ކުރީގެ ނައިބު ރައީސް އަހްމަދު އަދީބު އަވަހާރަކޮށްލަން ރާވަމުންދާކަމުގެ މައުލޫމާތު ލިބިފައިވާ ކަމަށް އަދީބުގެ ގާނޫނީ ޓީމުން ވިދާޅުވެއްޖެ އެވެ.
އަދީބުގެ ޤާނޫނީ ޓީމުން މިހެން ވިދާޅުވީ ކޮމިޝަނަރު އޮފް ޕޮލިސް އަހުމަދު އަރީފަށް ފޮނުވި ސިޓީއެއްގަ އެވެ.
އެސިޓީގައި ދޫނިދޫ ޖަލުގައި އަދީބު އަވަހާރަކޮށްލަން ރާވަމުންދާ ކަމަށާއި ވަރަށް ހާއްސަ އިސްކަމެއްގެ ގޮތުން މިމައްސަލަ ތަހުޤީގުކޮށް އަޅަންޖެހޭ ސަލާމަތީ ފިޔަވަޅުތައް އެޅުމަށް މިސިޓީގައި އެދިފައިވެއެވެ.
މިވާހަކަތައް ފެތުރެމުންދާއިރު އިއްޔެ ސޯޝަލް މީޑިއާގައި ވަނީ އަދީބު ޖަލުގައި އޮންނެވި ފޮޓޯއެއް އާއްމުވެފައެވެ.
އެފޮޓޯ ޝެއާ ކުރައްވަމުން ގަލޮޅު ދެކުނު ދާއިރާގެ މެންބަރު އަހުމަދު މަހުލޫފް ވިދާޅުވީ އަދީބު ދޫނިދޫ ޖަލުގައި ނިކަމެތި ހާލުގައި ބާއްވާފައި އޮތުމުން އަދީބު މަރާލަފާނެތީ ކަންބޮޑުވެ ވަޑައިގަންނަވާނެ ކަމަށެވެ.
ހަމައެހެންމެ، އެތެރެހަށީގައި ސިސްޓެއް އުފެދި ކިޑްނީގައި ހިލަހެދި ކެންސަރުގެ ނުރައްކާ ބޮޑުވެ ފުރާނަ ނުރައްކަލަށް ހުށައެޅިފައިވާއިރުވެސް އަދީބުގެ އާއިލާއާއިން ދެންނެވި އާދޭސްތަކަށް މުއައްސަސާތަކުން ދެއްވީ ބީރު ކަންފަތެކެވެ.
އެމްއެމްޕީއާރުސީގެ ޚިޔާނާތުގެ މައްސަލަ އާއި ޓެރަރިޒަމްގެ ދައުވާ ސާބިތުވެ އަދީބު ގެންދަވަނީ 33 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ.