އަންނަ ސެޕްޓެމްބަރު މަހުގެ ހައެއްގައި ރިލީޒް ކުރަން ހަމަޖެހިފައިވާ އަބްދުލް ފައްތާހުގެ އާ ފިލްމް "ހައްދު" ގެ ޓްރެއިލާ ދައްކައިލުމާ އެކު ގިނަ ބަޔަކަށް ވަނީ ޓްރެއިލާ ވަރަށް ކަމުގޮސްފަ އެވެ.
އެހެންވެ ފިލްމް ބަލާލުމުގެ ޝައުގުވެރިކަން ބޮޑު ކަމަށް ޓްރެއިލާ އަށް ކޮމެންޓް ކުރި ބައެއް މީހުން ބުނެފައިވެ އެވެ.
"ހައްދު" އަކީ މަހުދީ އަހުމަދުގެ ސްކްރީންޕްލޭއަކަށް ފައްތާހު ޑައިރެކްޓްކޮށްފައިވާ ލޯބީގެ ތަފާތު ވާހަކައެއް ކިޔައިދޭ ފިލްމެކެވެ.
ޓްރެއިލާ ބެލި ބައެއް މީހުން ބުނެފައިވާ ގޮތުގައި ފިލްމުގައި ބަލާ ހިތްވާ ކަހަލަ ކަންތައްތަކެއް އެކުލެވޭނެކަން ޓްރެއިލާ އިން ސާބިތުކޮށްދެ އެވެ. އަދި ފިލްމުގެ މަންޒަރުތައް ވަރަށް ރީތި ވާނެ ކަމަށް ގަބޫލު ކުރެވޭ ކަމަށް ވެސް ބުނެފައިވެ އެވެ.
"ހައްދު" ގެ ލީޑް ރޯލުން ފެނިގެން ދާނީ މަރިޔަމް އައްޒަ އާއި އައިމިނަތު ރިޝްފާއާ އެކު ފިލްމީ ދާއިރާ އަށް އަލަށް ތައާރަފުވާ އަހުމަދު ޝިބާން އެވެ.
މި ފިލްމްގެ މަންޒަރުތައް ނަގާފައި ވަނީ ރ. ވާދު އާއި ހއ. ކެލާ، އުތީމު އަދި މާލެ އާއި ގިލިލަންކަންފުށި ރިސޯޓްގަ އެވެ.
ފައްތާހު ބުނެފައިވާ ގޮތުގައި "ހައްދު" ވެގެން ދާނީ އޭނާ މިހާތަނަށް ބެލުންތެރިންނާ ހަމައަށް ގެނެސްދޭ އެންމެ ތަފާތު އަދި އެންމެ މޮޅު ފިލްމަށެވެ.
މީފގެ ކުރިން ވެސް ކާމިޔާބު ފިލްމްތަކެއް ގެނެސް ދީފައިވާ ޑައިރެކްޓަރު ބުނީ "ހައްދު" އަކީ މޮޅުވެފައި ވަރަށް ރީތި ވާނެ ފިލްމެކެވެ. އެހެންވެ މި ފިލްމް ޕްރޮމޯޓް ވެސް ކުރަނީ ރެކޯޑް ބްރޭކިން މޫވީއެއްގެ ގޮތުގަ އެވެ.
ސެޕްޓެމްބަރު ހައެއްގައި އޮލިމްޕަހުގައި "ހައްދު" ޕްރިިމިއާ ކުރުމަށް ފަހު، މި ފިލްމް އައްޑޫގައި ސެޕްޓެމްބަރު މަހުގެ ހަތް ވަނަ ދުވަހުގެ ރޭ ވަރަށް ކުލަގަދަކޮށް ޕްރިމިއާ ކުރަން ރާވަމުން އަންނަ ކަމަށް އެނގިފައިވެ އެވެ.