ފުލުހުންގެ ނަމުގައި ހަޤީޤަތާއި ޚިލާފު ވާހަކަތައް ފެތުރުމާއި، ފުލުހުންގެ މުޢައްސަސާގެ އަގު ވައްޓާލައި، އެކަމަށް ހިތްވަރު ލިބޭ ގޮތަށް މަސައްކަތް ކުރާ ފަރާތްތައް ހޯދައި ޤާނޫނީ ފިޔަވަޅު އަޅާނެ ކަމަށް ފުލުހުން ބުނެފި އެވެ.
ފުލުހުން ނެރުނު ނޫސް ބަޔާނެއްގައި ބުނީ މިހާރަކަށް އައިސް ވަކި ވަކި ފުލުހުންނާއި، ފުލުހުންގެ ޢާއިލާތަކުގެ ފޮޓޯ އާއި މަޢުލޫމާތު ހާމަކޮށް، ސޯޝަލް މީޑިޔާގެ އެކި ވަސީލަތްތައް ބޭނުންކޮށްގެން ފުލުހުންނަށް އިންޒާރުދެމުން އަންނަކަން ފާހަގަ ކުރެވޭ ކަމަށެވެ.
އަދި ފުލުހުންނާ މެދު ރައްޔިތުންގެ ހިތްތަކުގައި ރުޅިވެރިކަމާއި ނަފުރަތު އުފައްދައި، ފުލުހުންނަށް އަނިޔާވެރިވުމަށް ހިތްވަރު ލިބޭގޮތަށް ބައެއް ފަރާތްތަކުން ކުރަމުންދާ މަސައްކަތްތައް އެގޮތަށް ނުކުރުމަށް ނޫސް ބަޔާނުގައި ވަނީ އިލްތިމާސްކޮށްފަ އެވެ.
ހަމަމިއާ އެކު ފުލުހުންގެ ނަމުގައި ހަޤީޤަތާއ ޚިލާފު ވާހަކަތައް ފެތުރުމާއި، ފުލުހުންގެ މުއައްސަސާގެ ޤަދަރާއި އިޙްތިރާމް ގެއްލުވާލުމަށް ހިތްވަރުލި ބޭގޮތަށް ބައެއް ފަރާތްތަކުން ކުރާ މަސައްކަތްތައް ހުއްޓާލުމަށް ފުލުހުން އަންގާފައިވެ އެވެ.