ވަރަށް މަދުން ނޫނީ ނުފެންނަ ޖެނެޓިކް ބައްޔަކަށް ފަރުވާ ހޯދަމުން ދިޔަ އުމުރުން 11 މަސް ދުވަހުގެ ތުއްތު ތުއްތު ޗާލީ ގާޑް މަރުވެއްޖެ ކަމަށް އޭނާގެ އާއިލާ އިން ހާމަކޮށްފިއެވެ.
އެ ބަލީގެ ސަބަބުން ހުއްޓުމެއްނެތި ޗާލީގެ ސިކުނޑިއަށް ދިޔައީ ގެއްލުންވަމުންނެވެ. އަދި އޭނާގެ ހަށިގަނޑުގެ މަސްތައް ދިޔައީ ދުވަހުން ދުވަހަށް ބަލިކަށިވަމުންނެވެ.
ޗާލީގެ މައިންބަފައިން ކަމަށްވާ ކޯނީ ޔޭޓްސް އާއި ކްރިސް ގާޑް ވަނީ އެ ބައްޔަށް ފަރުވާ ހޯދުމަށްޓަކައި ޗާލީ އެމެރިކާ އަށް ގެންދިއުމުގެ ހުއްދަ ހޯދުމަށްޓަކައި ގިނަ ދުވަސްތަކެއް ވަންދެން ގްރޭޓް އޯމަންޑް ސްޓްރީޓް ހޮސްޕިޓަލް (ގޯޝް) އާއި ހަނގުރާމަކޮށްފައެވެ.
އެ ހޮސްޕިޓަލާއި ދެކޮޅަށް އެމީހުން ހުށައެޅި މައްސަލަ ހޯމަ ދުވަހު އެމީހުން ވަނީ އަނބުރާ ގެންގޮސްފައެވެ. އެއީ މިހާރު ފަރުވާ އަށް މާ ލަސްވެއްޖެ ކަމަށް ޗާލީ އަށް ފަރުވާ ދިނުމަށް އެއްބަސްވި އެމެރިކާގެ ނިއުރޯލޮޖިސްޓް ބުނުމުންނެވެ.
ހުކުރު ދުވަހު އާންމު ކުރި ބަޔާނެއްގައި ޗާލީގެ މަންމަ ކޯނީ ޔޭޓްސް ވަނީ އޭނާގެ ލޯބިވާ ދަރިފުޅު މި ދުނިޔެ އަށް އަލްވަދާއު ކިޔައިފި ކަމަށް ބުނެފައެވެ.
އިނގިރޭސިވިލާތުގެ ބޮޑު ވަޒީރު ތެރީސާ މޭ ވަނީ ޗާލީގެ މަރާއި ގުޅިގެން އޭނާގެ އާއިލާއަށް ހަމްދަރުދީގެ މެސެޖެއް ފޮނުވާފައެވެ.
ޗާލީގެ މައިންބަފައިން ދިޔައީ އޭނާއަށް ނިއުކްލިއޮސައިޑް ބައިޕާސް ތެރަޕީ ދިނުމަށްޓަކައި އެމެރިކާ އަށް ގެންދިއުމުގެ މަސައްކަރް ކުރަމުންނެވެ. އެހެންނަމަވެސް ގޯޝް ގެ ސްޕެޝަލިސްޓުން ބުނި ގޮތުގައި އެއީ އެކްސްޕެރިމެންޓެއް ކަމަށާއި، ޗާލީގެ ސިކުނޑިއަށް ލިބިފައިވާ ގެއްލުމަކީ އެއްގޮތަކަށް ވެސް ރަނގަޅު ކުރެވޭނެ ގެއްލުންތަކެއް ނޫން ކަމަށެވެ.
އެތައް ސަތޭކަ މީހުން ވަނީ ޗާލީ އެމެރިކާ އަށް ގެންދިއުމަށްޓަކައި އޭނާގެ މައިންބަފައިންނަށް 1.35 މިލިއަން ޕައުންޑް ގެ އެހީއެއް ދީފައެވެ.
މީގެ ދުވަސްކޮޅެއް ކުރިން ޗާލީ ހެދި އެމްއާރްއައި އަކުން ދެއްކި ގޮތުގައި އޭނާގެ ހަށިގަނޑުގެ ބައެއް ސަރަހައްދުތަކުގައި އެއްވެސް ވަރަކަށް މަހެއް ނެތެވެ.
ޗާލީގެ މަންމަ އާއި ބައްޕަ ޤަބޫލުކުރާ ގޮތުގައި ވީހާވެސް އަވަހަށް ޗާލީ އެމެރިކާ އަށް ގެންގޮސް ތެރަޕީ ދޭން ފެށިނަމަ، އޭނާގެ ޙާލަތު ރަނގަޅުވީސް ކަމަށެވެ.