ލާން ގެންގުޅޭ ބޫޓު ނުވަތަ ފައިވާން ސާފުތާހިރުކޮށް ގެންގުޅުމަކީ ވަރަށް މުހިއްމު ކަމެކެވެ. ކިތަންމެ ސާފުކޮށް ބެލެހެއްޓިޔަސް ބައެއް ފަހަރަށް ބޫޓުން ނުބައިވަސް ދުވަ އެވެ. އޭގެ ސަބަބުން ކަންބޮޑެވެ ބޭރަށްދާން ލަދުގަންނަ ފަހަރުވެސް މަދެއް ނޫނެވެ. ބޫޓުން ނުބައިވަސް ފިލުވައިލުމަށް ކުރެވިދާނެ ކަންކަން އެބަ ހުއްޓެވެ.
ފައިތިލަ ސާފުކޮށް ބެހެއްޓުން
އާއްމު ގޮތެއްގައި ބޫޓުން ނުބައިވަސް ދުވަނީ ފައިތިލައިން ހިއްލާ ދަލުގެ ސަބަބުންނެވެ. އެހެންކަމުން ބޭރުގައި އުޅޭއިރުވެސް ކޮންމެ ގަޑިއަކު އެއްފަހަރު ސެންޓު ޖަހާފައިވާ ތުވާލިކޮޅަކުން ފައިތިލަ ފޮހެލާށެވެ.
އަވީގައި ބޫޓޫ ބެހެއްޓުން
އަވިދޭ ދުވަހެއްނަމަ ބޭރުގައި އުޅެފައި ގެއަށް އައިސް ލައިގެން ހުންނަ ބޫޓު އަވީގައި ބަހައްޓާށެވެ. އޭރުން ދެން ބޫޓު ލާންވާއިރު ބޫޓުން އެއްވެސްކަހަލަ ނުބައި ވަހެއް ނުދުވާނެއެވެ.
"ފުޓް ބެޑް" ތެންމާލުން
ޖޯޑެއްގެ ތިންބައިކުޅަ އެއްބަޔަށް ވިނެގަރ އަދި ދެންހުރި ބަޔަށް ފެންއަޅާށެވެ. އެއަށްފަހު އެ ބޭނުންކޮށްގެން ބޫޓުގެ އެތެރޭގައި އޮންނަ "ފުޓް ބެޑް" ނަގާ ސްޕްރޭކޮށް ތެންމާލާނީއެވެ. އަވީގައި ބަހައްޓައިގެން ހިއްކާލުމުން ބޫޓުގައި ހަރުލާފައިވާ ނުބައިވަހެއް ކެނޑިދާނެއެވެ.
ވިނެގަރގެ ބަދަލުގައި ބޭގިންގް ސޮޑާ ބޭނުންކޮށްގެންވެސް މިކަން ކުރެވިދާނެއެވެ.
ބޭބީ ޕައުޑަރ
ބޫޓުގެ ތެރެއަށް ބޭބީ ޕައުޑަރ ކޮޅެއް އަޅާލުމުންވެސް ބޫޓުން ނުބައިވަސް ކެނޑިގެން ދާނެއެވެ. ބޭބީ ޕައުޑަރ ނޫނަސް ޖަރާސީމު ނައްތާލާފަދަ ކޮންމެ ޕައުޑަރ އެއްވެސް އެޅިދާނެއެވެ.
އޮރެންޖު ތޮށި
ބޫޓު ލައިގެން ނުހުންނަ ވަގުތުތަކުގައި ބޫޓުގެ ތެރެއަށް އޮރެންޖު ތޮށިކޮޅެއް އަޅާފައި ބަހައްޓާށެވެ. އޭރުން ދެން ބޫޓު ލާންވާއިރު ދުވާނީ ވަރަށް މީރު ވަހެކެވެ. އޮރެންޖު ތޮށީގެ ބަދަލުގައި ޑްރަޔަރ ޝީޓްވެސް ބޭނުން ކުރެވިދާނެއެވެ.
ބޫޓު ފްރިޖަށްލުން
އިސްވެދިޔަ ހުރިހާ ކަމެއް ކުރުމަށްފަހުވެސް ބޫޓުން ނުބައިވަސް ދުވާނަމަަ ބޫޓު ފްރިޖަށްލާށެވެ. ބޫޓު ފްރިޖަށްލާނީ ރަނގަޅަށް ބަންދުކުރެވޭފަދަ ކޮތަޅަކަށް ލުމަށް ފަހުގައެވެ. 12 ގަޑިއިރު ފަހުން ނަގާއިރު ބޫޓުގައި އެއްވެސް ކަހަލަ ނުބައިވަހެއް ނުދުވާނެއެވެ.