އެމެރިކާގެ ސައިންސްވެރިން ވަނީ މީހުންގެ މުރާލިކަން ދެނެގަތުމަށްޓަކައި މީހުންގެ ސްމާޓްފޯންތަކުން ޑޭޓާ ހޯދުމަށް ފަހު، ބައިނަލްއަޤްވާމީ ފެންވަރުގެ ދިރާސާއެއްކޮށްފަ އެވެ.
އެ ދިރާސާއިން ދައްކާފައިވާ ގޮތުގައި އެންމެ ހީވާގި މީހުން ދިރިއުޅެނީ ހޮންގްކޮންގަ އެވެ. އަދި އެ ލިސްޓުގެ އެންމެ ފުލުގައި ވަނީ އިންޑޮނޭޝިއާ އެވެ.
އެގޮތުން ބަލާއިރު ހޮންގްކޮންގައި ދުވާލަކު އެވަރެޖްކޮށް ކޮންމެ މީހަކުވެސް 6،880 ފިޔަވަޅު އަޅަ އެވެ. އަދި އިންޑޮނޭޝިއާގެ އެވަރެޖަކީ އެންމެ 3،513 ފިޔަވަޅެވެ.
މީގެ އިތުރުން އެ ދިރާސާއިން ވަނީ ފަލަވުމުގެ މައްސަލަ އަށް ހައްލެއް ހޯދުމުގައި ބޭނުންކުރެވިދާނެ ކަންތައްތަކެއް ވެސް ހޯދައިފަ އެވެ.
ގިނަ ސްމާޓްފޯންތަކުގައި އެކްސެލެރޮމީޓާ އެއް ހުރެއެވެ. އެއީ ފޯން ބޭނުން ކުރާ މީހާ އަޅަނީ ކިތައް ފިޔަވަޅުތޯ ބަލައިދޭ އެއްޗެކެވެ.
އެގޮތުން ދިރާސާވެރިން ވަނީ "އާގަސް" އެޕްލިކޭޝަން ބޭނުން ކުރާ މީހުންގެ ތެރެއިން 700،000 އަށް ވުރެ ގިނަ މީހުންގެ ޑޭޓާ ހޯދައިފަ އެވެ.
އޭގެ ތެރެއިން އެއް ދިރާސާވެރިއެއް ކަމަށްވާ ބައޯ އިންޖިނިއަރިންގެ ޕްރޮފެސަރު ސްކޮޓް ޑެލްޕް ވިދާޅުވީ އެއީ އިންސާނުންގެ ޙަރަކާތާ ބެހޭ ގޮތުން މިހާތަނަށް ކޮށްފައިވާ ދިރާސާތަކަށް ވުރެ 1،000 ގުނަ ބޮޑު ދިރާސާއެއް ކަމަށެވެ.
މި ހޯދުންތައް ޗާޕުކުރެވިފައި ވަނީ "ނޭޗާ" ނަމަކަށް ކިޔާ ޖާނަލްއެއް ގައެވެ. އެ ޖާނަލްގެ ލިޔުންތެރިން ޤަބޫލް ކުރާ ގޮތުގައި އެ ހޯދުންތަކަކީ މީހުންގެ ސިއްޙަތު އިތުރަށް ރަނގަޅު ކުރުމަށްޓަކައި ވަރަށް މުހިންމު މަޢުލޫމާތުތަކެއް ކަމަށެވެ.