މި މަހުން ފެށިގެން ސްޓެލްކޯ އާއި ފެނަކައިންދޭ ކަރަންޓުގެ ހިދުމަތުގެ އަގު ހެޔޮކުރުމަށް ނިންމައިފިއެވެ.
ކަރަންޓުގެ އަގު ހެޔޮކުރުމަށް ނިންމާފައިވަނީ ތެލުން ނަގާ ޑިއުޓީ 10 އިންސައްތައިން ފަހެއް އިންސައްތައަށް ކުޑަ ކުރަން ނިންމުމާއި ގުޅިގެންނެވެ. އެންވަރަމެންޓް މިނިސްޓަރ ތޯރިގު އިބްރާހީމް މިއަދު ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ވިދާޅުވީ ސަރުކާރުން ކަރަންޓުގެ ހިދުމަތް ފޯރުކޮށްދޭ ކުންފުނިތަކަށް ކޮންމެ އަހަރަކު ލިބޭ އާމްދަނީގެ ގާތްގަނޑަކަށް 270 މިލިއަން ރުފިޔާ ރައްޔިތުންނަށް ލިބިގެންދާނެ ކަމަށެވެ.
މި ބައްދަލުވުމުގައި ސްޓެލްކޯއާއި ފެނަކައިން ވެސް ކަރަންޓުގެ ހިދުމަތުގެ އަގު ހެޔޮކުރުމަށް ނިންމިކަން ވަނީ އިއުލާން ކޮށްފައެވެ. ކަރަންޓުގެ އަގަށް ބަދަލު ގެނައުުމަށް ނިންމާފައި ވީނަމަވެސް ޓެރިފަށާއި ފިއުލް ސާޗާޖު ނަގާ ބޭންޑަށް އެއްވެސް ކަހަލަ ބަދަލެއް ގެނައުމަށް ނިންމާފައެއް ނުވެއެވެ.