މިދުވަސްކޮޅަކީ ރައްޔިތުންގެ މަޖިލީހުގެ މެމްބަރުންތައް ކޮޅު ބަދަލުވާ ވާހަކައިގެ އަޑު ގަދަ ވެފައިވާ ދުވަސްކޮޅެކެވެ. ހާއްސަކޮށް ވެރިކަންކުރާ ޕީޕީއެމްއަށް ނިސްބަތްވާ ބައެއް މެމްބަރުން ސަރުކާރާ އިދިކޮޅު ހަރަކާތްތަކުގައި އެކި ސިފަސިފައިގަ ބައިވެރިވާ އަޑުތައް ގިނައެވެ. ބައެއް މެމްބަރުން ޕާޓީގެ މަޤާމުތަކުން އިސްތިއުފާ ދެއްވިއިރު އަނެއްބައި މެމްބަރުން މިވަނީ ޕާޓީއިން ވަކިވެފައެވެ. ވަކި ނުވެތިބި މެމްބަރުންގެ މެދުގައި ވެސް ހިޔާލު ތަފާތު ވުންތައް މިވަނީ އިންތިހާއަށް ބޮޑުވެފައެވެ.
ކޯޓުތައް މެދުވެރިކޮށް ރައީސް މައުމޫންގެ ބާރު ޕީޕީއެމް ހިންގުމުން ނަގައި އެހުރިހާ ބާރުތައް ރައީސް ޔާމީނަށް ދެއްވާފައިވާތާ މިހާރު ދުވަސްތަކެއް ވެއްޖެއެވެ. އޭގެފަހުން މިހާތަނަށް ސަރުކާރާ ދެކޮޅު ހަރަކާތްތަކުގައި ޕީޕީއެމްއަށް ނިސްބަތްވާ 18 އަށް ވުރެ ގިނަ މެމްބަރުން އެކި ފަހަރު މަތިން ބައިވެރިވެފައިވެއެވެ.
ނަމަވެސް އޭގެ ތެރެއިން ބައެއް މެމްބަރުން ވަނީ އެކި ކަހަލަ ފިއްތުންތަކާ ގުޅިގެން އަނބުރާ ރައީސް ޔާމީންގެ ފަޅިއަށް ބަދަލުވެފައެވެ.
ސަރުކާރާ ދެކޮޅަށް ނިކުތް ބައެއް މެމްބަރުން އަނބުރާ ސަރުކާރަށް ތާއިދުކުރާކަމަށް އިއުލާން ކުރިއިރު، އެ މެމްބަރުންގެ މަސްލަހަތު ހިމެނޭ ވިޔަފާރިތަކަށާއި އެހެނިހެންވެސް ކަންކަމަށް ސަރުކާރުން އެދުވަސްވަރު ބޮޑެތި ފިއްތުންތައް ކުރިމަތިކުރުވިކަމުގެ ތުހުމަތު ކުރެވިގެން ދިޔައެވެ.
ކޮންމެއަކަސް ސަރުކާރުން އަބަދުވެސް މަސައްކަތް ކުރަމުންދަނީ ވީހާވެސް ގިނަ މެމްބަރުން ސަރުކާރު ފަޅީގައި ހިފެހެއްޓުމަށެވެ. އެކަމަށްޓަކައި ކުރަން ޖެހުނު ކޮންމެ ކަމެއް ކުރާނެކަމަށް ބެލެވެއެވެ. އަދި ކަމުގެ މުހިންމު ކަމުން ސަރުކާރަށް ބޭނުން ކުރެވެން ހުރި ހުރިހާ ވަޞީލަތެއް ބޭނުން ކޮށްގެން ވެސް މެމްބަރުން ހިފެހެއްޓޭތޯ ބަލާނެކަމީ ޔަޤީންކަމެކެވެ.
މެމްބަރުން ރުއްސަން ސަރުކާރުން މިވަނީ އިހަށް ވުރެބޮޑަށް ފޫގަޅައި އިތުރު މަސައްކަތްތަކެއް ފަށާފައެވެ. "ގޭމްޕްލޭން" ބަދަލުކޮށް އާދޭސް ދަންނަވާ ޚަބަރުވެސް އެބަލިބެއެވެ. ނަމަވެސް ޕީޕީއެމްއަށް ނިސްބަތްވާ ގިނަ މެމްބަރުން މިހާރު އެންމެ ބޭނުންވާ ކަންކަން ކޮށްދެވޭނެކަމުގެ ޔަޤީންކަމެއް ، އަދި އެ ޤާބިލުކަމެއްވެސް ސަރުކާރުގައި ހުރިކަމަށް އެ މެމްބަރުންނަށް ޤަބޫލެއް ނުކުރެއެވެ. އެކަން ޕީޖީ ގްރޫޕްގެ ވައިބަރ ގްރޫޕްގައި ދެކެވޭ ވާހަކަތަކުން އެނގެއެވެ.
އެހެންވެ ނުރައްކަލަށް ހުށަހެޅި ގެން ވިޔަސް ސަރުކާރާ ދެކޮޅަށް ނިކުންނަ މެމްބަރުން ދުވަހުން ދުވަހަށް ދަނީ އިތުރުވަމުންނެވެ.
މިހާރު ރައްޔިތުންގެ މަޖިލީހުގައި ތިއްބެވި މެމްބަރުންގެ ތެރެއިން ގިނަ މެމްބަރުންގެ އެންމެ ބޮޑު އުންމީދަކަށް ވާނީ އަންނަ މަޖްލިސް އިންތިހާބުންވެސް ގޮޑި ދިފާއު ކުރުމެވެ.
ރައްޔިތުންގެ މަޖިލީހުގެ މެމްބަރެއްގެ ގޮތުގައި އާ ދައުރަކަށް ހޮވުމަކީ ކޮންމެ މެމްބަރަކުވެސް ބަލަމުން އަންނާނެ ހުވަފެނެކެވެ. އެހެންވެ މަޖިލީހުގެ އިންތިހާބު ބޯމަތިވެފައިވާ މިދަނޑިވަޅުގައި ގޮނޑި ދިފާއު ކުރުމަށްވުރެ މުހިންމު އެއްވެސް ކަމެއް އެބޭފުޅުންނަށް އޮންނާނެ ކަމަކަށް ޤަބޫލުނުކުރެވެއެވެ. ނަމަވެސް ގޮނޑި ދިފާއު ކުރެވެންއޮތީ ދާއިރާގެ ރައްޔިތުންގެ ވިސްނުމާ އެއްގޮތަށް ތިބެގެން ކަމީ އެންމެން ޤަބޫލުކުރާ ހަޤީގަތެކެވެ.
ސަރުކާރު ފަޅީގައި މިހާރު ތިއްބެވި ގިނަ މެމްބަރުންނަކީ ވަރަށް ޒުވާން އަދި ސިޔާސީ ހަޔާތުގެ ކުރީކޮޅުގައި އުޅުއްވާ ބޭފުޅުންނެވެ. އެއިން ކޮންމެ ބޭފުޅަކީ ސިޔާސީ މުސްތަޤްބަލް އުޖާލާ ، ގިނަ ފުރުޞަތުތަކެއް ކުރިމަތީގައި ފަހިވެފައިވާ ބޭފުޅުންނެވެ.
ސިޔާސީ މަސްރަހުގެ މިސްރާބު މިހާރު ހުރި ގޮތުން ރައީސް ޔާމީން ފަޅީގައި މިވަގުތު މަޑު ކޮށްފިނަމަ ދެން އޮންނަ ރައްޔިތުންގެ މަޖިލީހުގެ އިންތިހާބުގައި ނާކާމިޔާބީއާ ކުރިމަތިލާންޖެހިދާނެ ކަމުގެ ބިރު މިވަނީ އިންތިހާއަށް ބޮޑުވެފައެވެ.
އެކަން އެންމެ ފަހުން ބޭއްވުނު ލޯކަލް ކައުންސިލް އިންތިހާބުގެ ނަތީޖާ އިން މެމްބަރުންނަށް މިވަނީ ފެނި ގޮސްފައެވެ. އެއިންތިހާބުގައި ރައީސް ޔާމީންގެ ޓީމަށް ނިސްބަތްވާ ގިނަ މެމްބަރުންގެ ދާއިރާތަކުން ލަދުވެތި ނާކާމިޔާބީއެއް ސަރުކާރަށް ވަނީ ލިބިފައެވެ. އެހެންކަމުން ރައީސް ޔާމީން ދެއްވާ ޓިކެޓެއް ހިފައިގެން ރައްޔިތުން ކުރިމައްޗަށް ނިކުތުމަށް މެމްބަރުން މިވަނީ ޖެހިލުންވެފައެވެ.
އިދިކޮޅު ފަރާތްތަކުންނާއި ގިނަ އާންމު ފަރާތްތަކުން ބުނަމުން ދަނީ ކޮޅު ބަދަލު ނުކޮށްފިނަމަ އެއްވެސް މެމްބަރަކަށް ފުރުޞަތު ނެތްކަމުގައެވެ. ރައީސް ޔާމީންގެ ޓީމުން މިހާތަނަށް ޖެހި އެއްވެސް ސިޔާސީ ހިސާބެއް ދިމާ ނުވާ ވާހަކައަކީ ސިޔާސީ މައިދާނުގައި މަޝްހޫރު ވާހަކައެކެވެ.
މެމްބަރުން މަޖިލީހުގެ ގޮނޑިއަށް އިންތިހާބުކުރަނީ އާންމު ވޯޓަކުން ކަމަށް ވުމުން، ރައީސް ޔާމީންއަށް އެކަމުގައި އަދާކުރެވޭނެ މާބޮޑު ދައުރެއް އޮތްކަމަށްކަށް އެއްވެސް މެމްބަރަކު ޤަބޫލު ނުކުރާނެއެވެ. އެއީ އެމަނިކްފާނަކީ ވެސް ރައްޔިތުންގެ ތެރޭގައި މަގުބޫލުކަމެއް ނެތުމުމުގެ ސަބަބުން ހަނިގޮތަކަށް އިންތިހާބުވި ބޭފުޅަކަށްވާތީއެވެ. ރައީސް ޔާމީން އިންތިހާބުކުރުމަށް މަސައްކަތްކުރި ސިޔާސީ ލީޑަރުންގެ ބުރަ މަސައްކަތުން ނޫންގޮތަކަށް އެމަނިކްފާން އިންތިހާބު ނުވާނެކަން އެންމެން ޤަބޫލުކުރާނެއެވެ.
މީގެ އިތުރުން ރައީސް ޔާމީން އަކީ ރާއްޖޭގެ އަތޮޅުތަކަށް ވަޑައިގެން ކެމްޕެއިން ހިންގެވުމަށް ވަރަށް ބުރަހެލި ބޭފުޅެއްކަމުން ރައީސް މައުމޫން ފަދަ ބޭފުޅުންނާ ނުލާ ކާމިޔާބް ކެމްޕެއިންއެއް ހިންގި ދާނެކަމަށް ނުބެލެވެއެވެ.
ރައީސް މައުމޫންގެ ބައިވެރިވުމެއް ނެތި ޕީޕީއެމްއަށް ރާއްޖޭގައި އެއްވެސް އިންތިހާބެއް މިހާތަނަށް ކާމިޔާބުވެފައި ނުވެއެވެ. އަދި ރައީސް މައުމޫންއާ ނުލާ އިންތިހާބެއް މުސްތަގްބަލު ގައި ވެސް ޕީޕީއެމްއަށް ކާމިޔާބުކުރުމަކީ ނުވާނެކަމެއް ކަމަށް ގިނަ ބަޔަކު މިހާރު ޤަބޫލުކުރެއެވެ. އެކަމަށްވެސް ހެކިދައްކަނީ އެންމެފަހުން ބޭއްވުނު ލޯކަލް ކައުންސިލް އިންތިހާބުގައި ޕީޕީއެމްއަށް ލިބިގެންދިޔަ ބޮޑު ނާކާމިޔާބީއިންނެވެ.
އިދިކޮޅު ފަރާތްތަކުން އެއިންތިހާބު ކާމިޔާބު ކުރިއިރު އާރާއި ބާރުވެރި ކަމުގައި ސަރުކާރުން ދިޔައީ ކެމްޕެއިން ކުރަމުންނެވެ. ނަމަވެސް އިދިކޮޅު ހަރަކާތްތައް އޮތީ އެއްކޮށް ހެން ހުއްޓުވާފައެވެ. އެންމެ ކުޑަމިނުން މާލޭގައި ކެމްޕެއިން ޖަލްސާއެއް ބާއްވާލަން ވެސް އިދިކޮޅު ފަރާތްތަކަށް ފުރުޞަތު ލިބިފައި ނުވެއެވެ. ނަމަވެސް އިދިކޮޅު ފަރާތްތަކުން ނެރުނު ތަފާތު ބޮޑު ނަތީޖާއިން ރައްޔިތުންގެ ކުރިމަތީގައި ރައީސް ޔާމީން ދެއްވާ ޓިކެޓަކީ އަގެއް ބުރަދަނެއް ހުރިއެއްޗެއް ނޫންކަން ހާމަވެގެންދިޔައެވެ.
މިފަދަ އެތައް ސަބަބުތަކެއް ހުރުމުން ރައީސް ޔާމީންގެ ފަޅީގައި ތިއްބެވި މެމްބަރުންނަށް ސަރުކާރާ ދުރަށްދާން މިވަނީ މަޖުބޫރުވެފައެވެ. އަލަށް އިންތިހާބުވާން ބޭނުން ހުރިހާ މެމްބަރުންނަށްވެސް އޮތީ އެމަޖުބޫރުކަމެެވެ. ކިތަންމެ އަރިސްނަމަވެސް ކޮށްދެވޭނެ ކަމެއް، އަދި ވެދެއްވޭނެ އެހީތެރިކަމެއް ރައީސްއަށް ނެތުމުން މެމްބަރުންނަށް ވަކިވާން މަޖުބޫރުވާނެއެވެ.