މިރޭ އޮލިމްޕަހުގައި ޕްރިމިއާ ކުރާ ފިލްމް "ނޯޓީ 40" އަންނަ ހަފުތާގެ ތެރޭގައި އައްޑޫގައި ވެސް އަޅުވަން ނިންމައިފި އެވެ.
ޔޫސުފް ޝަފީއު (ޔޫއްޕެ) ލިޔެ، ޑައިރެކްޓްކޮށްފައިވާ ފިލްމް މަރަދު އާއި ހިތަދޫގައި ވެސް އަޅުވާނެ އެވެ.
މިކަމުގައި އުޅޭ ޓީމްގެ އޮފިޝަލަކު "އައްޑު ލައިވް" އަށް ބުނީ މަރަދޫ ބޮޑޮގޭގޭގައި "ނޯޓީ 40" އަޅުވާނީ މި މަހުގެ 10-12 އަށް ކަމަށެވެ.
ހިތަދޫ ފިލްމް އަޅުވާނީ އިވްރިވަންސް ލާނިން ސެންޓަރު (އީއެލްސީ) ގަ އެވެ.
"ބޮޑޮގޭގައި މި ފަހަރު ފިލްމް އަޅުވާ އިރު އެތަން ވަނީ އޭސީ ވެސްކޮށްފައި. މިއީ އެތަން ފިނި ކުރުމަށް ފަހު، އަޅުވާ ފުރަތަމަ ފިލްމަށް ވާނެ،" އޮފިޝަލް ބުންޏެވެ. "އެހެންވެ ފިލްމް ބަލަން ވަންނަ މީހުންނަށް މި ފަހަރު ހޫނުވުމުގެ މައްސަލައެއް ދިމައެއް ނުވާނެ."
"ނޯޓީ 40" ގެ ޓިކެޓް ވެސް އައްޑޫގައި މިހާރު އަންނަނީ ނޯޓްކޮށް ދެމުންނެވެ. ގުޅަން ޖެހޭ ހޮޓްލައިނަކީ 7955243 އަދި 7845584 އެވެ.
ފިލްމް އަޅުވާ ޓީމުން ބުނީ ވީހާ ވެސް އަވަހަކަށް ނަން ނޯޓް ކުރަން އެދޭ ކަމަށެވެ. ޓިކެޓްގެ އަގަކީ 100ރ. އެވެ.
"ނޯޓީ 40" އަކީ ބަތަލާ ނިއުމާ މުހައްމަދާއި އިސްމާއީލް ޝަފީގް މިދިޔަ އަހަރު ގެނެސް ދިން ކާމިޔާބު ފިލްމް "ބައިވެރިޔާ" އަށް ފަހު އެ ދެ މީހުން ގުޅިގެން ގެނެސްދޭ ދެވަނަ ފިލްމެވެ.
ގިނަ ރަތަކެއް ހިމެނޭ މި ފިލްމުގެ ކާސްޓުންގެ ތެރޭގައި ޔޫއްޕެ، ނިއުމާ، އަލީ ސީޒަން، މުހައްމަދު މަނިކު އަހުމަދު ސައީދު، މަރިޔަމް އައްޒަ، އިބްރާހީމް ޖިހާދު (ޖިމީ)، ފާތުމަތު އާޒިފާ (އަޒޫ)، އަލީ އާޒިމް (ދޮންއައްޔަ) އަދި ނުޒުހަތު ޝުއައިބް (ނުޒޫ) ފަދަ ތަރިން ހިމެނެ އެވެ.