ޒުވާން ފިރިހެނުން މި ފަހަކަށް އައިސް ކަސްރަތުކޮށް، ހަށިގަނޑު ޓޯންކޮށް ޕެކް އަޅުވާލި ނަމަވެސް މިއީ ހަމަ އަޖައިބެއް ކަހަލަ ކަމެކެވެ.
މި ފަހަރު ޕެކް ދައްކާލީ ޗައިނާގެ އެންމެ ހަތް އަހަރުގެ ފިރިހެން ކުއްޖެކެވެ. އެހާ ތުއްތު އިރުގައި ވެސް އޭނާގެ ބަނޑުން އަށް ޕެކް އެހެރީ ފެންނާށެވެ.
މި ކުއްޖާގެ ފޮޓޯތައް ސޯޝަލް މީޑިއާގައި މިހާރު އަންނަނީ ވައިރަހެއްހެން ދައުރުވަމުންނެވެ. އަދި ޕެކާ އެކު ދައްކާލި ހަށިގަނޑުގެ ސަމާލުކަން އެތައް ބަޔަކަށް އައިސް އޭނާ ވަރަށް މަޝްހޫރު ވެސް ވެއްޖެ އެވެ.
މި ކުއްޖާއަކީ ޗައިނާގެ ޒެޖިއަންގެ ޕްރޮވިންސަަށް ނިސްބަތްވާ ކުއްޖެކެވެ. އޭނާގެ ނަމަކީ ޗެން ޔީ އެވެ.
އެހާ ޅަ އުމުރުގައި ޕެކްގެ ބައްޓަން ޗެންގެ ބަނޑުން ދައްކާލަން ފެށީ ޖިމްނާސްޓްގެ ސަބަބުންނެވެ. އޭނާއަކީ ޖިމްނާސްޓިކް ހަދަމުން އަންނަ ކުއްޖެކެވެ.
މި މަހުގެ ދެ ވަނަ ދުވަހު ޖިމްނާސްޓިކް މުބާރާތެއްގައި ވެސް ޗެން ވަނީ އޭނާގެ ހުނަރު ދައްކާލައިފަ އެވެ. އޭނާގެ ޕެކްތައް އެތައް ހާސް ބަޔަކަށް ފެނުނީ އެ މުބާރާތުގެ ތެރޭގައި ލައިގެން ހުރި ޓީޝާޓް ބޭލުމުންނެވެ.
ރިޕޯޓްތައް ބުނާ ގޮތުން 19 ވަނަ ހަންގްޒޫ ސިޓީ ސްޕޯޓްސް ގޭމްގައި ޗެން ވަނީ އޭނާގެ ހުނަރު ވަރަށް ބޮޑަށް ދައްކާލައި ހަ ގޮލްޑް މެޑަލާއި އެއް ސިލްވަ މެޑަލް ވެސް ހޯދައިފަ އެވެ.
ޗެންގެ މަންމައާ ހަވާލާދީ ޗައިނާގެ ބައެއް މީޑިއާތަކުން ބުނެފައިވާ ގޮތުގައި އޭނާގެ ދަރިފުޅަކީ ވަރަށް ތުއްތު އިރުން ފެށިގެން ވެސް ވަރުގަދަކަން ދައްކަމުން އަންނަ ކުއްޖެކެވެ. އަދި އެންމެ 11 މަހުގައި އޭނާ ހިނގަން ފެށި ކަމަށް ވެސް ބުންޏެވެ.