އަންނަ މަހުގެ ހައެއްގައި އަޅުވާ ފިލްމް "ހައްދު" ގެ ވަރަށް ކުލަގަދަ ޕްރިމިއާއެއް އައްޑޫގައި ބާއްވާނެ ކަމަށް އެ ފިލްމުގެ ޑައިރެކްޓަރު އަބްދުލް ފައްތާހު ބުނެފި އެވެ.
އޭނާ ބުނީ "ހައްދު" މަރަދު އާއި ހިތަދޫގައި ޕްރިމިއާ ކުރާނީ ސެޕްޓެމްބަރު މަހުގެ ހަތް ވަނަ ދުވަހުގެ ރޭ ކަމަށެވެ.
"މި ޕްރިމިއާތަކުގައި ފިލްމުގެ ލީޑް ކާސްޓުންނާއި ބައެއް ލަވަ ކިޔުންތެރިންނާއި ކްރޫގައި ހިމެނޭ ބައެއް މީހުން ވެސް ބައިވެރި ވާނެ،" ފައްތާހް ބުންޏެވެ.
އޭނާ އަދި ބުނީ 21 އަހަރުވީ ފިލްމީ ކެރިއަރުގައި މިހާތަނަށް އޭނާގެ އެއްވެސް ފިލްމެއް ރާއްޖޭގެ ރަށެއްގައި ޕްރިމިއާ ނުކުރާ ކަމަށެވެ.
"އެކަމަކު މި ފަހަރު ވަރަށް ބޮޑުކޮށް މިކަން ބާއްވަން ބޭނުން ވަނީ. ހާއްސަކޮށް އައްޑުއަށް ބަލާ އިރު ވަރަށް މޮޑަން އަދި އެންޓަޓައިންމަންޓަށް ލޯބިކުރާ ބަޔަކު އުޅޭ ތަނެއް އެއީ،" އޭނާ ބުންޏެވެ. "އެހެންވެ އެންޖޯއިކޮށްލެވޭ ކަހަލަ ގޮތަކަށް ޕްރިމިއާ ބާއްވައި ދޭނަން."
ފައްތާހު ބުނީ އޭނާގެ އަމާޒަކީ މި ފަހަރު ފިލްމް ރާއްޖޭގެ ވީހާ ވެސް ގިނަ ރަށްތަކެއްގައި ދެއްކުން ކަމަށެވެ. އެގޮތުން އައްޑޫގައި ވަރަސް އަވަހަށް ފިލްމުގެ ޓިކެޓަށް ހުޅުވާލާނެ ކަމަށް ބުންޏެވެ.
މަހުދީ އަހުމަދުގެ ސްކްރީންޕްލޭއަކަށް ހަދާ "ހައްދު" ގެ ލީޑް ރޯލުން ފެންނަނީ އަލަށް ތައާރަފުވާ އަހުމަދު ޝިބާންއާ އެކު މަރިޔަމް އައްޒަ އާއި އައިމިނަތު ރިޝްފާ އެވެ.