ކުރީ ރައީސް މުހައްމަދު ނަޝީދު އެމްޑީޕީ ހިސޯރުކޮށްފައިވާ ކަމަށް ވިދާޅު ކުރީގެ ހޯމް މިނިސްޓަރު އުމަރު ނަސީރު ދެއްކެވި ވާހަކަަތަކާ ގުޅިގެން ރައްޔިތުންގެ މަޖިލީހުގެ ގަމު ދާއިރާގެ މެމްބަރު ފައްޔާޒް އިސްމާއީލް އުމަރަށް ވަރަށް ބޮޑަށް ފާޑު ވިދާޅުވެއްޖެ އެވެ.
ރާއްޖެ ޓީވީގެ "ފަލަ ސުރުހީ" ގައި އޭނާ ވިދާޅުވީ އުމަރަކީ ސިޔާސީ ގޮތުން ދޮގު ހެއްދެވި ކަމަށް އަމިއްލަ އަށް އިއުތިރާފުވެފައިވާ ދޮގުވެރިއެއް ކަމަށާއި އެފަދަ މީހަކު ދައްކަވާ ވާހަކައެއްގައި އެއްވެސް ބުރަދަނެއް ނުހުންނާނެ ކަމަށވެ.
ފައްޔާޒު ވިދާޅުވީ، އުމަރު ނަސީރަށް މާ ބޮޑު ރައްދެއް ދެއްވަން ޖެހިވަޑައިގަންނަވާކަމަށް ގަބޫލު ނުކުރައްވާ ކަމަށާއި އެއީ "އެއްވެސް ބޭފުޅެއް ނޫން" ކަމަށެވެ.
"އަޅުގަނޑަށް އެކަން ސާފުވީ، އުމަރު ނަސީރު އަޅުގަނޑު ހަނދާން އެބަރުހި، އުމަރު ނަސީރު އިންނެވި ލޮނު ޒިޔާރަތްކޮޅު، ކުޑަޕާކްގެ އަރިމަތީ ގާގަނޑުގައި ބިލް ބޯޑެއް ހިފަހައްޓައިގެން، 50 އަހަރަށް ރިސޯޓު ވިއްކާލާތީ އިހްތިޖާޖު ކުރައްވަން،" އޭނާ ވިދާޅުވި އެވެ. "އުމަރު ނަސީރު ޕްރައިމަރީގައި ވިދާޅުވި، ރައީސް ޔާމީނަކީ މުޅި މި ރާއްޖޭގައި ހިނގާ ކްރިމިނަލް ސިކުޑިއޭ. ނާރޭ." ފައްޔާޒު ވިދާޅުވި އެވެ.
އޭނާ އަދި ވިދާޅުވީ ހޯމް މިނިސްޓަރުގެ ހައިސިއްޔަތުން އުމަރު ނަސީރު މަޖިލީހަށް ވަޑައިގެން ދުވަހެއްގައި ޕްރައިމަރީގައި ރައީސް ޔާމީނާ ގުޅޭ ގޮތުން ދެއްކެވި ވާހަކަތަކާ ގުޅޭ ގޮތުން ސުވާލު ކުރެއްވުމުން އެއީ ދޮގު ވާހަކަތަކެއް ކަމަށެވެ.
އެހެން ނަމަވެސް އެދުވަސްކޮޅު މިނިވަން އެހެން މީޑިއާއަކަށް ދެއްވި އިންޓަރވިއުއެއްގައި، އެ ވާހަކަތަކަކީ ސިޔާސީ ގޮތުން ދެއްކެވި ވާހަކައެއް ކަަމަށް އުމަރު ވިދާޅުވި ކަމަށާއި ސިޔާސީ ގޮތުން އެ ކަހަލަ ދޮގެއް ނުހެދޭނެ ކަމަށް ފައްޔާޒު ވިދާޅުވި އެވެ.
"ތިމަންނައާ އެކު ޕާޓީން ޕްރައިމަރީގައި ވާހަދަކުރާ މިހާއާ ގުޅޭ ގޮތުން އެފަދަ ދޮގެއް ނުހެދެނޭނެ. އެއީ ދޮގެއް ކަމަށްވާނަމަ، އެއަށްވުރެއް ބޮޑަށް ލާދީނީ ވެވޭނެތޯ؟" ފައްޔާޒު ވިދާޅުވި އެވެ.
އޭނާ އަދި ވިދާޅުވީ މިފަދަ ދޮގު ވާހަކަތައް ސިޔާސީ ވަކި މަޤުޞަދެއް ހާސިލް ކުރުމަށް ދައްކަވާ ބޭފުޅަކު، ސިޔާސީ ގޮތުން ކޮންމެފަދަ ވާހަކައެއްވެސް ދައްކަވާފާނެ ކަމާއިމެދު ޝައްކު ނުކުރައްވާ ކަމަށެެވެ.
ފައްޔާޒު ވިދާޅުވީ އެފަދަ ބޭފުޅަކަށް އެމްޑީޕީ ލާދީނީއޭ ނުވަތަ ހިޞޯރުކޮށްގެންނޭ ވިދާޅުވެ، ވާހަކަފުޅު ނުދެއްކެވޭނެ ކަމަށެވެ. ވިދާޅުވެފައެވެ.
އޭނާ ވިދާޅުވީ، ރައީސް ނަޝީދު އެޕާޓީގެ ލީޑަރަކަށް ހުންނަވަނީ އެ މަނިކުފާނު ބޭނުންފުޅުވެގެން ނޫން ކަމަށެވެ. އެހެން ނަމަވެސް އެއީ އެޕާޓީގެ މެންބަރުން ބޭނުންފުޅުވާ ގޮތް ކަމަށް ފައްޔާޒު ވިދާޅުވިއެވެ.
އެމްޑީޕީގެ މެންބަރުންގެ ތާއީދާއި ލޯބި، ރައީސް ނަޝީދަށް އެބައޮތް ކަމަށާއި ރައީސް ނަޝީދަށް އެ ލޯބި ލިބެނީ އެމަނިކުފާނު ކަންކަން ކުރައްވާ ގޮތް އެމްޑީޕީގެ މެންބަރުންނަށް ކަމުދާތީ ކަމަށް އޭނާ ވިދާޅުވިއެވެ.