1. ހަކަތަ އިތުރުކޮށް ދިނުން
މާބަނޑު ދުވަސްވަރު އާދަޔާއި ޚިލާފަށް ވަރުބަލިކަން އިހުސާސް ކުރެވުމަކީ އާންމު ކަމެކެވެ. ނަމަވެސް ކޮންމެ ދުވަހަކު ޤަވާއިދުން ކަސްރަތު ކުރަން އާދަކުރުމަކީ އެ ވަރުބަލިކަން ނައްތާލައި، ދުވާލުގެ މަސައްކަތްތައް ފަސޭހައިން ކުރުމުގެ ހަކަތަ ލިއްބައިދޭ ކަމެކެވެ. އެއީ ކަސްރަތު ކުރުމުގެ ސަބަބުން ކާޑިއޯވެސްކިއުލާ (ހިތާއި ލޭހޮޅިތަކުގެ) ނިޒާމް ވަރުގަދަވެއެވެ. އެހެންކަމުން އެހާ ފަސޭހައިން ވަރުބަލިނުވެ، ބުރަ މަސައްކަތްތައް ކުރުމުގެ ބާރު ހަށިގަނޑަށް ލިބިގެންދެއެވެ. ކަސްރަތު ކުރުމުގެ ސަބަބުން ހަށިގަނޑުގެ މަސްތައް ވަރުގަދަވެއެވެ. އެހެންކަމުން އޮފީހަށް ދިއުމާއި، ބާޒާރު ކުރުންފަދަ ކަންކަން ކުރުމުގައި އެހާބޮޑު ބުރައެއް އުފުލާކަށް ނުޖެހޭނެއެވެ.
2. ފުރިހަމަ ނިދި ލިބުމުގައި އެހީތެރިވެދޭ
މާބަނޑު ދުވަސްވަރު ހަށިގަނޑަށް އަންނަ ބަދަލުތަކުގެ ސަބަބުން ފަސޭހައިން ނިދަން އޮވެވޭނެ ގޮތެއް ހޯދުމަކީ އުނދަގޫ ކަމަކަށް ވެދާނެއެވެ. ކަސްރަތު ކުރުމަކީ މީހާ ވަގުތީ ގޮތުން ވަރަށް ބޮޑަށް ވަރުބަލިކުރުވާ ކަމަކަށްވުމުން، ކަސްރަތު ކުރުމަށްފަހު މާ އަރާމްކޮށް އަދި ފަސޭހައިން ނިދި އަންނާނެ އެވެ.
3. މާބަނޑުވުމާއި ގުޅުންހުރި މައްސަލަތަކުން ދުރުހެލިވުން
ދިރާސާތަކުން ދައްކާފައިވާ ގޮތުގައި މާބަނޑު ދުވަސްވަރު ކަސްރަތު ކުރުމަކީ ޖެސްޓޭޝަނަލް ޑައިބެޓީސް އާއި ޕްރިއެކްލެމްޕްސިއާ ޖެހުމުގެ ފުރުސަތު ކުޑަކޮށްދޭ ކަމެކެވެ. އެހެންނަމަވެސް އެފަދަ މައްސަލައެއް ހުރެއްޖެނަމަ ކަސްރަތު ކުރުމާއި ބެހޭގޮތުން ޑޮކްޓަރާއި މަޝްވަރާ ކުރާށެވެ. އެއީ ވިހަން މާ ކައިރިވެފައި ބަލީގެ ސީރިއަސް ކަމަށް ބަލާފައި، އެއްވެސް ކަހަލަ މަސައްކަތެއް ނުކުރުމަށް ވެސް ޑޮކްޓަރު އިރުޝާދު ދީފާނެތީއެވެ. ޖެސްޓޭޝަނަލް ޑައިބެޓީސް ޖެހޭ އަންހެނުން ޤަވާއިދުން ކަސްރަތު ކުރުމަކީ އެބަލީގައި ވަރަށް ބޮޑު ތަފާތެއް ގެނެސްދޭ ކަމެކެވެ. ދިރާސާއަކުން ދައްކާފައިވާ ގޮތުގައި ޖެސްޓޭޝަނަލް ޑައިބެޓީސް ހުންނަ އަންހެނުން ހަފްތާއަކު ތިން ފަހަރު ކަސްރަތު ކުރުމުގެ ސަބަބުން ބަނޑުގައިވާ ދަރިފުޅު މާ ބޮޑު ވުމުގެ ފުރުސަތު 58% ކުޑަވެގެންދެއެވެ. އޭގެ ނަތީޖާއެއްގެ ގޮތުން ސިޒޭރިއަން ހަދަން ޖެހުމުގެ ފުރުސަތު 34% ކުޑަވެއެވެ.
4. އުނދަގޫތަކާއި ތަދުތަކުން ދުރުހެލިވުން
ޤަވާއިދުން ކަސްރަތު ކުރުމަކީ މަސްތައް ވަރުގަދަ ކުރުވާ ކަމެކެވެ. އޭގެ ސަބަބުން މާބަނޑު ދުވަސްވަރު ދިމާވާ އުނދަގޫތަކާއި އިހުސާސް ކުރެވޭ ތަދުތައް ފަސޭހައިން ތަހައްމަލް ކުރުމުގެ ބާރު ހަށިގަނޑަށް ލިބެއެވެ. ޔޯގާ ހެދުމަކީ ބުރަކަށީގެ ތަދުތަކަށް ރަނގަޅު ކަމެކެވެ. އަދި ހިނގުމަކީ ލޭ ދައުރުވުން ރަނގަޅުކޮށްދޭ ކަމަކަށް ވީއިރު، ފެތުމަކީ ބަނޑުގެ މަސްތައް ވަރުގަދަކޮށްދޭ ކަމެކެވެ.
5. ވިހެއުމުގައި ފަސޭހަވުން
މީހާގެ ސިއްޙަތު ރަނގަޅުވީ ވަރަކަށް، ވިހާ ވަގުތުގައި ހަށިގަނޑު ބާރު ގަދަވާނެ އެވެ. ކުއްޖަކު ވިހެއުމަކީ ދުވުމުގެ ރޭހެއްގައި ބައިވެރިވުން ކަހަލަ ކަމެކެވެ. އެއީ އެކަމަށްޓަކައި ވަރަށް ގިނަ ހަކަތައާއި ބާރު ބޭނުންވާތީ އެވެ. މާބަނޑު ދުވަސްވަރު ކަސްރަތު ކުރުމަކީ ދަރިފުޅު ވިހެއުމަށް ނަގާ ވަގުތު ވެސް ކުރުކޮށްދޭ ކަމެކެވެ.
6. ސްޓްރެސް މަދުކޮށް އުފާވެރިކޮށްދިނުން
މާބަނޑު ދުވަސްވަރު އަންހެނުން މޫޑް ވަރަށް އަވަހަށް ބަދަލުވާނެ އެވެ. ދިރާސާއަކުން ދައްކާފައިވާ ގޮތުގައި ކަސްރަތު ކުރުމުގެ ސަބަބުން ސެރޮޓޮނިން ލެވެލްތައް އިތުރުވެއެވެ. ސެރޮޓޮނިން އަކީ މޫޑް ރަނގަޅުކޮށްދީ މީހާ އުފާވެރިކުރުވާ ސިކުނޑީގައި ހުންނަ ކެމިކަލް އެކެވެ. އެކީގައި ކަސްރަތު ކުރާނެ ރަހުމަތްތެރިއަކު ނުވަތަ ބައިވެރިއަކު ހުރުމަކީ ވެސް ވަރަށް ރަނގަޅު ކަމެކެވެ. އެއިރުން ކަސްރަތު ކުރާހިތް މާބޮޑަށް ވާނެ އެވެ. މިކަންތައްތައް ކޮށްގެން ވެސް މާބޮޑަށް ދެރަވެފައި ނުވަތަ ކަންބޮޑުވެފައި ހުންނަ ނަމަ، ފަހަރެއްގައި ޕްރިނެޓަލް ޑިޕްރެޝަން ހުރީ ކަމަށް ވެދާނެ އެވެ. އެހެންނަމަ ކައުންސެލަރަކާއި ވާހަކަދައްކާށެވެ.
7. ވިހެއުމަށްފަހު އިތުރުވި ބަރުދަން ލުއިކުރުމަށް ފަސޭހަވުން
މާބަނޑު ދުވަސްވަރު ހަށިގަނޑުގެ ބާރު ރަނގަޅު މިންވަރެއްގައި ދަމަހައްޓައިފިނަމަ، ވިހެއުމަށްފަހު ކުރިން ހަށިގަނޑު ހުރިގޮތަށް ބަދަލުވާން ފަސޭހަވާނެ އެވެ. އަދި ހަމަ އެހެންމެ މާބަނޑު ދުވަސްވަރު ކަސްރަތު ކުރުމުގެ ސަބަބުން ބަނޑުބޮޑުވުމުގެ ސަބަބުން ބަރުދަން އިތުރުވުމުގެ ފުރުސަތު ވެސް ކުޑަވެގެން ދެއެވެ.