މިއަހަރުގެ ޖޫން މަހުގެ 4 ވަނަ ދުވަހު ތިން މީހުންނާ އެކު އައްޑޫން މަހަށް ނިކުމެ އުޅެނިކޮށް ޑިންގީ ބަންޑުން ޖަހާލުމުގެ ސަބަބުން ސ.ހިތަދޫ އާބިން، މުހައްމަދު ސުމައިދު ގެއްލުނު ހާދިސާގެ ތަހުގީގު މާލެ އަށް ބަދަލުކުރަން ނިންމާފައިވާ ކަމަށް ފުލުހުން ބުނެފިއެވެ.
ސަދަން ޕޮލިސް ޑިވިޝަން ކޮމާންޑަރ ޗީފްއިންސްޕެކްޓަރއޮފް ޕޮލިސް އަލީ ޝަރީފް އެހެން މީޑިޔާއަކަށް ދެއްވި އިންޓަވިއު އެއްގައި ވިދާޅުވީ ސުމައިދު ހޯދުމުގެ މަސައްކަތް ފުލުހުން އަދިވެސް ހުއްޓާނުލައި ކުރިއަށް ގެންދާ ކަމަށެވެ.
ސުމައިދު ހޯދުމުގެ މަސައްކަތް ފުލުހުން ހުއްޓާނުލައި ކުރިއަށް ގެންދާއިރު އެ ސަރަހައްދުގެ އޮޔާއި ވައި ހުންނަ މިސްރާބަށް ބަލާފައި އޭނާ ފެނުމަކީ ވަރަށް ނާދިރުކަމެއް ކަމަށް އެމްއެންޑީއެފް ކޯސްޓްގާޑުން ވަނީ ބުނެފައެވެ.
ސުމެއިދުގެ މައްސަލައިގެ ތަހްގީގު މާލެ ބަދަލު ކުރިއިރު އެމައްސަލަ މިހާތަނަށް ތަހުގީގް ކުރަމުން ގެންގޮސްފައި ވަނީ މާލެއިން އައްޑޫ އަށް އައި ފުލުހުންގެ ހާއްސަ ޓީމަކުންނެވެ.
އެ މައްސަލައިގެ އިތުރު ތަހްގީގަށް އެލޯންޗް ވަނީ ފުލުހުންގެ ބެލުމުގެ ދަށުގައެވެ. ސުމެއިދު އާއި އިތުރު 2 މީހަކު ދަތުރު ކުރި ލޯންޗް "ބަންޑުން" ޖަހާލި ކަމަށް އެ ހާދިސާގައި ސަލާމަތްވި ހުސެއިން ސައީދު އާއި އަހުމަދު ނާއިފް ވަނީ ބުނެފައެވެ. އެހެން ނަމަވެސް ލޯންޗް ބަންޑުން ޖަހާލިކަން ޔަގީން ނުވާކަމަށް ފުލުހުން މީގެ ކުރިން ވަނީ ބުނެފައެވެ.
ޕޮލިސް ކޯޕްރަލް މުހައްމަދު ސުމައިދު ގެއްލުމާއި ގުޅިގެން ކަނޑާއި ވައިގެ މަގުން ސުމެއިދު ހޯދުމަށް ބޮޑު ސަރަހައްދެއް އެމްއެންޑީއެފްއިން ވަނީ ބަލާފައި ވީނަމަވެސް މިހާތަނަށް ސުމެއިދުގެ އެއްވެސް ހަބަރެއް ނުވެއެވެ.