ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހީމް ބޭސް ފަރުވާ އަށް ރާއްޖޭން ބޭރަށް ވަޑައިގަތުމުގެ ހުއްދަ ސަރުކާރުން ނުދޭ މައްސަލަ ހިއުމަން ރައިޓްސް ކޮމިޝަން (އެޗްއާރްސީއެމް) އަށް ހުށަހަޅައިފި އެވެ.
ގާސިމްގެ ގާނޫނީ ވަކީލުންގެ ޓީމުން މިއަދު ނެރުނު ބަޔާނެއްގައި ބުނަނީ މި މަހުގެ 16 ވަނަ ދުވަހުގެ މެންދުރެއްހާ އިރު ދިމާވި ކުއްލި އާލާސްކަންފުޅާ ގުޅިގެން އޭޑީކޭގެ އައިސީޔޫގައި މިވަގުތު ފަރުވާ ދެމުންދާ ގާސިމްގެ ހާލުކޮޅު ދުވަހަކަށް ވުރެ ދުވަހެއް ދަށްވެ، އެމަނިކުފާނުގެ ފުރާނަފުޅަށް ނުރައްކާވެފައިވާ ކަމަށެވެ.
އެހެންވެ އެކޮމިޝަނަށް ލިބިދޭ ގާނުނީ ބާރުގެ ދަށުން އެ މައްސަލައާ ގުޅިގެން އަވަސް ފިޔަވަޅުތަކެއް އަޅައި ދިނުމަށް ގާސިމްގެ ވަކީލުން ވަނީ އެދިފައެވެ.
"ނަފުސު ރައްކާތެރިކުރުމުގެ ހައްގުން ގާސިމް އިބްރާހީމް މަހުރޫމް ކުރެވިފައިވާއިރު، އެމަނިކުފާނުގެ ފުރާނަފުޅާމެދު ނަގަންޖެހިދާނެ ޒިންމާއަކަށް ޖެހިލުންވުމެއްނެތި، ދުސްތޫރީ ހައްގުތައް ދިވެހި ރައްޔިތުންނަށް ކަށަވަރުކޮށްދިނުމާއި އިންސާނީ ކަރާމާތާއި ހަމަހަމަކަން ނެގެހެއްޓުމަށް ގާނޫނުއަސާސީން އެބަޔަކާ މަތިކޮށްފައިވާ ފަރާތްތައް ޒިންމާދާރުކަމާއެކު އެވާޖިބު އަދާކުރުމަށް ގޮވާލަމެވެ." ގާސިމް ބަޔާނުގައި ވެއެވެ.