މިނިވަން ޗެމްޕިއަންޝިޕް ފުޓްބޯޅަ މުބާރާތުގައި ޒޯން އަށެއްގެ ޗެމްޕިއަންކަން މި ފަހަރު ވެސް ހޯދި ފޭދޫ ޓީމް، މި މުބާރާތުގެ ފައިނަލް ރައުންޑްގައި ކުޅެން މިއަދު ގދ. ތިނަދު އަށް ފުރައިފި އެވެ.
ތިނަދޫގެ މެޗްތައް ކުޅޭ އިރު، ފޭދޫ ޓީމް ހިމެނެނީ ގްރޫޕް ދޭއްގަ އެވެ. އެ ގްރޫޕްގައި ހިމެނެނީ އެކި ޒޯންތަކުން ޗެމްޕިއަންކަން ހޯދި ޓީމްތަކެވެ. އެ ޓީމްތަކަކީ ފޭދު އާއި ތިނަދޫގެ އިތުރުން ތ. ތިމަރަފުއްޓާއި ދ. ކުޑަހުވަދޫ އެވެ.
މި ރައުންޑްގެ ގްރޫޕް އެކެއްގެ މެޗްތައް ކުޅޭނީ ހދ. ކުޅުދުއްފުށީގަ އެވެ. އެ ގްރޫޕްގައި ވެސް ހަތަރު ޓީމް ހިމެނޭނެ އެވެ.
ގްރޫޕް ދޭއްގެ މެޗްތައް މާދަމާ ތިނަދޫގައި ފަށާ އިރު، ފުރަތަމަ މެޗަށް ނިކުންނާތީ ތިނަދު އާއި ކުޑަހުވަދު އެވެ.
މި ގްރޫޕްގައި ފޭދޫ ކުޅޭ ފުރަތަމަ މެޗް ކުޅޭނީ ބުރާސްފަތި ދުވަހު އެވެ. އެ މެޗްގައި ފޭދުއާ ދެކޮޅަށް ނިކުންނާނީ ތިމަރަފުއްޓެވެ.
މިނިވަން ޗެމްޕިއަންޝިޕް ފުޓްބޯޅަ މުބާރާތުގެ ފައިނަލް މެޗް އޮންނާނީ މި މަހުގެ 20 ވަނަ ދުވަހު މާލޭގަ އެވެ.