މަރާމާތަށް ކަމަށް ބުނެ ގަމާއި ފޭދޫ ގުޅޭ ކޯޒްވޭ ކައިރީގައި ހުއްޓައި ނެގި "ދޮންދީނި" މޮނިއުމެންޓް އެއްލާލާފައި އޮންނަ މަންޒަރު ފެންނަ ފޮޓޯތަކެއް އާންމުވުމާ ގުޅިގެން ގިނަ ބައެއްގެ ފާޑުކިޔުންތައް އަމާޒުވެއްޖެ އެވެ.
"ދޮންދީނި" މޮނިއުމަންޓް ބަހައްޓާފައި ވަނީ 2011 ވަނަ އަހަރު އައްޑޫގައި ބޭއްވި ސާކް ސަމިޓާ ދިމާކޮށް ކުރީގެ ރައީސް މުހައްމަދު ނަޝީދުގެ ވެރިކަމުގަ އެވެ.
އެ މޮނިއުމަންޓް ނެގުމަށް ފަހު ގެންގޮސްފައި ވަނީ، ފޭދޫ ބަނދަރު ސަރަހައްދުގައި ހުންނަ އެމްޕީއެލްގެ ސައިޓަށެވެ.
ސޯޝަލް މީޑިޔާގައި އާންމުވެފައިވާ ފޮޓޯތަކުން ފެންނަ ގޮތުގައި، މޮނިއުމަންޓް ބާއްވާފައި ވަނީ، ފޭދޫ މޫދާ ކައިރި ހިސާބެއްގަ އެވެ.
މިކަމަށް ފާޑުކިޔާ ފަރާތްތަކުން ދަނީ "ވަރަށް ބޮޑަށް ފީވެ، ދަނބަރު ވެއްޓޭތީ މަރާމާތަކަށް ކަމަށް ބުނެ ނަގައިގެން ގޮސް މޫދު ކައިރީގައި ބެހެއްޓުމަކީ، ދަނބަރު ފިލާ ކަމެއްތޯ" ބުނެ ސޯޝަލް މީޑިޔާގައި ސަރުކާރަށް އަމާޒުކޮށް ސުވާލު އުފައްދާފަ އެވެ.
މީގެ އިތުރުން ވެސް ދޮންދިނި މޮނިއުމެންޓް ނެގުމާއި ގުޅިގެން އެކި މީހުން ދަނީ ތަފާތު ހިޔާލު ފާޅު ކުރަމުންނެވެ. ބައެއް ފަރާތްތަކުން ބުނެފައި ވަނީ "ދޮންދީނި" މޮނިއުމެންޓް ނެގީ އޭގެ ބުޑަށް ސިހުރު ހަދާފައިވާތީ ކަމަށެވެ.