރުން އެސައިންމެންޓް ހަދަން ބޭނުންވާ ތަފާތު މަސައްކަތްތެރިކަމުގެ މައުލޫމާތު އެއް ތަނަކުން ލިބޭނެ އަތޮޅަކަށްވާތީ ކަމަށެވެ.
އެގޮތުން ބ. އަތޮޅުގެ ރަށްތަކުގެ ތެރެއިން ކިހާދޫ، ތުޅާދޫ، ދަރަވަންދޫ، ކުޑަރިކިލު، އޭދަފުށި އަދި ސޮނެވާފުއްޓަށް ޒިޔާރަތް ކުރަން ހަމަޖެހިފައިވެ އެވެ.
ފޭދޫ ސްކޫލުން ބުނީ ޒިޔާރަތް ކުރާ ކޮންމެ ރަށަކުން ވެސް ތަފާތު މަސައްކަތްތެރިންނާއި ދަރިވަރުންނާ ބައްދަލު ކުރާނެ ކަމަށެވެ.
ހަތަރު ދުވަހަށް ބ. އަތޮޅަށް ކުރާ ދަތުރު ނިންމާލާފައި ފޭދޫ ސްކޫލް ޓީމް އައްޑު އަށް އަންނާނީ މި މަހުގެ 30 ގަ އެވެ.