ޗައިނާ ސަރުކާރުގެ ހިލޭ އެހީގެ ދަށުން ދިވެހި ފުލުހުންނަށް ހުޅުވާލައްވައިގެން ޗައިނާގައި ބާއްވަމުން އަންނަ "ޕޮލިސް އޮފިސާސް ކޮންފަރެންސް" ގައި މި އަހަރުވެސް ދިވެހި ފުލުހުންގެ ސީނިއާ 20 އޮފިސަރަކު ބައިވެރިވެއްޖެ އެވެ.
ޖޫން މަހުގެ 29 އން މި މަހުގެ 19 އަށް ޗައިނާގެ ޔުނާން ޕޮލިސް އޮފިސާސް އެކަޑެމީގައި ކުރިއަށްދާ މި ކޮންފަރެންސްއަކީ ޗައިނާ ފުލުހުންނާއި ދިވެހި ފުލުހުންގެ ދެމެދު އޮންނަ ގުޅުން އިތުރަށް ބަދަހި ކުރުމާއި ފުލުހުންގެ ދާއިރާއިން މަޢުލޫމާތު ބަދަލު ކުރުމާއި ޢަމަލީ ތަޖުރިބާ ހޯދުމުގެ މަޤުސަދުގައި 2015 ވަނަ އަހަރުން ފެށިގެން ދިވެހި ފުލުހުންނަށް ހުޅުވާލައިގެން ކުރިއަށް ގެންދާ ކޮންފަރެންސެކެވެ.
މި ކޮންފަރެންސްގައި ޗައިނާގެ ފުލުހުންގެ މަސައްކަތްތަކާއި ބެހޭ ގޮތުންނާއި އެތަނުގެ ޤާނޫނީ ނިޒާމާއި ޕޮލިސް ކޮމްބެޓް އެންޑް ކޮމާންޑް ފަދަ ބައިތަކާ ބެހޭ ގޮތުން މަޢުލޫމާތު ފޯރުކޮށް ދެވެ އެވެ.
މީގެ އިތުރުން ލީޑަޝިޕް އަދި މެނޭޖްމަންޓް ހުނަރުތައް ކުރިއެރުވުމުގެ ގޮތުން ސެޝަންތަކާއި ޑިސްކަޝަންސްތައް ބޭއްވުމުގެ އިތުރުން ވެސް އެޤައުމުގެ ތާރީޚާއި ސަޤާފަތާއިގުޅޭ މަޢުލޫ ބައިވެރިންނާއި ހިއްސާ ކުރެވެ އެވެ.
އެގޮތުން މި ކޮންފަރެންސްގައި ބައިވެރިވާ ދިވެހި ފުލުހުންގެ ވަފުދު ޗައިނާ ފުލުހުންގެ އެކި މަރުކަޒުތަކަށް ޒިޔާރަތްކޮށް އެތަންތަނުގެ ތަރައްޤީއަށާއި ކުރިއެރުމަށް ކުރަމުންދާ މަސައްކަތްތަކާއި ބެހޭ ގޮތުން ވެސް މަޢުލޫމާތު ފޯރުކޮށްދެވެ އެވެ.
ޗައިނާ ސަރުކާރުގެ ހިލޭ އެހީގެ ދަށުން ކުރިއަށް ގެންދާ މި ކޮންފަރެންސްގައި މިހާތަނަށް ދެ ފަހަރެއްގެ މަތިން ދިވެހި ފުލުހުންގެ ޓީމްތައް ބައިވެރިވެ ތަމްރީން ހޯދާފައިވެ އެވެ.
މި އަހަރުގެ ކޮންފަރެންސްގައި 20 އޮފިސަރުން ބައިވެރިވާ އިރު އޭގެ ތެރޭގައި ހަތަރު އަންހެން އޮފިސަރުން ވެސް ހިމެނެ އެވެ.