ކުރިއަށް އޮތް ރިޔާސީ އިންތިހާބު ކައިރިވާ ވަރަކަށް ސިޔާސީ މަސްރަޚު ހޫނުވަމުން ދާއިރު އިދިކޮޅު ފަރާތްތަކުގެ ހަރަކާތްތައް ވަނީ ވަރުގަދަ ކުރަން ފަށާފައެވެ. އޭގެ ސަބަބުން ރައީސް އަބްދުﷲ ޔާމީންގެ ސަރުކާރު "ނޭވާހޮޅިއަށް" އެޅިފައިވާ ކަމަށް ސިޔާސީ ފަރާތްތަކުން ދަނީ ބުނަމުންނެވެ.
އޭގެ ހެއްކަކީ، ސިވިލް ކޯޓުގެ ހުކުމަކާއި އެކު، ޕީޕީއެމްގެ މިލްކުވެރިކަން ލިބިފައިވާ "ދަރުބާރު ފެކްޝަން"ގެ ތެރޭގައި ވެސް ކޯޅުންތައް އިތުރުވުމެވެ.
2018 ވަނަ އަހަރުގެ ރިޔާސީ އިންތިހާބުގައި ޕީޕީއެމް އިން ކެމްޕެއިން މެނޭޖަރަކު އައްޔަން ކުރުމުގެ ވާހަކަތައް އެ ޕާޓީގެ ތެރޭގައި ދެކެވެމުން ދާއިރު، އެ މަޤާމު ހޯދުމަށް "ދަރުބާރު" ފެކްޝަން ތެރޭގައި ބޮޑު ވާދަވެރިކަމެއް ވަނީ އުފެދިފައެވެ.
މި ވާދަވެރިކަމުގެ ތެރެއިން އެއްބަޔަކު އަނެއް ބައެއްގެ "ފަތިފުށް" ހަމަކުރަމުން ގެންދާއިރު، ވައްކަމުގެ ތުހުމަތާއި ކޮރަޕްޝަންގެ ތުހުމަތު ވެސް ދަނީ ކުރަމުންނެވެ. މިފަދަ ތުހުމަތު ތަކާއި އެކު ސޯޝާލް މީޑިޔާގައި ދައުރުވަމުންދާ ޕޯސްޓްތަކުން ފެންނަމުން ދަނީ ރައްޔިތުން ފިއްކަނޑައިގެން ދާނެ ފަދަ އަދަދުތަކެވެ. "ދިރުވާލައިފި" ކަމަށް އަދި "ކަޓުވާލައިފި" ތުހުމަތު ކޮށްފައި އެ ވަނީ އެތައް މިލިއަން ޑޮލަރެކެވެ.
ސޯޝަލް މީޑިޔާގައި ދައުރުވާ މިފަދަ ޕޯސްޓްތަކުގައި ހާމަކޮށްފައިވާ އެއްވެސް މައްސަލައެއް މިހާތަނަށް ރަސްމީ އިދާރާއަކުން ބަލަމުން ނުގެންދެއެވެ. އެހެން ކަމުން އޭގެ ހަގީގަތަކީ، ކޮބައިކަމެއް ނޭނގެއެވެ.
'ޕީޕީއެމްގެ އެތެރޭގެ ކޮރަޕްޝަން' ކަމަށް ބުނާ ޕޯސްޓްތަކުގައި މައިގަނޑު ގޮތެއްގައި ތުހުމަތުތައް ކުރެވިފައި ވަނީ، ފެނަކަ އަދި އެމްއާރްޑީސީގެ އެމްޑީ ކަން ވެސް މީގެ ކުރިން ކުރެއްވި މުހައްމަދު ނިމާލު އަށާއި މިފްކޯގެ ސީއީއޯ އަދްލީ އަށެވެ.
'އައްޑޫލައިވް' އާއި ވާހަކަ ދައްކަވަމުން ޕީޕީއެމްގެ ޕީޖީ ގްރޫޕްގެ މެންބަރަކު ވިދާޅުވީ، ސޯޝަލް މީޑިޔާގައި މިހާރު ދައުރުވަމުންދާ "ޕީޕީއެމްގެ އެތެރޭގެ ފަތިފުށް" ހާމަކުރުމުގެ މަސައްކަތަކީ ކެމްޕެއިންމެނޭޖަރ ކަން ހޯދުމަށް ރެވޭ "ހަނގުރާމަ" ކަމަށެވެ.
"ނިމާލް ހުންނެވި ގްރޫޕަކަށް، އެބޭފުޅާއަށް ކޮރަޕްޝަނުގެ ތުހުމަތުކޮށް ޕޯސްޓެއް ކުރުމުން، ނިމާލު ވަނީ ގާތްގަނޑަކަށް ގަޑިއެއްހާ އިރަށް އެކަމަށް ރައްދު ދެއްވާފައި. ސޯޝަލް މީޑިޔާގައި އަދުލީ އަށް އަމާޒުކޮށް ފާޑުކިޔުން އަންނަން ފެށި ހިސާބަކީ އެއީ." ޕީޕީއެމްގެ ކައުންސިލް މެންބަރަކު ވިދާޅުވިއެވެ.
" އަޅުގަނޑުމެންނަށް ވެސް އެނގޭ ތަންތަނުން ވައްކަން ކުރަނީ ކޮންބައެއް ކަމާއި އަދި ކުރަނީ ކީއްކަން" ޕީޕީއެމްގެ ވައިބަރ ގްރޫޕަކަށް ނިމާލު ފޮނުއްވި މެސެޖެއްގައި ވެއެވެ. އެ މެސެޖްތައް ނިމާލު ވަނީ ފަހުން ޑިލީޓް ކުރައްވާފައެވެ.
މިފްކޯގެ ސީއީއޯ ކަމުގައި ހުންނެވި އަދްލީ އަކީ، ސޯޝަލް މީޑިޔާގައި ސަރުކާރު ޕްރޮމޯޓް ކުރުމަށް މަސައްކަތް ކުރާ "އަސުރުމާ" އަށް އެހީތެރިކަން ފޯރުކޮށްދެއްވާ ބޭފުޅެކެވެ. ރައީށް ޔާމީންގެ އަނބިކަނބަލުން ފާތިމަތު އިބްރާހިމް އާއި އެކު ކެމްޕެއިން ހަރަކާތްތަކުގައި މަސައްކަތް ކުރެއްވި ނަމަވެސް، މިފްކޯގެ ކަންތައް ބޮއްސުންލާފައި ވާތީ އަދްލީގެ ޤާބިލް ކަމާއި މެދު ސަރުކާރުގެ ތެރެއިން ވެސް ދަނީ ސުވާލު އުފައްދަމުންނެވެ.
މީގެ އިތުރުން، މުހައްމަދު ނިމާލް އަކީ ފެނަކަ ކޯޕަރޭޝަންގައި ހުންނެވި ދުވަސްވަރު ކަރަންޓުގެ މައްސަލައިގައި އެތައް ބައެއްގެ ނުރުހުން އަމާޒުވި ބޭފުޅެކެވެ. އެންމެ ފަހުން އެމްއާރްޑީސީގެ އެމްޑީ ކަމުގައި ހުންނެވި އިރު ވެސް ރައްޔިތުންނާއި އެހާއި ގުޅުން ރަނގަޅު ބޭފުޅެއް ގޮތުގައި ފާހަގަކުރެވިފައެއް ނުވެއެވެ.
ކެމްޕެއިން މެނޭޖަރ ކަން ހޯދުމަށް ޕީޕީއެމްގެ "ދަރުބާރު ފެކްޝަން" ތެރެއިން ފެށިފައި މިވާ "ހަނގުރާމަ" އިން މިހާތަނަށް ރައްޔިތުންނަށް ހާމަވެފައި ނުވާ އެތައް ކޮރަޕްޝަނުގެ މައްސަލައެއް ދަނީ ހާމަވަމުންނެވެ. ކުރިއަށް އޮތް ދުވަސްތަކުގައި މިފަދަ އެތައް މައްސަލައެއް ފެންމަތިވާނެ ކަމަށް ބެލެވެއެެވެ.