ކުރީގެ ރައީސް މައުމޫން އަބްދުލް ގައްޔޫމް ބައިވެރިވެވަޑައިގަންނަވާ އިދިކޮޅު ކޯލިޝަނުގެ ޖަލްސާއެއް މިރޭ ކުނޫޒުގައި ބާއްވުމަށް ހަމަޖައްސައިފި އެވެ.
މިއީ ރައީސް މައުމޫން އިދިކޮޅު ބޮޑު ޖަލްސާއެއްގައި ބައިވެރިވެވަޑައިގަންނަވާ ފުރަތަމަ ފަހަރެވެ. ރައީސް މައުމޫން ޖަލްސާގެ ބައިވެރިންނާ މުޚާތަބު ކުރައްވާނީ ވީޑިއޯ މެދުވެރިކޮށެވެ. ބައެއް މީޑިއާ ތަކުގައި ރިޕޯޓުކޮށްފައިވާ ގޮތުން ޖަލުގައި ހުކުމް ތަންފީޒު ކުރަމުންދާ އަދާލަތު ޕާޓީގެ ރައީސް ޝެއިހް އިމްރާން އަބްދުﷲގެ މެސެޖެއްވެސް މި ޖަލްސާގައި ހުށައެޅިގެން ދާނެެއެވެ.
މިރޭ މި ޖަލްސާ ބޭއްވުމަށް ހަމަޖެހިފައިވާއިރު މިއަދުގެ ވަގުތެއްގައި ރައްޔިތުންގެ މަޖިލީހުގެ ރައީސް އަބްދުﷲ މަސީހްގެ އިތުބާރު ނެތް ކަމުގެ މައްސަލަވެސް ވަނީ 45 މެމްބަރުންގެ ސޮޔާ އެކު ހުށައެޅިފައެވެ. މި މައްސަލާގައި ސަރުކާރަށް ނިސްބަތްވާ 10 މެންބަރުން ވަނީ ސޮއި ކުރައްވާފައެވެ.
45 މެމްބަރުންގެ ސޮޔާއި އެކު މަސީހު ބޭރުކުރުމަށް މަޖްލިސްއަށް ހުށަހަޅާފައިވާތީ ރައީސް މައުމޫން ވަނީ އިދިކޮޅު އިއްތިހާދުގެ ލީޑަރުންނަށް މަރުހަބާ ދަންނަވާ ޝުކުރު ދަންނަވާފައެވެ.