މީގެ ކުރިން ވެސް ވަރަށް ކާމިޔާބު ލޯބީގެ ފިލްމްތަކެއް ބެލުންތެރިންނާ ހަމައަށް ގެނެސް ދީފައިވާ މަޝްހޫރު ޑައިރެކްޓަރު/ޕްރޮޑިއުސަރު ފާތުމަތު ނަހުލާގެ އާ ފިލްމް "ބޮސް" ރޭ އޮލިމްޕަހުގައި ރަސްމީކޮށް ލޯންޗްކޮށްފި އެވެ.
މި ފިލްމް ލޯންޗް ކުރަން ބޭއްވި ހަފުލާގައި ފިލްމްގެ ފުރަތަމަ ޕޯސްޓަރު ލޯންޗްކޮށް ދިނީ ނަހުލާގެ ހަތަރު އަހަރުގެ އަންހެން ދަރިފުޅު ލާލި ސިނާނެވެ.
"ބޮސް" އަކީ ނަހުލާ ލިޔެ، ޕްރޮޑިއުސްކޮށް، އައިޝަތު ރިޝްމީ ޑައިރެކްޓް ކުރާ އަސަރު ގަދަ ލޯބީގެ ފިލްމެކެވެ.
މިހާރު ޝޫޓިން ވެސް ފަށާފައިވާ ފިލްމުގެ ލީޑް ރޯލުން ފެނިގެން ދާނީ ފިލްމީ ދާއިރާ އަށް އަލަށް ތައާރަފުވާ މުހައްމަދު ޔުނާން އާއި މިހާރު އެންމެ ވިދާ ބަތަލާ މަރިޔަމް އައްޒަ އެވެ.
މާލެ އާއި ރިސޯޓެއްގައި ޝޫޓް ކުރާ "ބޮސް" ގެ ކާސްޓުންގެ ތެރޭގައި ފާތުމަތު އާޒިފާ (އަޒޫ)، އިބްރާހީމް ޖިހާދު (ޖިމީ) އަދި އަލީ އާޒިމް (ދޮންއައްޔަ) ހިމެނެ އެވެ.
އަމިއްލަ ރާގުގެ ލަވަތައް ހިމެނޭ "ބޮސް" ސިނަމާ އަށް އަންނާނީ އަންނަ އޮކްޓޯބަރު މަހުގެ 24 ގަ އެވެ.
މި ފިލްމަކީ މިދިޔަ އަހަރު ގެނެސް ދިން ކާމިޔާބު ބިރުވެރި ފިލްމް "4426" އަށް ފަހު، ނަހުލާގެ ކްރިސްޓަލް އެންޓަޓައިންމަންޓުން ގެނެސްދޭ ފުރަތަމަ ފިލްމެވެ.