ޕަބްލިކް ސާވިސް މީޑިއާ (ޕީއެސްއެމް) ގެ ދަށުން ހިންގާ ޓީވީއެމުން ބޭއްވި ގުރުއާން މުބާރާތުގެ "އެންމެ އަލިގަދަ ތަރި"އަކަށް ފ. ނިލަންދޫ ގްރީންހެވަން މުހައްމަދު އިސްމާއިލް ހޮވިއްޖެ އެވެ.
އެންމެ އަލިގަދަ ތަރީގެ ގޮތުގައި ހޮވުނު މުހައްމަދު އިސްމާއިލްއަށް ޓްރޮފީއާއި، ޕީއެސްއެމްއެމުން ދެއްވި ފަސްލައްކަ ރުފިޔާގެ ފައިސާގެ އިނާމް ހަވާލުކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން މެޑަމް ފާތުމަތު އިބްރާހިމެވެ.
އިސްލާމީ ޔުނިވަރސިޓީން ބޭނުންދާއިރާއަކުން މާސްޓާސް ހެދުމުގެ ފުރުސަތާއި، މޯލްޑިވްސް ހައްޖުކޯޕަރޭޝަނުން ހުށައަޅާފައިވާ އުމްރާ ދަތުރާއި، މޯލްޑިވިއަންގެ ފަރާތުން ޗެންނާއި ދެކޮޅު ޓިކެޓުވެސް އިސްމާއިލަށް ވަނީ ލިބިފައެވެ. މީގެ އިތުރުންވެސް އެހެނިހެން ފަރާތްތަކުން ހުށަހަޅާފައިވާ އަގުބޮޑު އިނާމުތަކެއް އޭނާއަށް ވަނީ ލިބިފައެވެ.
މުބާރާތުގެ ދެވަނައަށް ހޮވިފައިވަނީ ގ.ޖޫލިއަޓްގެ ފާތިމަތު މަލްދާ މުޙައްމަދެވެ. ތިން ވަނައަށް ހޮވިފައިވަނީ، ރ. ހުޅުދުއްފާރު، ނަސީމީގޭ ނަސްރަތު އިސްމާއީލްއެވެ.
އެންމެ އަލިގަދަ ތަރި މުބާރާތަކީ 2013 ވަނަ އަހަރުން ފެށިގެން ކޮންމެ އަހަރެއްގެ ރަމަޟާންމަހު ޕީއެސްއެމްއިން ބާއްވާ މުބާރާތެކެވެ.