ރާއްޖޭގެ ކޮންމެ ރަށެއްގައި ކަރަންޓު ކެނޑުން ހައްލުކުރުމަށް ބެކަޕް ޖެނެރޭޓަރު ބެހެއްޓުމަށް ނިންމައި އެކަމުގެ މަސައްކަތް ކުރަމުންދާ ކަމަށް ފެނަކަ ކޯޕަރޭޝަންގެ މެނެޖިން ޑިރެކްޓަރު އަހުމަދު ޝަރީފް ވިދާޅުވެއްޖެ އެވެ.
އޭނާ މިހެން ވިދާޅުވީ އިއްޔެ ރ. އަލިފުށިން ކަރަންޓު ކެނޑި އެރަށުގެ ރައްޔިތުންނަށް ދަތިތަކެއް ކުރިމަތިލާން ޖެހުމާ ދިމާކޮށެވެ.
އަލިފުށީގައި ބޭނުން ކުރި ޖެނެރޭޓަރަށް ދިމާވި މައްސަލައަކާއި ގުޅިގެން އިއްޔެ ހެނދުނު 10:30 އެހާކަށްހާއިރު މުޅި ރަށުން ކަރަންޓު ކެނޑުމަށްފަހު ރޭގެ އަނިދިރިކަން ވެރިވިއިރުވެސް އެރަށަށް ކަރަންޓު ލިބިފައެއް ނުވެއެވެ.
މީގެ އިތުރުން ގދ. ނަޑެއްލާއަށްވެސް އިއްޔެ ކަރަންޓު ކެނޑުމުގެ ދަތިކަން ކުރިމަތިވެގެން ގޮސްފައިވެއެވެ. އިއްޔެ މެންދުރު ނަޑެއްލާއިން ކަރަންޓު ކެނޑި ރަށުގެ ރައްޔިތުންނަށް ވަނީ އެތައް ދަތިތަކެއް ކުރިމަތިވެފައެވެ.
ރާއްޖޭގެ އެކި ރަށްރަށުގައި ދޭތެރެ ދޭތެރެއިން ކަރަންޓު ކެނޑުމުގެ މައްސަލަ ދިމާވެއެވެ. ބައެއް ފަހަރު އެތައް ގަޑިއިރެއް ވަންދެންވެސް ކަރަންޓާއި ނުލާ ރައްޔިތުން ތިބެން ޖެހެއެވެ.
މިމައްސަލަ ހައްލުކުރުމާއި ބެހޭގޮތުން ފެނަކަ ކޯޕަރޭޝަނުގެ އެމްޑީ ރާއްޖެ އެމްވީއަށް ދެއްވި ބަސްދީގަތުމެއްގައި ވިދާޅުވެފައިވަނީ ކޮންމެ ރަށެއްގައިވެސް ބެކަޕް ޖެނެރޭޓަރު ސިސްޓަމެއް ގާއިމްކުރުމަށް ނިންމާފައިވާ ކަމަށެވެ. ޝަރީފް ވިދާޅުވީ އިންޖީނުތަކަކީ މައްސަލަ ދިމާވާ އެއްޗެއް ކަމަށާއި އެކަމަށް އޮތް ހައްލަކީ ބެކަޕް ޖެނެރޭޓަރު ގާއިމް ކުރުން ކަމަށެވެ.
ޝަރީފް އިތުރަށް ވިދާޅުވެފައިވަނީ މިހާރު އެކުންފުނިން ބަލަމުންދަނީ މިއަހަރުގެ ނިޔަލަށް ރާއްޖޭގެ ކޮންމެ ރަށެއްގައިވެސް ބެކަޕް ޖެނެރޭޓަރެއް ބެހެއްޓުމަށެވެ.