މީގެ ދެތިން ހަފުތާއެއްކުރިން އެއްރެޔަކު ވަރަށް ދަންކޮށްފައި ގެޔަށްވަދެ ޓީވީ ހުޅުވައިލިއިރު އެންމެފުރަތަމަވެސް ފެނުނީ ބަންޑާރަ ޓީވީއެވެ. ޗެނަލް ބަދަލުކޮށްލަންވީއޭ ހިތަށް އެރިތަނާ ފެނުނީ މާވަރުގަދަ ސިޔާސީ ޝަޚުސިއްޔަތެކެވެ. ދެން މީނާ މިކިޔާ އެއްޗަކާ ދޭތެރޭ ވިސްނައިލިއިރު މިކިޔަނީ މުޅީންވެސް މިސާލުބަހެވެ. ޖަހާހާ ގުގުރިޔަކުން ހޮނެއް ނާޅައޭ އަޑެއް ކިޔާ ކޮންމެފަހަރަކު ރެނދެއްވެސް ނުލައޭ ނަގާހާ ވިލާގަނޑަކުން ފެނެއްވެސް ނުފައިބަޔޭ މިޒާތުގެ ބަސްތަކެކެވެ.
މީނާގެ ވާހަކައިގެ މަތުލަބަކީ އިދިކޮޅު ޕާޓީތަކުން ކިތަންމެ ފޮނެއް އެރުވިޔަސް ވާނެ ހަމައެއްކަމެއްވެސް ނޯންނާނެކަން ބުނެދިނުމެވެ. ތިމަންނާމެން މިހެން ހަމަޖެހިގެން ތިބޭނީއޭ އެއްވެސް ލޮޅުމެއް އަރުވައިނުލެވޭނެޔޭ ބުނެދިނުމެވެ. އެކަމަކު ހަގީގަތަކީ ކޮބައިބާވައެވެ. މިހުރިހާ ދުވަހު އެމީހެއްގެ ގޮނޑި ދިފާއުކޮށްދޭން ފޫގަޅައިގެން އުޅުނު މީހާގެ އިތުބާރު ގެއްލި އޭނާގެ ޕާސްޕޯޓުވެސް އެންމެފަހުން ހިފަހައްޓައިފިއެވެ. ސިޔާސީ މީހުންނާ ދެކޮޅަށް ދައުވާ އުފުލުމުގެ ޒިންމާ ހަވާލުކުރި ޕީޖީވެސް އެންމެފަހުން ގޯސްވެއްޖެއެވެ.
ލޮޅުން އެރިއެރީނުން މުޅި ނިޒާމު ގުޑައިފިއެވެ. މަޖިލީހުގައި ބޮޑު ތަޅުއަޅުވައިފިއެވެ. ގާނޫނުއަސާސީއާ ކުޅެފިއެވެ. ރައްޔިތުން ހޮވާފައިތިބި އެތައް މަންދޫބުންނެއް ހުރަގެޔަށް ލައިފިއެވެ. މިހެންގޮސް ވަރަށް ގިނަ ކަންކަމެވެ. އެހެންވީމާ މިއޮތީ ހޮނުވެސް އަޅާފައެވެ. ރެނދުވެސް ލައިފައެވެ. ވާރޭވެސް ވެހިފައެވެ.
ވިހިވަނަ ސައްތައިގެ މެދުތެރޭގައި މާލޭގައި އުޅުނު ގޯނިބޭ ކުޑައަލީ ވެސް މިސާލުބަސް ކިޔައި އުޅުނެވެ. އޭނާގެ މިސާލުބަސްތަކުގެ މާނަވެސް ފުންވެފައި މާނަލައެވެ. ކުޑައަލީ ބުނެއެވެ. އޮޔާދާ ކާށްޓަކުން ރުކެއް ނުފަޅާނެއެވެ. ކުޑައަލީއަކީ ވަދާގޮސްއުޅުނު މީހެކެވެ. އެއްފަހަރަކު ވަދާދިޔަގޮތަށް އެނބުރި ނާދެއެވެ. ބައްތެއްޔާއެކު އޮޔާގޮސް ނިމުނީއެވެ. ގެއްލުނީއެވެ.
ހާލަތާއި ވަގުތާއި ގުޅޭ މިސާލުބަސް ކިޔުމުގައި ބަންޑާރަ ޓީވީން ފެނުނު މީހާއަށްވުރެ އަހުރެންނަށް ގޯނިބޭކުޑައަލީވެސް މާމޮޅެވެ. އެހެނަސް މިހާރު މިއީ އަލީގެ ޒަމާނެއް ނޫނެވެ. މިހާރު މީ އެހެން ޒަމާނެކެވެ. މިޒަމާނުގައި ބޮޑަށް ވިކޭކަމަށް ބައެއް މީހުން ހީކުރަނީ ދެކޮޅުނުޖެހޭ ވާހަކަތަކާއި ދެކޮޅުނުޖެހޭ ކަންކަމެވެ. އެންމެ ގިނައިން ޓީވީތަކަށް އަރައިތިބެނީ ދެކޮޅުނުޖެހޭ ކަންކަން ދެކޮޅުޖެއްސޭތޯ ދެކޮޅުނުޖެހޭ ވާހަކަ ދައްކާ މީހުންނެވެ. ދެން މިސާލުބަހާއި ހަރުބަހާއި މިހެންގޮސް އަޑުއިވިފައި ހުންނަ ބޯދާ ބަސްބަސް އެކިގޮތްގޮތަށް އަނބުރައިގެން ވާހަކަތަކެއް ދައްކާފައި ފައިބާނެއެވެ. ރައްޔިތުންގެ ބޮލަށް ވައްދައިދެވޭ ހަމައެކައްޗެއްވެސް ނޯވެއެވެ.
ތަފާތު ދެދުލަކުން ދެދުވަހު ދެގޮތަށް ވާހަކަ ދައްކާން ޖެހުނީމާ ފޫބެއްދޭނެ ގޮތެއްވެސް ނޯންނާނެއެވެ. މިހާރު ސަރުކާރުގެ ދިފާއުގައި ހަރުއަޑުން ވާހަކަދައްކާ ހަމަކޮންމެ މީހަކީ މީގެ ދުވަސްކޮޅެއްކުރީން އިދިކޮޅު ސަފުން ފެނުނު މީހެކެވެ. އޭރު ބުނެއެވެ. ވެރިކަން ނުކުރެވެންޏާ ވައްޓައިލަންވީއެވެ. އޭރު ބުނެއެވެ. ފުލުހުން ސިޔާސީ ނުވާށެވެ. އޭރު ބުނެއެވެ. ބަންޑާރަ ޓީވީ ވަރަށް މިނިވަންވާން ވާނެއެވެ. އޭރު ބުނެއެވެ. ތިންބާރު އޮންނާން ޖެހޭނީ ވަކިވެފައެވެ. އޭރު ބުނެއެވެ. ސްޕްރީމްކޯޓުގައި ތަޅުއެޅުވުން ގޯހެވެ.
މިހާރު ދަރުބާރު ފެކްޝަނުގެ ބޮޑުއަށިމަތީން ޖާގަލިބުނީމާ އޭރު ދެއްކިވާހަކަތައް މިޖެހެނީ ނަފީކުރާށެވެ. މިހާރު ވެރިމީހާ ގޯސްވިޔަސް ވައްޓައިލާށޭ ބުނެގެން ނުވެއެވެ. ފުލުހުން ސިޔާސީ ވިޔަސް އަދި ރެޔާއިދުވާލު ސިޔާސީ މީހުން ފަހައިދުވުނަސް މިހާރު އެކަން ހަމަ ބަރާބަރެވެ. ބަންޑާރަ ޓީވީ ތިމާމެންގެ އަމިއްލަ ސަންގުކަމަށް ހަދައިގެން އުޅުން މިހާރު ހަމަ ބަރާބަރެވެ. ތިންބާރު ވަކިނުވެ މަސްހުނިވެ ބޮޑުބާރުގެ މުށުތެރޭގައި އޮތުމަކީ މިހާރު އެކަން އޮންނަންޖެހޭ ގޮތެވެ. ރައްޔިތުންގެ މަޖިލީހުގައި ތަޅުއެޅުވުންވެސް މިހާރު ހަމަބަރާބަރެވެ. ތިމާމެންގެ ހާލަތު ބަދަލުވީމާ ދެން އެވީ ހުރިހާކަމެއް ބަރާބަރެވެ. އިހަށް ބަރާބަރުނުވީ އިދިކޮޅުފަޅީގައި ތިބޭން ޖެހުމުންނެވެ.
މިހިރަމިހިރަ ކަންކަމަކީ ޑިމޮކްރަސީއާ ބީރައްޓެހި ކަންކަމެވެ. މަމެން މިކިޔަނީ ޑިމޮކްރަސީގެ ވާހަކައެވެ. ގާނޫނީ ހުކޫމަތެއްގެ ވާހަކައެވެ. އަދުލުއިންސާފުގެ ވާހަކައެވެ. ގައުމެއް ފުރާފުރިހަމަވެ ބާރަށް ކުރިޔަށް ދިއުމަށް މިކަންކަން ބަރާބަރަށް އޮތުން މުހިއްމެވެ. ދެން މިވާހަކަ ދައްކާ މީހުން ކުށްވެރިކޮށް އަމިއްލަ އެދުމޭ ވެރިކަމުގެ ދަހިވެތިކަމޭ ފަސާދައޭ ރިޔާސީ ނިޒާމޭ ކިޔަކަސް އެވާހަކަތައް ރައްޔިތުން ގަބޫލެއް ނުކުރާނެއެވެ. ގަބޫލުކުރާނީވެސް ފަހެ ކޮންގޮތަކުން ހެއްޔެވެ. ފުރިފައިހުރި އެއްޗެއް ގުޑުގުޑެއް ނާޅާނެޔޭ މިތިބީ ފުދިގެން ސާބިތުކަންމަތީގައޭ ބުނާއިރު ގުޑުގުޑުއަޅާވަރުން މިގައުމުގެ ދަރިޔަކަށް ރޭގަޑު ނިދެނީއެއްވެސް ނޫނެވެ. ކުޑައަލީ ބުނިހެން އޮޔާދާ ކާށްޓެކޭ މިމީހުންނެކޭ އެއްވެސް ތަފާތެއް ނެތެވެ.