ގަން އެއާޕޯޓުން އަވަށްޓެރި ސްރީ ލަންކަން އެއާލައިންސް މެދުވެރިކޮށް ފުވައްމުލަކުން ދަތުރު ކުރާ މީހުންނަށް ހާއްސަކޮށްގެން އެ އެއާލައިނުން ލޯންޗް ދަތުރުގެ ހިދުމަތް ތައާރަފުކޮށްފި އެވެ.
އެ އެއާލައިންގެ ގަން އޭރިއާ މެނޭޖަރު ސުމަން ވިދާޅުވީ ކޮންމެ ހަފުތާއެއްގެ ހޯމަ ދުވަހާއި ބުރާސްފަތި ދުވަހު އޮންނަ ފްލައިޓަށް ހާއްސަކޮށްގެން ފުވައްމުލަކުން ފޭދު އަށް ލޯންޗްގެ ހިދުމަތް ލިބޭނެ ކަމަށެވެ.
އެގޮތުން ލޯންޗް ފުވައްމުލަކުން ފޭދޫ އަށް ފުރާނީ ހެނދުނު 6:00 ގަ އެވެ. އެއީ ގަޑިއެއްހާ އިރުގެ ދަތުރެކެވެ. އެ ފެރީގައި އައުމުން ހެނދުނު 9:05 ގައި ގަމުން ފުރާ ސްރީ ލަންކަން އެއާލައިންސްގެ ފްލައިޓުން ފުރޭނެ އެވެ.
ސްރީ ލަންކަން އެއާލައިންސުން އަދި ބުނީ އެ އެއާލައިނުން ދަތުރު ކުރާ ފުވައްމުލަކު މީހުންނަށް ފޭދޫން އެ ރަށަށް ފުރަން ހެނދުނު 10:00 ގައި ލޯންޗް ދަތުރު ހަމަޖެހިފައި އޮންނާނެ ކަމަށެވެ.
އެހެންވެ މިއީ ސްރީ ލަންކަން އިން ދަތުރު ކުރާ މަންޒިލްތަކަށް ފުވައްމުލަކު މީހުންނަށް ފަސޭހަކޮށް ދަތުރު ކުރެވޭނެ ގޮތެއް ކަމށް އެއާލައިނުން ބުންޏެވެ.
އެގޮތުން އިންޑިއާގެ ޓްރިވެންޑްރަމް، ޗެންނައި، ކޮޗިން، ބެންގަލޯރް، ބަންގްލަދޭޝްގެ ޑާކާ އަދި ކޮލޮމްބޯ ފަދަ މަންޒިލްތަކަށް ދަތުރު ކުރެވޭނެ އެވެ.