ކެއުމުގެ އާދަތައް ބަހައްޓަންވީ ކިހިނެއް ހެއްޔެވެ؟ ބޮޑު ކަންބޮޑުވުމެކެވެ. މާ ގިނައިން ކައިފި ނަމަ ފަލަވެދާނެތީ ކާކަށް ނުކެރެ އެވެ. މާ މަދުން ކައިފި ނަމަ އެ ވެސް ވަނީ މައްސަލައަކަށެވެ. އެހެންވެ ރަނގަޅު ގޮތަކީ ކޮބައިތީ ހޯދުން ވެސް ބުއްދިވެރި އެވެެ.
ދުޅަހެޔޮ ސިއްހަތެއްހައި ހުންނަން ބޭނުން ނަމަ ކެއުމުގެ އާދަތައް ތަރުތީބަކުން އުސޫލެއްގެ ދަށުން ކުރިއަށް ގެންދިއުމަކީ މުހިއްމު ކަމެކެވެ. އެހެން ނުވެއްޖެ ނަމަ ނިކުންނާނެ މައްސަލަތައް ގިނަ އެވެ.
1. އަބަދު ވަރުބަލިވެފައި ހުރުން
ވަރުބަލިވުމަށް މެދުވެރިވާ އެންމެ ބޮޑު އެއް ސަބަބަކީ މާ މަދުން ކެއުމެވެ. ބަރުދަން ލުއިކުރުމަށް ބޭނުންކުރާ ޑައިޓް ޕްލޭންތަކުގައި ވަރަށް ގިނައިން ކެލޮރީސް މަދުކުރުމަށް އިރުޝާދު ދީފައިވެއެވެ. އޭގެ ސަބަބުން ހަށިގަނޑަށް ބޭނުންވާ މިންވަރަށްވުރެ މަދުން ކެވޭގޮތް ވެއެވެ. އޭގެ ނަތީޖާއެއްގެ ގޮތުން މެޓަބޮލިޒަމް ރޭޓް ދަށްވެ، ބޭނުންވާ މިންވަރަށް ހަކަތަ ނުލިބުމުގެ ސަބަބުން ވަރުބަލިކަން އިހުސާސް ކުރެވެއެވެ.
2. އަބަދު ބަނޑުހައިވެފައި ހުރުން
މާ އަވަސް އަވަހަށް ބަނޑުހައިވާނަމަ، އޭގެ މާނައަކީ ބޭނުންވާ މިންވަރަށްވުރެ މަދުން ހަށިގަނޑަށް ކެލޮރީސް ލިބޭކަމެވެ. ވަރަށް ގިނަ ދިރާސާތަކުން ދައްކާފައިވާ ގޮތުގައި މެޓަބޮލިޒަމް އަވަސްވުމުގެ ސަބަބުން ގިނައިން ބަނޑުހައިވާނެ އެވެ. އެހެންކަމުން ވިސްނަން ޖެހޭ ކަމަކީ ހަށިގަނޑަށް ބޭނުންވާ މިންވަރަށްވުރެ މަދުން ކެއުމަކީ ހަށިގަނޑަށް ލިބޭ ކެލޮރީސް މަދުވާ ކަމެކެވެ. އޭގެ ސަބަބުން ގިނައިން ބަނޑުހައިވާނެ އެވެ.
3. އިސްތަށި ފޭބުން
މަދުން ކެއުމުގެ އެންމެ ބޮޑު އެއް މައްސަލައަކީ ބޮލުން އިސްތަށި ފޭބުމެވެ. ޤުދުރަތީ ގޮތުން އިސްތަށިގަނޑު ބޮޑުވެ، ރީތިކޮށް ހުރުމަށްޓަކައި ރަނގަޅު ނިއުޓްރިޝަން ބޭނުންވެއެވެ. ބަރުދަން ލުއިކުރުމަށްޓަކައި ބޮޑެތި ޑައިޓް ކުރުމުގެ ސަބަބުން ހަށިގަނޑަށް ލިބޭ ކާނާ މަދުވެ، އިސްތަށި ފައިބަން ފަށައެވެ. އަދި ހަމަ އެހެންމެ އިސްތަށީގައި ހުންނަ ޤުދުރަތީ އޮމާންކަން ވެސް ގެއްލެއެވެ.
4. ނިދުމުގައި އުނދަގޫތައް ދިމާވުން
ޑައިޓް ކުރުމުގެ ސަބަބުން ނިދުމުގައި އުނދަގޫތައް ކުރިމަތިވެއެވެ. އޭގެ ސަބަބުން ހެނދުނު ހޭލާއިރު އެއްވެސް ތާޒާކަމެއް ނުހުރެއެވެ. ހެނދުނު ހޭލާއިރު ވަރުބަލި ނުވަތަ ކަންނެތް ވެފައި ހުންނަނަމަ، ޑައިޓްގައި ދުޅަހެޔޮ ކާނާތައް ހިމެނޭ މިންވަރު އިތުރު ކުރާށެވެ.
5. އަބަދު ރުޅިއައިސްފައި ހުރުން
ސިކުނޑިއަށް މަސައްކަތް ކުރުމަށްޓަކައި ހަކަތަ ބޭނުންވެއެވެ. ހަށިގަނޑު ރަނގަޅަށް މަސައްކަތް ކުރާނީ ބޭނުންވާ މިންވަރަށް ރަނގަޅު ނިއުޓްރިއެންޓްތައް ލިބުމުންނެވެ. އަބަދު ނުތަނަވަސްވެފައި ނުވަތަ ރުޅިއައިސްފައި ހުންނަނަމަ، އެއީ މާ މަދުން ކެއެމުން ދިމާވާ ކަމަކަށް ވެދާނެއެވެ. އެހެންކަމުން ކަސްރަތު ކުރުމާއި އެކީ ހަށިގަނޑަށް ބޭނުންވާ މިންވަރަށް ކާނާ އާއި ފެން ބުއިމަކީ މި އުނދަގޫތަކުން ދުރުހެލިކޮށްދޭނެ ކަމެކެވެ.
6. އަބަދު މާބޮޑަށް ފިނިވުން
ބައެއް ފަހަރު ހަށިގަނޑަށް ކެލޮރީސް ލިބޭ މިންވަރު މަދުނަމަ، ހަށިގަނޑުގެ ޤުދުރަތީ ފިނިހޫނުމިން ދަށަށް ދެއެވެ. އެހެންކަމުން އެހެން މީހުން ދާހިތްލާ ހޫނުވެގެން އުޅޭ ވަގުތުތަކުގައިވެސް، އަމިއްލައަށް މާބޮޑަށް ފިނިކަން އިހުސާސް ކުރެވޭނަމަ، ކެއުންބުއިމުގެ އާދަތަކަށް ހެޔޮ ބަދަލުތަކެއް ގެންނާށެވެ.
7. ބަނޑު ހަރުވުން ނުވަތަ ހަޖަމުގެ މައްސަލަތައް ޖެހުން
ބަރުދަން ލުއިކުރުމުގެ މަސައްކަތް ކުރާ މީހުންނާއި އާންމުކޮށްވެސް މަދުން ކެވޭ މީހުންނަށް ދިމާވާ އެންމެ ބޮޑު އެއް މައްސަލައަކީ ބަނޑުހަރުވުމުގެ މައްސަލައެވެ. ހަށިގަނޑުން ބޮޑުކަމުދާތަކެތި ބޭނުންކުރުމަށްޓަކައި ފައިބާ ބޭނުންވެއެވެ. އެހެންކަމުން ހަށިގަނޑަށް ކާނާ ލިބޭ މިންވަރު ލިމިޓް ކުރުމަކީ ހަޖަމު ކުރުމުގައި މައްސަލަތައް ކުރިމަތިކުރުވާނެ ކަމެކެވެ. ހަޖަމް ކުރުމުގެ ނިޒާމް ދުޅަހެޔޮކަން މަތީ ބެހެއްޓުމަށްޓަކައި ހަށިގަނޑަށް ބޭނުންވާ މިންވަރަށް ކެއުމަކީ ވަރަށް މުހިންމު ކަމެކެވެ.
8. މާ އަވަހަށް މޫޑް ބަދަލުވުން
ޑިޕްރެޝަން، އެންޒައިޓީ އަދި ހިތާމަވެރިކަމަކީ ބޮޑެތި ޑައިޓްތައް ކުރާ މީހުންނަށް ކުރިމަތިވާ ބައެއް ކަންތައްތަކެވެ. އެފަދަ ޑައިޓްތައް ކޮށްގެން ބޭނުންވާ ކަހަލަ ހަށިގަނޑެއް ލިބިދާނެ އެވެ. އެހެންނަމަވެސް، އުފާވެރިކަން ނުލިބިދާނެ އެވެ. މާ މަދުން ކެލޮރީސް ހުންނަ އެއްޗެހި ކެއުމަކީ މީހާގެ މޫޑަށް ވަރަށް އަވަސް އަދި ވަރަށް އާންމު ބަދަލުތައް ގެނެސްދޭ ކަމެކެވެ.