ހުޅުދޫގައި ބާއްވަމުން އަންނަ މިނިވަން ކަޕްގެ ގުރުލުން ބާއްވައި މުބާރާތް 10 ޓީމާ އެކު މާދަމާ ރޭ ފަށާ ގޮތަށް ނިންމައިފި އެވެ.
ދެ ގްރޫޕަކަށް ބަހާލައިގެން ކުރިއަށް ގެންދާ މުބާރާތުގެ ގްރޫޕް އޭގައި ހިމެނެނީ މަންތަރަ، ފްރެންޑްސް ކްލަބް، ހުޅުދޫ ޔޫތު، ރިސޯޓް ބޯއި އަދި އޭޓީ ސްޕޯޓްސް އެވެ.
ގްރޫޕް ބީގައި ހިމެނެނީ ފެނަކަ، މަލްޓި ޖީނިއަސް ސިޓީ، މަރަދޫ އެފްސީ، ކެނެރީފް އަދި ސައުތު ބްލޫޒް އެވެ.
މުބާރާތް ހުޅުވާ މެޗްގައި ކުޅެން ހަމަޖެހިފައި ވަނީ ފްރެންޑްސް ކްލަބާއި މަންތަރަ އެވެ. އެރޭ ކުޅޭ ދެވަނަ މެޗްގައި ބައްދަލު ކުރާނީ ފެނަކަ އާއި މަލްޓި ޖީނިއަސް ސިޓީ އެވެ.
ހުޅުދޫ ފުޓްސަލް ދަނޑުގައި ކުރިއަށްދާ މި މުބާރާތުގެ ގްރޫޕް ސްޓޭޖް މެޗްތައް ހަމަޖެހިފައިވާ ގޮތުން ކޮންމެ ދުވަހަކު ހަވީރު އެއް މެޗު އަދި ރޭގަނޑު ދެ މެޗު ކުޅޭނެ އެވެ.
މިއަހަރުގެ މުބާރާތުގެ ޗެމްޕިއަން ޓީމަށް 30،000ރ. ގެ ފައިސާގެ އިނާމް ހުށަހަޅާފައިވާ އިރު ރަނަރަޕް ޓީމަށް 20،000ރ. ލިބޭނެ އެވެ.
މިނިވަން ކަޕްގެ މި އަހަރުގެ މައި ސޮޕޮންސަރަކީ ރައްޔިތުންގެ މަޖިލީހުގެ ހުޅުދޫ ދާއިރާގެ މަޖިލިސް މެމްބަރު މުހައްމަދު ޝާހިދު (ޝާޑް) އެވެ.
ކޯ-ސްޕޮންސަރަކީ އައިލެންޑް އެކްސްޕްރެސް އެވެ.
ދެހާސް ނުވަ ވަނަ އަހަރުން ފެށިގެން ބާއްވަމުން އަންނަ މިނިވަން ކަޕްގެ މިދޔަ އަހަރުގެ ޗެމްޕިއަނަކީ ހުޅުދޫ އެފްސީ އާޝާނެވެ.