މިހާރު އިންޑިއާގައި ދިރިއުޅޭ ޕާކިސްތާންގެ ލަވަ ކިޔުންތެރިޔާ އަދުދާން ސާމީ ކުޅޭ ފުރަތަމަ ފިލްމް "އަފްގާން: އިން ސާޗް އޮފް އަ ހޯމް" ގެ ޕޯސްޓަރު ދައްކާލައިފި އެވެ.
ރީތި އެތައް ލަވަތަކެއް އެހުންތެރިންނާ ހަމައަށް ގެނެސް ދީފައިވާ މި ފިލްމަކީ އޭނާގެ ކުޅޭ ފުރަތަމަ ފިލްމެވެ.
"އަފްގާން" އަކީ ރާދިކާ ރާއޯ ވިނޭ ސަޕްރޫ ޑައިރެޓް ކުރާ ފިލްމެކެވެ. އެ ދެ މީހުން މީގެ ކުރިން ޑައިރެކްޓްކޮށްފައިވާ ފިލްމުތަކުގެ ތެރޭގައި ސަލްމާން ހާންގެ "ލަކީ: ނޯ ޓައިމް ފޯ ލަވް" އާއި "ސަނަމް ތޭރީ ކަސަމް" ހިމެނެ އެވެ.
"އަފްގާން" އަކީ ލަވަ ކިޔުންތެރިއެއްގެ ވާހަކަ ކިޔައިދޭ އަސަރު ގަދަ ފިލްމެކެވެ.
ފިލްމުގެ މަސައްކަތް މިހާރު ކުރިއަށްދާ އިރު، ފިލްމާ ބެހޭ މާ ބޮޑު ތަފުސީލެއް އަދި ހާމަކޮށްފައެއް ނުވެ އެވެ. އެހެންވެ މީގެ ކާސްޓުންގެ ތެރޭގައި ދެން އުޅެނީ ކޮން ބައެއް ކަމެއް ނޭނގެ އެވެ.
މިހާރު ވަރަށް ފިޓް ހަށިގަނޑެއްގެ ވެރި އަދުނާން އަލަށް ފިލްމެއް ކުޅުނަސް އޭނާއަކީ އެކްޓިން އަށް އާ މީހަކަށް ނުވާނެ އެވެ.
ކުރިން ވަރަށް ފަލަކޮށް އޭނާ ހުރި ދުވަސްވަރު ކިޔާފައިވާ ބައެއް ލަވަތަކުގެ ވީޑިއޯ ބޮލީވުޑްގެ މަޝްހޫރު ބައެއް ތަރިންނާ އެކު އަދުނާން ވަނީ ކުޅެފަ އެވެ.
"އަފްގާން" ސިނަމާތަކަށް އަންނާނީ އަންނަ އަހަރު އެވެ.