އައްޑޫގެ ގުޅިފައިވާ ހަތަރު އަވަށުގެ ނަރުދަމާ ނިޒާމް ގާއިމް ކުރުމުގެ މަޝްރޫއުގެ ތެރެއިން އަގަކާ ނުލައި ހިދުމަތް ގުޅައި ދޭން އެދި ހުޅުވާލި މުއްދަތު ހައުސިން މިނިސްޓްރީން އިތުރުކޮށްފި އެވެ.
ކުރިން ހިތަދޫ، މަރަދޫ، މަރަދޫފޭދޫ އަދި އަދި ފޭދޫގެ ގޭބިސީތަކަށް ފޯމް ހުށަހަޅަން ދިން މުއްދަތު ހަމަވީ މި މަހުގެ 4 ވަނަ ދުވަހު އެވެ. އެހެން ނަމަވެސް މިހާރު އަންނަ މަހުގެ 13 އާ ހަމައަށް ވަނީ ފުރުސަތު ހުޅުވާލައިފަ އެވެ.
ފޭދޫ، މަރަދޫފޭދޫ އަދި މަރަދޫގެ ނަރުދަމާ ހަވާލުކޮށްފައި ވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ އެވެ.
މި އަވަށްތަކަށް ފޯމް ދޫކުރާނީ ފޭދޫގައި ހުންނަ ލޭންޑް ބިލްޑިން އެންޑް މުނިސިޕަލް ސާވިސަސް ޑިޕާޓްމަންޓްގައި ގާއިމުކޮށްފައިވާ އެމްޓީސީސީގެ ޕްރޮޖެކްޓް އޮފީހުންނެވެ.
ހިތަދޫގެ ނަރުދަމާ ހަވާލުކޮށްފައި ވަނީ މޯލްޑިވްސް ވޯޓަ ސްވަރޭޖް ކޮމްޕެނީ (އެމްޑަބްލިއުއެސްސީ) އާ އެވެ.
ހިތަދޫން ފޯމް ދޫކުރާނީ އެ އަވަށުގައި ހުންނަ ލޭންޑް ބިލްޑިން އެންޑް މުނިސިޕަލް ސާވިސަސް ޑިޕާޓްމަންޓުންނެވެ
އައްޑޫގެ ނަރުދަމާ ނިޒާމްގެ އަމަލީ މަސައްކަތް ރަސްމީކޮށް އިފުތިތާހު ކުރީ މިދިޔަ އެޕްރީލް މަހުގެ ތެރޭގަ އެވެ.