ސުޝާންތު ސިންގް ރާޖްޕުޓް އާއި ޖެކޮލިން ފެނާންޑޭޒް ލީޑް ރޯލް ކުޅޭ ފިލްމް "ޑްރައިވް" ގެ ފަސްޓްލުކް ދައްކާލައިފި އެވެ.
މި ފިލްމަކީ ކަރަން ޖޯހަރްގެ ދަރްމާ ޕްރޮޑަކްޝަނާއި ފޮކްސް ސްޓާ ސްޓޫޑިއޯ ގުޅިގެން ހަދާ ފިލްމެކެވެ. ފިލްމުގެ ފަސްޓްލުކް ކަރަން ވަނި ޓްވިޓާގައި ފޭނުންނާ ހިއްސާކޮށްފަ އެވެ.
"ޑްރައިވް" ލިޔެ، ޑައިރެކްޓް ކުރަނީ ތަރުން މަންސުކާނީ އެވެ. އޭނާއަކީ 2008 ވަނަ އަހަރު ކަރަންގެ ދަރްމާގެ ކާމިޔާބު ފިލްމް "ދޯސްތާނާ" ގެ ޑައިރެކްޓަރެވެ. އަދި މިއީ އެ ފިލްމަށް ފަހު ތަރުން ޑައިރެކްޓް ކުރާ ފުރަތަމަ ފިލްމް ވެސް މެ އެވެ.
އެހެންވެ ފިލްމަށް ކުރެވޭ އުންމީދުތައް ވަރަށް ބޮޑެވެ. ޕްރިޔަންކާ ޗޯޕްޅާ އާއި ޖޯން އަބްރަހަމް އަދި އަބިޝެކް ބައްޗަން ލީޑް ރޯލް ކުޅުނު "ދޯސްތާނާ" އަކީ ވަރަށް ކާމިޔާބު ފިލްމެކެވެ.
އެ ފިލްމް ރިލީޒް ކުރިތާ ހަތް އަހަރު ފަހުން ތަރުން ޑައިރެކްޝަނަށް ނިކުމެ ހަދާ ފުރަތަމަ ފިލްމް "ޑްރައިވް" ސިނަމާތަކަށް އަންނާނީ އަންނަ އަހަރުގެ ހޮލީގަ އެވެ.
މި ފިލްމްވެގެން ދާނީ ސުޝާންތާއި ޖެކޮލިން އެކުގައި ކުޅޭ ފުރަތަމަ ފިލްމަށެވެ.