ބޮލީވުޑްގެ މަޝްހޫރު ބަތަލާ ކާޖޮލްގެ ކެރިއަރަށް ބަލާ އިރު އޭނާގެ އެންމެ ކާމިޔާބު ދެ ފިލްމަކީ ޑައިރެކްޓަރު ކަރަން ޖޯހަރްގެ ދެ ފިލްމެވެ. އެއީ ކުޗް ކުޗް ހޯތާ ހޭ (1998) އާއި ކަބީ ހުޝީ ކަބީ ޢަމް (2001) އެވެ.
އެހެން ނަމަވެސް ދާދި ފަހުން ކަރަން އާއި ކާޖޮލްއާ ދެމެދު މައްސަލަތައް އުފެދި ގުޅުން ވަނީ ވަރަށް ބޮޑަށް ގޯސްވެފަ އެވެ. މި ދެ މީހުންނަކީ މިހާރު އެކަކު އަނެކަކުގެ މޫނު ވެސް ފެންނަން ބޭނުން ނުވާ ދެ މީހުންނެވެ.
މި މައްސަލަގަނޑު އުފެދުނީ މިދިޔަ އަހަރު ރިލީޒް ކުރި ކަރަންގެ "އޭ ދިލް ހޭ މުޝްކިލް" އާއި ކާޖޮލްގެ ފިރިމީހާ އަޖޭ ދޭވްގަންގެ "ޝިވާއޭ" އެއް ދުވަހެއްގައި ރިލީޒް ކުރަން ނިންމުމާއި އޭގެ ފަހުން ހިނގައި ދިޔަ ކަންތައްތަކާ ހެދި އެވެ.
އަމިއްލަ އަށް މާ ބޮޑު ކްރިޓިކަކަށް ހެދިގެން އުޅޭ ކަމަލް އާރް ހާން (ކޭރްއާރްކޭ) އެ ދުވަސްވަރު ކުރި ޓްވީޓެއްގައި ވަނީ އަޖޭގެ ފިލްމާ ބެހޭ ގޮތުން ނެގަޓިވް ވާހަތަކެއް ދައްކަން ކަރަން އޭނާ އަށް ވަރަށް ގިނަ އަދަދެއްގެ ފައިސާ ދީފައިވާ ކަމަށް ބުނެ ޓްވީޓްކޮށްފަ އެވެ.
ކަރަން އާއި ކާޖޮލްގެ ގުޅުން އެންމެ ބޮޑަށް ގޯސްވީ މި ސަބަބާ ހެދި އެވެ. އެކަމަކު ކަރަން ވަނީ އެފަދަ އެއްވެސް ކަމެއް ނުކުރާ ކަމަށާއި އޭނާއަކީ އެހާ ދަށް ފެންވަރުގެ މީހެއް ނޫން ކަމަށް ބުނެފަ އެވެ.
އެހެން ނަމަވެސް ކަރަންގެ ވާހަކަ ކާޖޮލް ވެސް އަދި އަޖޭ ވެސް ގަބޫލެއް ނުކުރި އެވެ. ނަތީޖާއަކީ ގުޅުން ގޯހުން ގޯހަށް ގޮސް މޫނު ކެނޑުމެވެ.
މިކަމާ ގުޅިގެން ފަހުން ކަރަން ބުނީ ކާޖޮލް އާއި އޭނާއާ ދެމެދު އޮތް ގުޅުން ނިމުނީ ކަމަށާއި އޭނާގެ ވާހަކަ ދެން ދައްކަން ވެސް ބޭނުން ނުވާ ކަމަށެވެ.
ކާޖޮލް ބުނީ ކަރަންއާ އެކު ދެން ދުވަހަކު މަސައްކަތް ނުކުރާނެ ކަމަށާއި އެކަމާ އެއްވެސް ސުވާލެއް ނެތް ކަމަށެވެ.
"ވާހަކަ ނުދައްކާ ދެ މީހަކު އެކުގައި މަސައްކަތް ކުރާނެ ގޮތެއް އަހަންނަކަށް ނޭނގޭއ. ކޮންމެ ކަމެއް ވެސް ކުރެވޭނީ މުއާމަމާތްކޮށްގެން. މިހާރަކު ކަރަންއާ އަހަންނަކާ އެކަހަލަ ގުޅުމެއް ނެތް،" ދާދި ފަހުން ރާއްޖޭގައި ޗުއްޓީ ވެސް ހޭދަ ކުރި ބަތަލާ ބުންޏެވެ.
ކާޖޮލްގެ ކުރިއަށް އޮތް ތަމަޅަ ފިލްމް "ވީއައިޕީ 2" ގެ ޕްރޮމޯޝަނަލް އިވެންޓެއްގެ ތެރޭގައި ކާޖޮލް އަދި ބުނީ ކަރަންގެ މައުޟޫއަށް އޭނާ އެއްވެސް ވާހަކައެއް ދައްކަން މިހާރު ޝައުގުވެރި ކަމެއް ނެތް ކަމަށެވެ.
"އެކަމަކު އަހަރެންނާ ގުޅުން ރަނގަޅު ރައްޓެއްސަކު ފިލްމެއް ހުށަހަޅައިފި ނަމަ އެ ފުރުސަތުގެ ބޭނުން ހިފާނަން،" އޭނާ ބުންޏެވެ.