ރޭ މާލޭގައި ރަހުމުކުޑަ ގޮތަކަށް ހިންގި މާރާމާރީއެއްގައި ދުނިޔެ ދޫކުރި އުމުރުން 25 އަހަރުގެ މުހައްމަދު އަނަސް ދިޔައީ މި މަހު އޭނާގެ އަލަތު ކައިވެންޏަށް ތައްޔާރުވަމުން ކަމަށް އޭނާގެ އާއިލާއިން ބުނެފި އެވެ.
އަނަސްގެ އާއިލާގެ ފަރާތުން އޮންލައިން ނޫސް "އަވަސް" އަށް މައުލޫމާތު ދެމުން ބުނެފައިވަނީ އަނިޔާވެރިންގެ ހަމަލާއިން ދުނިޔެ ދޫކުރި އަނަސް ދިޔައީ މި ފެށުނު އޮގަސްޓު މަހުގައި އޭނާގެ ލޯބިވެރިޔާއާ ކައިވެނިކޮށް، ޒަވާޖީ ހަޔާތް ފެށުމަށް ތައްޔާރުވަމުންނެވެ.
ރ. އަތޮޅު ފެރީ ލޯންޗުގެ ކެޕްޓަނުގެ ވަޒީފާ އަދާކުރާ އަނަސް މާލެ ގޮސްފައިވަނީ އިއްޔެ ފެރީގެ ދަތުރުވެރިންނާއެކު މާލެއަށް ކުރި ދަތުރެއްގައެވެ. އެނބުރި ރަށަށް ދިއުމުގެ ކުރިން މާލޭގައި މަޑުކުރުމަށްފަހު ލިޓަސް ސައިކަލު ސެންޓަރެއްގެ ތެރޭގައި އަނަސް ހުއްޓާ ސައިކަލުތަކަކުން އައި ބަޔަކު ވަނީ އޭނާގެ ހަށިގަނޑުގެ އެތައް ތަނަކަށް ވަޅި ހަރައި ޒަޚަމްކޮށްލާފައެވެ.
ޚަބަރު ލިބޭ ގޮތުގައި އަނަސްއަށް މިއަނިޔާވެރި ހަމަލާ ލިބިފައިވަނީ ހަމަލާދިން މީހުން ހޯދަމުން ދިޔަ މީހަކު ލައިގެން ހުރި ޓީޝާޓަކާއި ވައްތަރު ޓީޝާޓެއް ލެވުމުންނެވެ. އަނަސްގެ އާއިލާއިން ބުނެފައިވާ ގޮތުގައި އޭނާއަކީ އެއްވެސް ތަނެއްގެ އެއްވެސް ގްރޫޕަކަށް ނިސްބަތްވާ މީހެއް ނޫނެވެ. ދުވަހުގެ ބޮޑުބައި ކަނޑުމަތީގައި ހޭދަކުރާ ޒުވާން ކެޕްޓަނަކީ މީހުނާ ގުޅޭ ހިތްހެޔޮ މިޒާޖެއް ގެންގުޅޭ ޒުވާނެކެވެ.
މިފަދަ އަނިޔާވެރި ނިމުމެއް އައުމުން އަނަސްގެ އާއިލާއަށް ވަނީ ކުއްލި ހުއްޓުމެއް ލިބިފައެވެ. މިއަނިޔާވެރި މަރަށް އިންސާފު ލިބުމަކީ ދުރުކަމެއް ކަމުގައި އާއިލާއިން ދެކެއެވެ. ސަބަބަކަށް ވެފައިވަނީ އަނަސް ފަދަ އެތައް ޒުވާނުން ދުނިޔެ ދޫކޮށް ގޮސްފައިވާއިރު އެއްވެސް މީހަކަށް އިންސާފު ލިބިފައިނުވުމެވެ.
ފުލުހުން މިމައްސަލަ މިހާރު ތަހުގީގު ކުރަމުންދާއިރު އަދި މިހާތަނަށް އެއްވެސް މީހަކު ހައްޔަރުކޮށްފައެއް ނުވެއެވެ. މިދިޔަ ބުރާސްފަތި ދުވަހުވެސް މާލޭގައި ޒުވާނަކަށް ވަޅިން ހަމަލާދިނުމަށްފަހު، ޒަޚަމްތަކަށް ފަރުވާކުރަމުންދަނިކޮށް ޒުވާނާ ވަނީ މަރުވެފައެވެ. އެމައްސަލައާ ގުޅިގެންވެސް ފުލުހުން މީހަކު ހައްޔަރުކޮށްފައިނުވާއިރު ތަހުގީގު ދަނީ ކުރިޔަށެވެ.