ރާއްޖޭގައި މުވާސަލާތީ ހިދުމަތް ދޭ އެންމެ ބޮޑު ކުންފުނި ދިރާގަށް މޯބައިލް ޕޭމަންޓް ސާވިސް ލައިސަންސް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ދީފިއެވެ.
އެ ލައިންސަންސް އެ ކުންފުންޏަށް ދިނީ އިއްޔެ ފެށި މޯލްޑިވްސް ފައިނޭންޝަލް އެކްސްޕޯގަ އރެވެ.
ލައިސަންސް ދިރާގާ ރަސްމީކޮށް ހަވާލުކޮށް ދެއްވީ ގަވަރުނަރު ޑރ. އަޒީމާ އާދަމެވެ. ދިރާގުގެ ފަރާތުން ލައިސަންސާ ހަވާލުވެވަޑައިގެންނެވީ، އެ ކުންފުނީގެ ސީއީއޯ އިސްމާއީލް ރަޝީދެވެ.
މޯބައިލް ޕޭމަންޓްގެ ޚިދުމަތް ދިނުމަށް ލައިސަންސް ދޫކުރުމާ ބެހޭ ގޮތުން އެމްއެމްއޭ އިން ބުނީ، ރާއްޖޭގެ ޤައުމީ ޕޭމަންޓް ސިސްޓަމް ހަރުދަނާ ގޮތެއްގައި ތަރައްޤީ ކުރައްވާ، ބޭންކިން ޚިދުމަތް ފަސޭހައިން ލިބެން ނެތް ފަރާތްތަކަށް ވެސް ރައްކާތެރި އަދި ހަލުވި ނިޒާމެއްގެ ދަށުން ފައިސާގެ މުޢާމަލާތްތައް ހިންގޭނެ ގޮތްތަކެއް ހަމަޖެއްސެވުމަކީ އެ އޮތޯރިޓީން އިސްކަންދޭ ކަމެއް ކަމަށެވެ.
އެގޮތުން ރާއްޖެއަކީ މޯބައިލް ފޯނު ނެޓްވޯކް ފުޅާވެފައިވާ ޤައުމަކަށްވާތީ، މޮބައިލް ފޯނު މެދުވެރިކޮށް ފައިސާ ދެއްކުމާއި ފޮނުވުމުގެ ޚިދުމަތް ދޭން ފެށުމަކީ ޢާއްމުންނަށް ފަސޭހަތަކެއް ވެގެންދާނެ ކަމެއް ކަމަށް އެމްއެމްއޭ އިން ބުންޏެވެ.
މީގެ އިތުރުން އެފަދަ ޕޭމަންޓް ޚިދުމަތްދޭ ފަރާތްތަކުގެ މެދުގައި އިތުރަށް ވާދަވެރިކަން އުފެދިގެން ދާނެ ކަމެއް ކަމަށް ޤަބޫލުކުރާ ކަމަށް ވެސް އެ އޮތޯރިޓީން ބުންޏެވެ
އެމްއެމްއޭ އިން ކުރިން ވަނީ އުރީދޫ މޯލްޑިވްސް އަށްވެސް މޮބައިލް ޕޭމަންޓް ސާވިސް ލައިސަންސް ދީފަ އެވެ.